ເຄມີຈາກສວນປູກອ້ອຍ ອາຈເຮັດໃຫ້ສັດລ້ຽງຕາຍ

ທ່ານສົມເພັດ ອິນທາທິຣາດ ສະມາຊິກ ສະພາແຫ່ງຊາດ ແຂວງສວັນນະເຂດ ເປີດເຜີຍວ່າ ການເຈັບເປັນລົ້ມຕາຍ ຂອງສັດລ້ຽງ ໃນເຂດເມືອງ ໄຊຍະບຸຣີ ແຂວງ ສວັນນະເຂດ ມີຢູ່ເລື້ອຍໆ ນັບແຕ່ການຕັ້ງ ໂຮງງານເຮັດນ້ຳຕານ ເປັນຕົ້ນມາ, ຊຶ່ງມີການຂຍາຍ ພື້ນທີ່ເພື່ອປູກອ້ອຍ ກວ້າງອອກໄປເລື້ອຍໆ  ທັງມີການໃຊ້ ສານເຄມີ ໃນການຜລິດ ນ້ຳຕານ ແລະສານເຄມີ ນີ້ອາດຈະຮົ່ວໃຫລ ເປິເປື້ອນ ໃສ່ສິ່ງແວດລ້ອມ ຈົນເປັນອັນຕະລາຍ ຕໍ່ສັດລ້ຽງຂອງ ປະຊາຊົນ. ທ່ານສົມເພັດ ເວົ້າວ່າ:

"ມັນມີຢູ່ເລື້ອຍໆ ໃນລະຍະເຮົາ ລົງກວດທ້າຍປີ 2009 ມີຢູ່ລະດັບ 30–40 ກວ່າໂຕແລ້ວ ຕາມຈຳນວນບ້ານ ທີ່ເຮົາລົງກວດ ໃນກຸ່ມນຶ່ງ ໂດຍສະເພາະເຂດ ກະຈຸກຫັ້ນ ແລະກໍຄິດວ່າຍັງມີ ເຂດອື່ນໆອີກ ຍັງຊິມີຫລາຍ ໃນເຂດໂຄງການ ປູກອ້ອຍຫັ້ນ".

ທ່ານເວົ້າຕໍ່ໄປວ່າ ບັນຫາສັດລ້ຽງ ໂດຍສະເພາະງົວຄວາຍ ຂອງຊາວບ້ານ ທີ່ລຸລູກແລະ ລົ້ມຕາຍ ມີປະຊາຊົນ ຮ້ອງຮຽນມາໄດ້ ລະຍະນຶ່ງແລ້ວ. ຫລັງຈາກການລົງ ໄປກວດກາ ຂອງເຈົ້າໜ້າທີ່ ເຫັນວ່າສາເຫດ ອາດເປັນຍ້ອນ ສານເຄມີທີ່ໃຊ້ ໃນການປູກອ້ອຍ ແລະທີ່ໃຊ້ໃນ ການຜລິດນ້ຳຕານ ທີ່ອາດຮົ່ວໃຫລ ປະປົນກັບ ແຫລ່ງນ້ຳ ທັມມະຊາດ ເມື່ອສັດລ້ຽງ ຂອງຊາວບ້ານ ດື່ມກິນ ກໍເກີດອາການ ເຈັບເປັນ ແລະລົ້ມຕາຍ.

ກ່ຽວກັບການ ແກ້ໄຂບັນຫາ ດັ່ງກ່າວ ໃນຕອນທຳອິດ ທາງການໄດ້ສົ່ງ ພນັກງານ ທີ່ເບິ່ງແຍງດ້ານ ສິ່ງແວດລ້ອມ ໄປປະສານງານ ກັບບໍຣິສັດ ຜລິດນ້ຳຕານ ແລະ ປະຊາຊົນທີ່ ປູກອ້ອຍ ເພື່ອປ້ອນໂຮງງານ ໄດ້ກວດກາສຶກສາ ຫາຄວາມຈິງ ຮ່ວມກັນ ເພື່ອໃຫ້ຮູ້ຄັກແນ່ ວ່າສາເຫດທີ່ ແທ້ຈິງນັ້ນມາ ຈາກໃສ ເພື່ອຈະໄດ້ຫາ ທາງແກ້ໄຂຮ່ວມກັນ ຢ່າງຖືກຕ້ອງ.