ພຣະອາຈານບົວ ຖືກ ຄາດຕະກັມ

ພຣະ ອາຈານ ຍາພໍ່ ບົວ ຮອງ ອົງການ ພຸທທະສາສນາ ສໍາພັນ ແຂວງ ສະຫວັນນະເຂດ ຖືກ ຄາດຕະກັມ.

ແຫລ່ງຂ່າວ ຈາກ ວັດໃຫຍ່ ໄຊຍະພູມ ເມືອງ ໄກສອນ ແຂວງ ສະຫວັນນະເຂດ ໄດ້ ແຈ້ງມາຍັງ ເອເຊັຽ ເສຣີ ວ່າ, ໃນ ຕອນເຊົ້າ ຂອງ ວັນທີ 12, ຫລັງຈາກ ທີ່ ສໍາມະເນນ ຢູ່ ວັດ ເຂົ້າໄປ ກຸດຕິ ເພື່ອ ຈະໄປປຸກ ພຣະອາຈານ ບົວ ມາ ປະຕິຍັດ ກິຈວັດ ປະຈໍາວັນ ແລະ ສັນເຂົ້າ ເຊົ້າ, ແຕ່ ເມື່ອເຂົ້າໄປ ໃນ ກຸດຕິ ກໍພົບວ່າ ຍາພໍ່ ບົວໄດ້ ເສັຽຊີວິດ ໂດຍ ມີບາດແຜ ຢູ່ ບໍລິເວນ ລໍາ ຄໍ ຊຶ່ງ ຄາດວ່າ ແມ່ນຖືກ ປາດຄໍ ດ້ວຍ ຂອງມີຄົມ ແລະ ຕາມການ ສັນນິຖານ ຂອງ ເຈົ້າໜ້າທີ່ ຕໍາຣວດ ໃນ ເບື້ອງຕົ້ນ ຄາດວ່າ ຍາພໍ່ ບົວ ຖືກ ຄາດຕະກັມ ໃນ ຕອນກາງຄືນ.

ໃນ ເວລານີ້ ທາງ ເຈົ້າໜ້າທີ່ ຕໍາຣວດ ກໍ ກໍາລັງ ສືບສວນ ສອບສວນ ເອົາ ຣາຍລະອຽດ ຢູ່, ຄວາມຄືບໜ້າ ເປັນໄປ ແນວໃດ ທາງ ເອເຊັຽ ເສຣີ ຈະ ຣາຍງານ ເພີ້ມເຕີມ.