ດິນພູເຈື່ອນ ເມືອງດັກຈຶ້ງ ແລະ ເມືອງກະລຶມ

ນໍ້າໃນຫ້ວຍໜອງ ໃນຊ່ວງ ໜ້າຝົນ ໄຫລແຮງ ສ້າງບັນຫາ ຫຍູ້ງຍາກ ໃຫ້ແກ່ ປະຊາຊົນ ໃນການເດີນທາງ ເພາະຍັງ ບໍ່ມີການ ກໍ່ສ້າງຂົວເທື່ອ. ເຖິງແມ່ນວ່າ ຝົນຈະບໍ່ ຕົກຫລາຍ ແຕ່ການເດີນທາງ ກໍບໍ່ປອດພັຍ ສໍາລັບ ປະຊາຊົນ ເພາະເວລາ ຝົນຕົກ ມີນໍ້າໄຫລລົງ ຈາກຮ່ອມພູ ມີດິນພູ ເຈື່ອນລົງມາ ໂດຍທີ່ ປະຊາຊົນ ບໍ່ທັນຣະວັງ ຕາມຄໍາເວົ້າ ຂອງເຈົ້າໜ້າທີ່ ຫ້ອງການ ຂົວ-ທາງ ຜແນກ ໂຍທາທິການ ຂົນສົ່ງ ແຂວງເຊກອງ:

"ເຊກອງ ຫາ ເມືອງດັກຈຶ້ງ ກໍຍັງມີ ທາງ ກະລຶມອີກ ເປັນບັນຫາ ບ່ອນວ່າ ມັນມີຫ້ວຍນໍ້າ ແລະ ກໍບາງຄັ້ງ ກໍມີຝົນ ຕົກໜັກຫລາຍ ກໍພູເຈື່ອນ ຊ່ວງຝົນຕົກ ໜັກໆ ມັນຈະມີ ບັນຫາເລື່ອງ ຫ້ວຍແມ່ນໍ້າ ມັນບໍ່ທັນ ມີຂົວ".

ທ່ານກ່າວ ຕໍ່ໄປວ່າ ປະຊາຊົນ ທີ່ຢູ່ໃນ ເມືອງດັກຈຶ້ງ ແລະ ເມືອງກະລຶມ ຄວນຣະມັດ ຣະວັງ ແລະຄວນຫລີກລ່ຽງ ການເດີນທາງ ຂນະທີ່ ມີຝົນຕົກແຮງ ເພາະເສັ້ນທາງ ນັ້ນຍັງບໍ່ໄດ້ ຮັບການພັທນາ. ອີກຢ່າງນຶ່ງ ທັງ 2 ເມືອງກໍຢູ່ ໃນເຂດ ຫ່າງໄກ ເຮັດໃຫ້ການ ກໍ່ສ້າງ ໂຄ່ງຮ່າງພື້ນຖານ ເປັນໄປໄດ້ ຢ່າງລໍາບາກ ໂດຍສະເພາະ ເລື່ອງ ການນໍາອຸປກອນ ຂນາດໃຫຍ່ ເພື່ອເຂົ້າໄປ ກໍ່ສ້າງ ເສັ້ນທາງ ຫລືກໍ່ສ້າງ ສິ່ງອໍານວຍ ຄວາມສະດວກ ຕ່າງໆ.

ເມືອງດັກຈຶ້ງ ແລະ ເມືອງກະລຶມ ແຂວງເຊກອງ ເປັນ 2 ເມືອງ ທີ່ມີຄວາມ ທຸກຍາກ ຫລາຍທີ່ສຸດ ແລະມີ ປະຊາຊົນ ຊົນເຜົ່າ ອາສັຍຢູ່ ຫລາຍທີ່ສຸດ ສົ່ງຜົລ ໃຫ້ຍັງມີ ປະຊາຊົນ ທຸກຍາກ ແລະ ການພັທນາ ໃນດ້ານ ໂຄງສ້າງພື້ນຖານ ການສຶກສາ ແລະ ສາທາຣະນະສຸກ ຕ່າງໆ ຍັງບໍ່ສາມາດ ເຂົ້າໄປເຖິງ ປະຊາຊົນ ເຫລົ່ານັ້ນໄດ້.