ທາງການລາວວ່າ ບໍ່ມີຜູ້ພິພາກສາ ຖືກໄລ່ອອກ

ຈາກການລາຍງານຂອງ ໜັງສືພິມວຽງຈັນທາມສ໌ ແລະສຳນັກຂ່າວ AFP ທີ່ແຈ້ງວ່າ ສປປລາວ ໄດ້ປົດຄນະຜູ້ພິພາກສາ ອອກຈາກຕຳແໜ່ງນັ້ນ ເຈົ້າໜ້າທີ່ທາງການ ລາວເວົ້າວ່າ ຕາມຄວາມຈິງແລ້ວ ເປັນເຣື້ອງການເຂົ້າໃຈຜິດ ບໍ່ແມ່ນການປົດ ອອກຈາກຕຳແໜ່ງ ເປັນພຽງແຕ່ການ ໂຍກຍ້າຍໜ້າທີ່ຂອງ ຜູ້ພິພາກສາ ລົງໄປຫາ ພາກທ້ອງຖິ່ນທໍ່ນັ້ນ ດັ່ງທ່ານ ສົມພັນ ແພງຄຳມີ ອັຍການ ປະຊາຊົນສູງສຸດ ໄດ້ເວົ້າວ່າ:

"ເຣື້ອງເຂົ້າໃຈຜິດ ເຣື້ອງການໂຍກຍ້າຍໜ້າທີ່ ບໍ່ຈັກຫັ້ນກໍມີ ການໂຍກຍ້າຍສັບປ່ຽນໜ້າທີ່ ເພາະວ່າມີຜູ້ພິພາກສາ ຢູ່ສານສູງແລ້ວ ໄປປະຕິບັດໜ້າທີ່ ຢູ່ສານ ນະຄອນຫລວງວຽງຈັນ".

ທ່ານສົມພັນ ໄດ້ເວົ້າຕື່ມອີກວ່າ ການສັບປ່ຽນໂຍກຍ້າຍ ຄນະຜູ້ພິພາກສາ ໃຫ້ໄປເຮັດວຽກ ໃນທ້ອງຖິ່ນຕ່າງໆນັ້ນ ຖືວ່າເປັນເຣື້ອງ ປົກກະຕິທັມມະດາ ຢູ່ສປປລາວ ຊຶ່ງທາງອັຍການ ປະຊາຊົນສູງສຸດ ຈະມີຄຳສັ່ງໃຫ້ ສັບປ່ຽນໂຍກຍ້າຍ ໃນເວລາປະມານ4-5ປີ ເພື່ອໃຫ້ເຈົ້າໜ້າທີ່ສານ ໄດ້ມີປະສົບການ ເຂົ້າໃຈເຖິງບັນຫາ ລະດັບທ້ອງຖິ່ນ ຢ່າງແທ້ຈິງ. ສຳລັບເທື່ອນີ້ ການສັບປ່ຽນໂຍກຍ້າຍ ກໍມີເກືອບທຸກພາກສ່ວນ ດັ່ງທ່ານເວົ້າອີກວ່າ:

"ເກືອບທຸກພາກສ່ວນ ຕາມສາຍຕ່າງໆ ຕາມລະບົບຂອງອັຍການ ຄືກັນນັ້ນແຫລ໋ະ ມັນມີບາງກໍຣະນີ ກໍເອົາໝົດທັງ ທົ່ວປະເທດເລີຍໂລດ".

ທ່ານ ສົມພັນ ໄດ້ເວົ້າໃນຕອນທ້າຍວ່າ ສຳລັບລາຍງານຂອງ ໜັງສືພິມວຽງຈັນທາມສ໌ ແລະສຳນັກຂ່າວ AFP ທີ່ວ່າໄດ້ມີການປົດ ຄນະຜູ້ພິພາກສາ ອອກຈາກໜ້າທີ່ ຕຳແໜ່ງນັ້ນ ອາຈແມ່ນເປັນການ ເຂົ້າໃຈຜິດເນື່ອງຈາກວ່າ ເຖິງປັດຈຸບັນນີ້ ຍັງບໍ່ຮູ້ວ່າມີ ຄນະຜູ້ພິພາກສາ ຖືກໄລ່ອອກຈາກໜ້າທີ່ເລີຍ.