ໝາກຜົນຈາກ ກອງປະຊຸມວຽງຈັນ

ຣັຖບານ ຈາກ 100 ກວ່າ ປະເທດ ໄດ້ຕົກລົງ ຮັບເອົາແຜນ ປະຕິບັດງານ 66 ຂໍ້ ເພື່ອປ່ຽນເປັນ ກົດບັງຄັບ ໃນສົນທິ ສັນຍາ ວ່າດ້ວຍ ລະເບີດລູກຫວ່ານ ຢ່າງເປັນ ຮູປທັມ.

“ຖແລງການ ວຽງຈັນ” ແລະ “ແຜນ ປະຕິບັດງານ ວຽງຈັນ” ໄດ້ຖືກຮັບຮອງ ເອົາໃນກອງ ປະຊຸມຄັ້ງທຳອິດ ຂອງຣັຖພາຄີ ສົນທິສັນຍາ ລະເບີດລູກຫວ່ານ ຊຶ່ງສິ້ນສຸດລົງ ໃນມື້ວັນ ສຸກ ທີ 12 ພຶສຈິກາ 2010 ທີ່ນະຄອນ ຫລວງວຽງຈັນ, ໂດຍໄດ້ຕັ້ງ ເປັນມາຕຖານ ທີ່ຈະນຳມາ ກວດສອບຣັຖບານ ຫລັງຈາກ ກອງປະຊຸມ ເທື່ອນີ້ ເປັນຕົ້ນໄປ.

ຫລັງຈາກ ກອງປະຊຸມ ສິ້ນສຸດລົງ ດຣ. ທອງລຸນ ສີສຸລິດ ຮອງນາຍົກ ຣັຖມົນຕຣີ ແລະ ຣັຖມົນຕຣີ ການຕ່າງປະເທດ ສປປລາວ ໄດ້ເປີດການ ຖແລງຂ່າວ, ແລະວ່າ ກອງປະຊຸມ ເທື່ອນີ້ມີ ຄວາມໝາຍ ດ້ານປວັດສາດ ສູງ ສຳລັບລາວ ເພາະກອງປະຊຸມ ໄດ້ຕົກລົງ ຮັບຮອງເອົາ ເອກກະສານ ສຳຄັນ 4 ຢ່າງຄື:

1/-ຖແລງການວຽງຈັນ.

2/-ແຜນປະຕິບັດງານວຽງຈັນ.

3/-ແຜນປະຕິບັດງານ ປີ 2011.

4/-ຂໍ້ຕົກລົງ ກ່ຽວກັບ ການລາຍງານ ພາຍໃຕ້ ສົນທິສັນຍາ.

ທ່ານກ່າວອີກວ່າ ໃນກອງປະຊຸມ ເທື່ອນີ້ ໄດ້ມີ ເຈົ້າໜ້າທີ່ ຈາກ 121 ປະເທດຈຳນວນ 1,200 ຄົນ ເຂົ້າຮ່ວມຊຶ່ງ 40 ປະເທດໄດ້ ໃຫ້ສັຕຍາບັນ ຕໍ່ ສົນທິສັນຍາ, 47 ປະເທດລົງນາມ ໃນສົນທິສັນຍາ ແລະ 34 ປະເທດ ຍັງບໍ່ທັນ ລົງນາມ.

ໃນເວລາ ດຽວກັນນັ້ນ ຢູ່ໃນ ກອງປະຊຸມ ຫລາຍປະເທດ ກໍໄດ້ປະກາດ ໃຫ້ເງິນ ຊ່ວຍເຫລືອ ລາວ ໃນການ ເກັບກູ້ລະເບີດ ທີ່ບໍ່ທັນແຕກ ຮວມທັງໝົດ ປະມານ 30 ລ້ານ ໂດລາ ສະຫະຣັຖ, ໂດຍຜ່ານການ ຊ່ວຍເຫລືອລ້າ ແລະ ອົງການ ທີ່ບໍ່ສັງກັດ ຣັຖບານ ຕ່າງໆ.