ລາວນອກສົງໃສ ນະໂຍບາຍຕ້ອນຮັບ ຂອງພັກ-ຣັຖໃນລາວ

ຊາວລາວຢູ່ຕ່າງປະເທດ ຈຳນວນນຶ່ງ ມີຄວາມດີອົກດີໃຈ ແລະ ຢາກກັບຄືນເມືອ ບ້ານເກີດເມືອງນອນຂອງຕົນ ໃນເມື່ອຣັຖບານລາວ ມີນະໂຍບາຍຮັບເອົາ ດ້ວຍຄວາມຈິງໃຈ. ແຕ່ຊາວລາວຢູ່ຕ່າງປະເທດ ອີກຈຳນວນນຶ່ງເວົ້າວ່າ ນະໂຍບາຍຍິນດີ ຕ້ອນຮັບ ຊາວລາວຢູ່ຕ່າງປະເທດ ຂອງຣັຖບານລາວ ແຝງໄປດ້ວຍ ກົນອຸບາຍສະຫລັບຊັບຊ້ອນ ຢູ່ເບື້ອງຫລັງ. ເຖິງວ່າທາງການລາວ ຈະມີຣະບຽບກົດໝາຍກໍດີ ແຕ່ໃນພາກຕົວຈິງ ພັກ-ຣັດ ຢູ່ເໜືອກົດໝາຍ ດັ່ງຊາວລາວທ່ານນຶ່ງ ທີ່ສະຫະຣັດອາເມຣິກາ ກ່າວກ່ຽວກັບເລື້ອງນີ້ວ່າ:

"ຂ້າພະເຈົ້າ ກໍຄິດວ່າ ອອກກົດໝາຍຢູ່ ແຕ່ສູ່ລືມວ່າກົດໝາຍ ຂອງຣັຖບານລາວນີ້ ເປັນກົດໝາຍຢູ່ ແຕ່ວ່າ ພັກຣັດຫັ້ນ ມັນຢູ່ເທິງກົດໝາຍ ທ່ານເຫັນບໍ່ວ່າ ຂະເຈົ້າປົກຄອງກັນມາ 30 ກວ່າປີ ມີຜູ້ໃດແດ່ຖືກໂທດ ມີແຕ່ກິນກັນຢ່າງ ອຸດຕະລຸດ".

ຣັຖບານລາວ ມີນະໂຍບາຍ ດຶງດູດເອົາຊາວລາວ ຢູ່ຕ່າງປະເທດ ດ້ວຍການຮຽກຮ້ອງ ໃຫ້ກັບຄືນໄປ ທຳມາຫາກິນ ຮວມທັງການລົງທຶນ ໃນທຸຣະກິດຕ່າງໆ.  ແລະກໍມີຄົນລາວ ຈຳນວນນຶ່ງທີ່ຕອບ ຮັບນະໂຍບາຍນັ້ນ ດັ່ງຈະເຫັນໄດ້ໃນໂອກາດ ການແຂ່ງຂັນກິລາຊີເກມສ໌ ຄັ້ງທີ່ 25 ທີ່ລາວເປັນເຈົ້າພາບ ມີຄົນລາວຈຳນວນນຶ່ງ ທີ່ອາໃສຢູ່ ປະເທດຝຣັ່ງເສດ, ອອສເຕຣເລັຍ, ສະຫະຣັດ ແລະປະເທດອຶ່ນໆ ໄດ້ໄປຢ້ຽມຢາມບ້ານເກີດ ແລະເຂົ້າຊົມງານດັ່ງກ່າວ.

ໂດຍປະຕິບັດ ຕາມນະໂຍບາຍດຶງດູດ ທີ່ວ່ານັ້ນທາງການລາວ ໄດ້ຕ້ອນຮັບພວກເຂົາເຈົ້າ ໃນວັນທີ 17 ທັນວາ 2009. ໜັງສືພິມ ປະຊາຊົນຣາຍງານ ໂດຍອ້າງອິງ ໃສ່ຄໍາເວົ້າຂອງ ທ່ານ ບົວສອນ ບຸບຜາວັນ ນາຍົກຣັຖມົນຕຣີ ສປປລາວ ວ່າການຢ້ຽມຢາມນັ້ນ ເປັນການສະແດງອອກ ເຖິງຄວາມມີນ້ຳໃຈ ຮັກເຊື້ອແພງຊາດ ຮັກບ້ານເກີດເມືອງ ນອນຂອງຕົນ. ເຖິງວ່າຈະຈາກບ້ານເກີດ ເມືອງນອນໄປດົນແລ້ວ ແຕ່ກໍຍັງຕິດຕາມຂ່າວຄາວ ແລະຍັງເປັນຫູ ເປັນຕາໃນການໂຄສະນາ ຕອບໂຕ້ຖ້ອຍທໍານອງ ຂອງພວກຄົນບໍ່ດີ ອັນອາດໝາຍເຖິງ ຜູ້ບໍ່ເຫັນດີເຫັນພ້ອມ ນຳຣະບອບການປົກຄອງ ແບບພັກດຽວ ເຄົ້າດຽວ ຂອງຕົນ.