ການຕໍ່ຕ້ານຢາເສບຕິດ ໃນລາວ

ທາງການລາວວ່າ ບັນຫາຢາເສບຕິດ ໃນລາວ ຈະບໍ່ໝົດໄປໄດ້ງ່າຍໆ ຍ້ອນວ່າລາວເປັນ ທາງຜ່ານ ໃນການຂົນສົ່ງເຄື່ອນຍ້າຍ ໄປສູ່ປະເທດ ເພື່ອນບ້ານ ແລະການປາບປາມ ຄວບຄຸມກໍຍັງບໍ່ເປັນ ລະບຽບ ແລະໄດ້ມາຕຖານ ທັງການຈັບກຸມຜູ້ຄ້າ ຢາເສບຕິດກໍຍັງ ບໍ່ເຂັ້ມງວດພຽງພໍ. ດັ່ງເຈົ້າໜ້າທີ່ຈາກ ຫ້ອງການຄະດີ ຢາເສບຕິດ ນະຄອນຫລວງວຽງຈັນ ເວົ້າວ່າ:

"ເຫລືອຫລາຍດຽວນີ້ ເວົ້າແທ້ມັນເປັນທາງຜ່ານ ຫລາຍກວ່າ ມັນຫລາຍໆຂະເຈົ້າ ຂົນຜ່ານລາວ ໄປກຳພູຊາ ໄປໄທ ແຕ່ວ່າຈຳນວນນຶ່ງ ກໍເອົາມາຂາຍຢູ່ນີ້ ຄືກັນ ເດັກນ້ອຍລາວກໍຕິດ ຄືກັນ ຕິດຢາບ້າ ອັນຕະລາຍຕໍ່ສັງຄົມ ລາວຫລາຍ".

ເຈົ້າໜ້າທີ່ເວົ້າຕໍ່ໄປວ່າ ຄະດີຢາເສບຕິດ ສ່ວນຫລາຍຈະເປັນ ປະເພດຢາບ້າ ແລະຮອງລົງມາກໍແມ່ນ ຄະດີປະເພດຢາ ເຮໂຣອິນ. ຄະດີຢາເສບຕິດ ຈະມີຫລາຍກວ່າ ຄະດີອື່ນໆ ຫາກປຽບທຽບໃສ່ກັນ.
ເຖິງວ່າເຈົ້າໜ້າທີ່ ຈະພຍາຍາມເຂັ້ມງວດ ຄວບຄຸມປາບປາມ ແລະເອົາຈິງເອົາຈັງ ໃນການຈັບກຸມຜູ້ຄ້າ ແລະເສບຢາເສບຕິດ ກໍຕາມ ແຕ່ກໍຍັງມີຂໍ້ບົງພ່ອງ ບາງປະການ ຈົນເຮັດໃຫ້ບໍ່ ສາມາດ ຈັບກຸມເອົາຜູ້ ກະທຳຜິດ ມາລົງໂທດໄດ້. ເຈົ້າໜ້າທີ່ ອະທິບາຍອີກວ່າ:

"ກໍບົກພ່ອງ ບາງເທື່ອນີ້ເຮົາ ກໍຈັບຄົນໄດ້ຢູ່ ແຕ່ວ່າຈັບຂອງກາງບໍ່ໄດ້ ຫລືບາງເທື່ອນີ້ ຈັບຄົນໄດ້ແລ້ວ ກໍເອົາຕົວຫລົບໜີໄປ ກໍມີ ມັນມີຫລາຍຂັ້ນຕອນຢູ່ ເຈົ້າໜ້າທີ່ ຊິເປັນເຈົ້າໜ້າທີ່ ບໍ່ລະອຽດຮອບຄອບ ປານໃດ".

ເຖິງວ່າທີ່ຜ່ານມາ ທາງການລາວ ໄດ້ຕັດສິນລົງໂທດ ຜູ້ກະທຳຜິດຖານຄ້າ ຫລືເສບຢາເສບຕິດ ສະຖານໜັກ ແລະເຄີຍທຳລາຍຢາ ທີ່ຍຶດມາໄດ້ນັ້ນຖິ້ມ ແຕ່ບັນຫາ ຢາເສບຕິດ ກໍຍັງບໍ່ສາມາດແກ້ໄຂ ປາບປາມ ໃຫ້ໝົດໄປໄດ້ເທື່ອ ຈຶ່ງເຮັດໃຫ້ມີຄວາມ ບໍ່ສງົບໃນສັງຄົມ ເລື້ອຍມາ.