ຊາວວີເກີຣ໌ ທີ່ລອນດອນ ປະທ້ວງ ສະຖານທູຕ ຈີນ

ໃນມື້ວັນພຸດ ຜ່ານມານີ້ ເພື່ອປະນາມ ທາງກາຣຈີນ ທີ່ປາບປາມ ກຸ່ມປະທ້ວງ ຢູ່ແຂວງຊີນຈຽງ ໃນຣະຍະຜ່ານມາ ເຮັດໃຫ້ມີຜູ້ ເສັຽຊີວີຕໄປ 190 ກວ່າຄົນ ແລະ ຫລັງຈາກນັ້ນ ຄນະປະທ້ວງ ກໍພາກັນຍ່າງ ໄປຕາມຖນົນ Downing ເພື່ອຍື່ນຂໍ້ຮຽກຮ້ອງ ຕໍ່ສຳນັກງານ ນາຍົກຣັຖມົນຕຣີ ອັງກິດ ທ່ານ Gordon Brown ເພື່ອໃຫ້ຊ່ວຍນຳເອົາ ຂໍ້ສເນີຂອງເຂົາເຈົ້າ ສົ່ງຕໍ່ອົງກາຣ ສະຫະປະຊາຊາຕ ແລະ ອົງກາຣປົກປ້ອງ ສິທທິມະນຸສຍະຊົນ ເຂົ້າໄປສືບສວນ ກ່ຽວກັບຄວາມ ບໍ່ສງົບ ທີ່ເກີດຂື້ນໃນ ແຂວງຊີນຈຽງ ພ້ອມກັບໃຫ້ຍຸຕິກາຣ ປາບປາມ ຊົນເຜົ່າຊາວວີເກີຣ໌ ຢ່າງຊິ້ນເຊີງ.

ອົງກາຣຂ່າວ AFP ໄດ້ແຈ້ງເພີ່ມວ່າ: ຕລອດເວລາ ທີ່ມີກາຣ ໂຮມຊຸມນຸມ ຢູ່ຕໍ່ໜ້າ ສະຖານທູຕຈີນ ແລະ ຄາວທີ່ຍ່າງໄປ ຕາມຖນົນໃນ ກຸງລອນດອນ ດັ່ງກ່າວ ຄນະ ປະທ້ວງສ່ວນໜື່ງ ກໍຖືທຸງຊາຕ Turkestan ຕາເວັນອອກ ພ້ອມກັບປ້າຍຄຳຂວັນ ທີ່ເຕັມດ້ວຍ ຂໍ້ຄວາມຕ່າງໆ ເປັນກາຣປະນາມ ທາງກາຣຈີນທີ່ ເຂົ້າເອົາແຄວ້ນວີເກີຣ໌ ໄປເປັນແຂວງໜື່ງ ຂອງຕົນແຕ່ປີ 1949 ເປັນຕົ້ນມາດັ່ງທີ່ ໄດ້ຍຶດເອົາທີເບຕ ໃຫ້ຂື້ນກັບຈີນ ໃນຄາວດຽວກັນ ນັ້ນເຊັ່ນກັນ.

ທ່ານ Enver Tohti ປະທານ ຂອງສະມາຄົມ ຊາວວີເກີຣ໌ ຢູ່ອັງກິດ ໄດ້ອະທິບາຍ ໃຫ້ທາງສື່ມວລຊົນ ຊາບວ່າພວກຕົນ ປະທ້ວງເພື່ອຮຽກທວງ ໃຫ້ທາງກາຣຈີນ ຍຸຕິກາຣປາບປາມ ຊາວວີເກີຣ໌ ແລະຢາກໃຫ້ທາງຈີນ ຮັບສາຣະພາບ ວ່າມີຄວາມຜິດ ທີ່ເຂົ້າຍຶດ ແລະປາບປາມ ປະຊາຊົນ ຊາວວີເກີຣ໌ ແລະຢາກໃຫ້ແຈ້ງ ຈຳນວນ ຕົວຈີງຂອງພວກ ທີ່ເສັຽຊີວີຕໄປນັ້ນ ໂດຽບໍ່ມີກາຣ ປົກປິດແຕ່ຢ່າງໃດ.