ເມືອງບຸນໃຕ້ ແຂວງຜົ້ງສາລີ ຖືກນ້ຳຖ້ວມ ຢ່າງໜັກ

ນ້ຳຖ້ວມຢ່າງຮ້າຍແຮງ ທີ່ເມືອງບຸນໃຕ້ ແຂວງຜົ້ງສາລີ ຂອງລາວ ໃນວັນທີ24 ກໍຣະກະດາ 2009 ໄດ້ເຮັດໃຫ້ບ້ານເຮືອນ ແລະໃຮ່ນາຂອງ ປະຊາຊົນ 10ໝູ່ບ້ານໄດ້ ຮັບຄວາມເສັຍຫາຍໜັກ. ສາເຫດຂອງນ້ຳຖ້ວມນັ້ນ ນອກຈາກເກີດມີ ຝົນຕົກໜັກ ຕິດຕໍ່ກັນເປັນ ເວລາຫລາຍວັນແລ້ວ ອັນສຳຄັນກໍແມ່ນ ຍ້ອນພວກນັກ ທຸຣະກິດຈີນ ໄດ້ຕັດໄມ້ຢ່າງຫລວງຫລາຍ ໃນເຂດປ່າຕົ້ນນ້ຳ. ຕາມຄຳເວົ້າຂອງ ເຈົ້າໜ້າທີ່ກາແດງ ແຂວງຜົ້ງສາລີ:

"ໄທເຮົາກໍໄປກວດເບິ່ງ ເອີມັນມີພວກ ບໍຣິສັດຂອງຈີນ ນີ້ນ່າເຂົ້າໄປ ຂຸດໂຂນໄມ້ ໄປຕັດໄມ້ຢູ່ຍອດຫ້ວຍ ຕັດໄມ້ແລ້ວ ເຂົາລະກອງໄວ້ ກອງໄວ້ກອງໄວ້ ບາດນີ້ນ້ຳມັນ ຝົນຕົກລະມັນອັ່ງຂື້ນ ອັ່ງຂື້ນອັ່ງຂື້ນ ແລະມັນກໍ່ພັງ ພັງແລ້ວມັນກໍ ຫລຸມາບາດດຽວເລີຍ."

ທ່ານເວົ້າຕໍ່ໄປວ່າ ບໍ່ຮູ້ວ່າ ການຂຸດຄົ້ນໄມ້ ຂອງເອກກະຊົນຈີນ ໄດ້ເລີ່ມປະຕິບັດ ມາແຕ່ຍາມໃດ ແຕ່ຊາວບ້ານ ໃນເຂດນັ້ນເວົ້າວ່າ ມີມາດົນນານສົມຄວນ ພວກເຂົາເຈົ້າ ໄດ້ພາກັນຕັດໄມ້ ໃນເຂດຍອດຫ້ວຍ ແລະກອງໄມ້ທ່ອນ ຈຳນວນຫລວງຫລາຍ ໄວ້ຕາມແລວນ້ຳ. ໃນເມື່ອມີຝົນ ຕົກໜັກ ມັນກໍເກີດນ້ຳປ່າ ໃຫລລົງມາຈາກພູ ໄຫລຕາມລຳນ້ຳເງິນ ແລະນ້ຳບານ ນ້ຳຊຸເອົາໄມ້ທ່ອນ ຈຳນວນຫລວງຫລາຍນັ້ນ ໄຫລມາພັດບ້ານເຮືອນ ໄຮ່ນາຂອງປະຊາຊົນ ພ້ອມທັງຣະບົບ ຊົລປະທານ ຕາມສາຍນ້ຳເງິນ ອັນໄດ້ສ້າງຄວາມ ເສັຍຫາຍຢ່າງໜັກໜ່ວງ ໃຫ້ແກ່ປະຊາຊົນ.

ຕາມລາຍງານຂອງ ໜັງສືພິມວຽງຈັນທາມສ ຂອງທາງການລາວ ເວົ້າວ່າມີປະຊາຊົນ ປະມານ100ຄອບຄົວ ໃນ10ໝູ່ບ້ານຂອງ ເມືອງບຸນໃຕ້ ໄດ້ຮັບຜົນກະທົບ ແລະວ່າ ພາກສ່ວນທີ່ກ່ຽວຂ້ອງ ຜແນກແຮງງານ ແລະສວັດດີການສັງຄົມ ຂອງອົງການກາແດງ ໄດ້ໄປຊ່ວຍເຫລືອ ຊາວບ້ານຜູ້ປະສົບໄພ ໃນເບື້ອງຕົ້ນ ດ້ວຍການ ແຈກຢາຍເຂົ້າ ອາຫານແຫ້ງ ແລະເຄື່ອງນຸ່ງຫົ່ມ ພ້ອມກັນນັ້ນທາງ ອຳນາດການປົກຄອງແຂວງ ກໍພວມລວບລວມຂໍ້ມູນ ກ່ຽວກັບຄວາມເສັຍຫາຍ ເພື່ອສເນີຂໍຄວາມ ຊ່ວຍເຫລືອຈາກຣັຖບານ ແລະອົງການຈັດຕັ້ງ ສາກົນຕ່າງໆ.