ຣັຖບານລາວ ບໍ່ປະນາມຣັສເຊັຽ ໃນເວທີສາກົລ
2022.03.13
ຄົນເຈັບມະຣັງ ໃນເມືອງລະວີບ ບຽດກັນໜີເຂົ້າໄປໃນ ຂຸມລີ້ພັຍໃຕ້ດິນ ທີ່ໂຮງໝໍ ເວລາທີ່ມີສຽງເຕືອນພັຍ ການໂຈມຕີທາງອາກາດ.
Halyna Tereshchuk/Radio Svoboda.org(RFE/RL)
ຣັຖບານລາວ ບໍ່ປະນາມຣັສເຊັຽ ໃນເວທີສາກົນ ໃນກໍລະນີ ຣັສເຊັຽ ໃຊ້ກຳລັງທະຫານ ບຸກຕີ ປະເທດຢູເຄຼນ ຍ້ອນວ່າ ຣັສເຊັຽ ມີອິດທິພົນ ທາງການທະຫານ ແລະ ການເມືອງ ໃນລາວ.
ທາງການລາວບໍ່ກ້າທີ່ຈະໄປລົງຄະແນກສຽງເພື່ອປະນາມ ຣັສເຊັຽຢູ່ກອງປະຊຸມສຸກເສີນ ສໄມພິເສດ ຄັ້ງທີ 11 ຂອງສະມັດຊາໃຫຍ່ ສະຫະປະຊາຊາດ ມີຫຼາຍເຫດຜົນເປັນຕົ້ນວ່າ ຣັສເຊັຽມີອິທິພົນຕໍ່ລາວ ທາງການທະຫານ ແລະ ທາງການເມືອງ ນັບແຕ່ປີ 1975 ເປັນຕົ້ນມາ.
ເຈົ້າໜ້າທີ່ທາງການລາວ ທ່ານ ນຶ່ງ ໄດ້ກ່າວຕໍ່ເອເຊັຽເສຣີ ວ່າ:
“ຊິລົງໄດ້ແນວພໍ່ເພິ່ນເດ້ ຣັສເຊັຽ ໄປລົງຄັດຄ້ານກະພໍດີຣັສເຊັຽເອົາເຣື່ອງລະ.”
ຣະບົບການເມືອງ ແລະ ການປົກຄອງຂອງລາວ ໄດ້ເອົາຕົ້ນແບບມາຈາກທິສດີມາກ-ເລນີນ ແລະ ຜູ້ນຳລາວໃນປັດຈຸບັນ ສ່ວນຫຼາຍກໍໄດ້ໄປຮຽນຢູ່ອາດີດສະຫະພາບໂຊວຽດ.
ເຈົ້າໜ້າທີ່ລາວ ທ່ານນີ້ ກ່າວຕື່ມວ່າ:
“ໂອລາວຫັ້ນ ບໍ່ແມ່ນເວົ້າດອກ ຄັນເວົ້າເຣື່ອງຊິໄປປະນາມຣັສເຊັຽຫັ້ນເປັນໄປບໍ່ໄດ້ດອກແນວຣັສທິມາກເດ້ ຄືຣັສທິມາກຄູ່ມື້ນີ້ ຄືຣັສທິມາກເລນິນ ແຕະຕ້ອງບໍ່ໄດ້ໄດ໋ ຣັສທິມາກ.”
ເຖິງວ່າ ເຈົ້າໜ້າທີ່ລາວບາງຄົນກໍບໍ່ເຫັນດີນຳເຣື່ອງນີ້ ແຕ່ ກໍບໍ່ໄດ້ອອກມາວິຈານທາງສາທາລະນະ ຍ້ອນວ່າ ມັນຈະເປັນການຜິດແນວທາງດ້ານການເມືອງ.
ເອອັດຂ້າລັດຖະທູດຣັຖເຊັຽປະຈຳລາວ ກໍອອກມາຊີ້ແຈງເຫດຜົນທີ່ຣັສເຊັຽຕ້ອງໃຊ້ປະຕິບັດການທະຫານຕໍ່ປະເທດຢູເຄຼນ.
ເຈົ້າໜ້າທີ່ ທາງການລາວ ທ່ານນີ້ ກ່າວວ່າ:
“ສະຖານທູດຣັສເຊັຽອະທິບາຍການບຸກຢູເຄຼນ ຫັ້ນເດ້ ຂ້ອຍລະໂອ້ຍ ບໍ່ປະຕາຟັງດອກ ສົ່ງເຫດຜົລແມ່ນຫຍັງມາ ຢາກໃຫ້ຄົນລາວນີ້ເຂົ້າໃຈ ຄັນຄືຂ້ອຍນີ້ບໍ່ ບໍ່ເຂົ້າໃຈນຳດອກຂ້ອຍວ່າ ແນວໄປຮຸກຮານບ້ານເມືອງປະເທດອື່ນ ກະທະຫານຕໍ່ທະຫານນີ້ ກະບໍ່ວ່າດອກ ມັນຖລົ່ມໄປໝົດນີ້ກະປະຊາຊົນຫັ້ນຕີ້ຜູ້ບໍລິສຸດ.”
ນອກຈາກນີ້ ນັກທຸຣະກິດ ທ່ານນຶ່ງ ກໍໃຫ້ສຳພາດຕໍ່ເອເຊັຽເສຣີ ວ່າ ລາວບໍ່ປະນາມຣັສເຊັຽ ຍ້ອນວ່າ ຕິດໜີ້ບຸນຄຸນຣັສເຊັຽ.
ນັກທຸລະກິດ ກ່າວວ່າ:
“ປັດຈຸໃຈດຽວໜິ້ີ້ບຸນຄຸນການຕໍ່ສູ້ ຄືອາວຸດ ທີ່ສະຫະພາບໂຊວຽດໄດ້ສົ່ງໃຫ້ ເຂົ້າກິນມາຈາກ ຄິວບາ ທີ່ໂຊວຽດ ບອກວ່າ ຄິວບາ ສົ່ງໃຫ້.”
ໃນຂະນະທີ່ ບາງຄົນກໍໃຫ້ເຫດຜົລວ່າ ການທີ່ລາວຈະປະນາມຣັສເຊັຽ ຫຼື ບໍ່ນັ້ນ ກໍບໍ່ມີຜົລຫຍັງ ຍ້ອນວ່າ ເປັນປະເທດນ້ອຍ ແລະ ບໍ່ມີບົດບາດໃນເວທີສາກົນ.
ພະນັກງານບຳນານ ທ່ານນຶ່ງ ໄດ້ໃຫ້ສຳພາດຕໍ່ເອເຊັຽເສຣີ ວ່າ:
“ເພິ່ນຊິປະນາມ ຫຼື ບໍ່ປະນາມຫຍັງ ກໍຄົງຈະບໍ່ມີຄວາມໝາຍຫຍັງດອກ ເພາະວ່າ ລາວເປັນປະເທດທີ່ນ້ອຍ ບໍ່ໄດ້ມີບົດບາດຫຍັງຕໍ່ເວທີສາກົນ ເຖິງວ່າ ລາວຈະເປັນພັນທະມິດເກົ່າຂອງຣັສເຊັຽ.”
ຣັຖບານລາວ ບໍ່ໄດ້ລົງນາມ ເພື່ອປະນາມຣັສເຊັຽ ຕໍ່ກັບກໍລະນີທີ່ຣັສເຊັຽໃຊ້ກຳລັງທະຫານບຸກເຂົ້າປະເທດຢູເຄຼນ, ແຕ່ ສະແດງຄວາມກັງວົນ ທີ່ຫຼາຍປະເທດໄດ້ຂວ້າມບາດຣັສເຊັຽ.
ທ່ານ ອະນຸພາບ ວົງຫນໍ່ແກ້ວ ເອອັກຄະລັດຖະທູດ ຜູ້ຕາງໜ້າຖາວອນ ແຫ່ງ ສປປ ລາວ ປະຈຳອົງການສະປະຊາຊາດ ໄດ້ຖແລງ ຢູ່ໃນກອງປະຊຸມສຸກເສີນ ສໄມພິເສດ ຄັ້ງທີ 11 ຂອງສະມັດຊາໃຫຍ່ ສະຫະປະຊາຊາດ ໃນວັນທີ 2 ມີນາ ຕອນນຶ່ງວ່າ:
“ພວກເຮົາ ຍັງມີຄວາມກັງວົນ ຕໍ່ມາດຕະການຂວ້າມບາດຝ່າຍດຽວ. ໃນທາງກົງກັນຂ້າມ, ພວກເຮົາ ເຫັນວ່າ ຄວນມີຄວາມລະມັດລະວັງ ຕໍ່ການນໍາໃຊ້ມາດຕະການຂໍ້ວາບາດ ທີ່ອາດສ້າງຜົນກະທົບໃນໄລຍະຍາວ ຕໍ່ປະຊາຊົນ ຜູ້ບໍລິສຸດ ແລະ ຕໍ່ວົງຄະນາຍາດສາກົນໂດຍລວມ, ໂດຍສະເພາະ ໃນທ່າມກາງພະຍາດລະບາດທີ່ພວມແຜ່ລາມ.”
ທ່ານ ອະນຸພາບ ວົງຫນໍ່ແກ້ວ ເອອັກຄະລັດຖະທູດ ຜູ້ຕາງໜ້າຖາວອນ ແຫ່ງ ສປປ ລາວ ປະຈຳອົງການສະປະຊາຊາດ ຍັງກ່າວຕື່ມອີກວ່າ:
“ໃນນາມເປັນປະເທດໜຶ່ງ ທີ່ເຄີຍພົບກັບຄວາມທຸກທໍລະມານ ຈາກບາດແຜຂອງສົງຄາມ, ສປປ ລາວ ຊາບດີເຖິງຜົນກະທົບອັນຮ້າຍແຮງ ທີ່ມີຕໍ່ຊີວິດຂອງປະຊາຊົນຜູ້ບໍລິສຸດ. ພວກເຮົາເຊື່ອຫມັ້ນວ່າ ສິ່ງທີ່ພວມເກີດຂຶ້ນຢູ່ໃນປັດຈຸບັນນີ້ ຈະບໍ່ນໍາເອົາຜົນປະໂຫຍດໃດໆມາສູ່ທຸກຝ່າຍ.”
ໃນກອງປະຊຸມສຸກເສີນ ສໄມພິເສດ ຄັ້ງທີ 11 ຂອງສະມັດຊາໃຫຍ່ ສະຫະປະຊາຊາດ ໃນວັນທີ 2 ມີນາ, ມີ 141 ຈາກທັງໝົດ 181 ປະເທດ ໄດ້ລົງນາມ ເພື່ອປະນາມຣັສເຊັຽ ທີ່ໃຊ້ກຳລັງທະຫານບຸກ ແລະ ຮຸກຮານປະເທດຢູເຄຼນ, ໃນຂະນະທີ່ ລາວ ຢູ່ໃນກຸ່ມ 35 ປະເທດ ທີ່ງົດອອກສຽງ, ສ່ວນວ່າ ອີກ 5 ປະເທດ ໄດ້ຄັດຄ້ານການປະນາມຣັສເຊັຽ.
ໃນປີ 2018, ຣັຖບານ ໄດ້ສັ່ງຊື້ຮົດຖັງຫຼາຍ 10 ຄັນ ແລະ ຍົນສຳລັບຝຶກຊ້ອມສູ້ຣົບຫຼາຍລຳ ຈາກປະເທດຣັສເຊັຽ.