ທາງການຈີນຊ່ອຍແມ່-ລູກ ຄົນລາວ ໄວ້

ໃນວັນທີ 21 ພຶສພາ 2014 ແມ່ຍິງລາວ ຊື່ນາງ ບົວຄໍາ ອາຍຸ 38 ປີ ຊາວບ້ານ ສໍາພັນໄຊ ເມືອງ ບຸນໃຕ້ ແຂວງ ຜົ້ງສາລີ ແລະ ລູກຊາຍ ອາຍຸ 6 ປີ ໄດ້ຖືກ ເຈົ້າໜ້າທີ່ ຈີນ ຊ່ອຍເຫລືອ ຈາກກຸ່ມ ຄ້າມະນຸດ ແລະ ໄດ້ຖືກສົ່ງ ກັບຄືນມາ ສປປລາວ ດ້ວຍຄວາມ ປອດພັຍ ຫລັງຈາກ ທີ່ໄດ້ຖືກ ຕົວະຍົວະ ໄປແຕ່ງງານ ກັບ ຄົນຈີນ ແລະ ຕໍ່ມາ ໄດ້ ຫລົບໜີ ໄປຂໍຄວາມ ຊ່ອຍເຫລືອ ຈາກ ເຈົ້າໜ້າທີ່ ຈີນ. ດັ່ງ ເຈົ້າໜ້າທີ່ ແຂວງ ຜົ້ງສາລີ ເວົ້າວ່າ:

"ເຂົາເອົາໄປ ຈີນ ຊື່ໆນະ ວ່າເອົາໄປ ຈຸດສົ່ງເຂົາ ແລ້ວເອົາໄປ ຂາຍ ຢູ່ຈີນຫັ້ນ ແລ້ວ ກໍມີປຶ້ມ ສໍາມະໂນ ຄົວ ເເດ່ ຫລັງຈາກ ນັ້ນ ເຂົາກໍສົ່ງມາ ດ່ານ ລານຕຸ້ຍພຸ້ນ ແລ້ວກໍ ມາຮອດພີ້ ແຫລະ ໂຕນີ້ ຫັ້ນນະ".

ທ່ານກ່າວ ຕໍ່ໄປວ່າ ສອງແມ່ລູກນີ້ ໄດ້ຖືກ ທ້າວ ອາລິງ ຊາວແຂວງ ຜົ້ງສາລີ ຕົວະວ່າ ຈະພາໄປ ຊອກຫາຜົວ ຢູ່ ປະເທດຈີນ, ຈະບໍ່ໄດ້ ທຸກຍາກ ຄືກັນ ກັບ ຢູ່ແຂວງ ຜົ້ງສາລີ. ນາງ ກໍຫລົງເຊື່ອ.

ແຕ່ເມື່ອໄປຮອດ ຈີນ ແລ້ວ ໝູ່ ຂອງທ້າວ ອາລິງ ກໍມາຮັບ ເອົາໄປຢູ່ ເຮືອນ ແຫ່ງນຶ່ງ ແລ້ວພາ ນາງແລະລູກ ໄປຢູ່ສວນ ປູກຊາ 2-3 ວັນ ແລ້ວ ກໍຖືກຂາຍ ໃຫ້ຄົນອື່ນ ໃນຣາຄາ 35 ພັນ ຢວນ. ເມື່ອນາງ ບົວຄໍາ ຮູ້ຕົວວ່າ ຖືກຫລອກ ມາຂາຍ ຈຶ່ງພາລູກ ລັກໜີ ຈົນພົບ ເຈົ້າໜ້າທີ່ ຕໍາຣວດ ຈີນ ແລະ ໄດ້ຖືກສົ່ງ ກັບຄືນມາ ສປປລາວ ດ້ວຍ ຄວາມ ປອດພັຍ.