ເມື່ອວັນທີ 11 ກັນຍາ 2023 ທີ່ຜ່ານມານີ້ ເຈົ້າໜ້າທີ່ກະຊວງປ້ອງກັນຄວາມສງົບ ໄດ້ຈັດພິທີສົ່ງຜູ້ຕ້ອງຫາ ຊາວຈີນ ຈໍານວນ 164 ຄົນ ຈາກຂະບວນການສໍ້ໂກງຊັບ ຜ່ານລະບົບໂທຣະຄົມ ຂ້າມຊາຕ ຫຼື ແກ້ງຄອລເຊັນເຕີ້ຣ໌ ໂດຍມອບໃຫ້ເຈົ້າໜ້າທີ່ຕໍາຣວດຈີນ ຢູ່ສນາມບິນສາກົລວັດໄຕ ເພື່ອໃຫ້ຕໍາຣວດຈີນຮັບໂຕໄປດໍາເນີນຄະດີ ຢູ່ປະເທດຈີນ ພາຍຫຼັງທີ່ເຈົ້າໜ້າທີ່ຕໍາຣວດລາວ ສາມາດຈັບແກ້ງດັ່ງກ່າວໄດ້ ຕາມການຂໍຄວາມຮ່ວມມື ຈາກເຈົ້າໜ້າທີ່ຕໍາຣວດຈີນ, ອີງຕາມການຣາຍງານ ຂອງໜັງສືພິມປ້ອງກັນຄວາມສງົບ ວັນທີ 11 ກັນຍາ 2023.
ສໍາລັບແກ້ງຄອລເຊັນເຕີ້ຣ໌ ຊາວຈີນດັ່ງກ່າວ ແມ່ນຖືກຈັບໄດ້ ຢູ່ໃນຫຼາຍແຂວງຂອງລາວ ປະກອບມີ ຢູ່ເຂດເສຖກິຈພິເສດ ສາມຫຼ່ຽມຄໍາ ແຂວງບໍ່ແກ້ວ ຈໍານວນ 46 ຄົນ, ຢູ່ນະຄອນຫຼວງວຽງຈັນ 77 ຄົນ, ຢູ່ແຂວງວຽງຈັນ 22 ຄົນ ແລະ ຢູ່ແຂວງສວັນນະເຂດ 19 ຄົນ, ເຊິ່ງການຈັບຜູ້ຕ້ອງຫາຊາວຈີນເຫຼົ່ານີ້ ເກີດຂຶ້ນໂດຍອີງຕາມບົດບັນທຶກ ຄວາມຮ່ວມມື ລະຫວ່າງກະຊວງປ້ອງກັນ ຄວາມສງົບ ຂອງລາວ ແລະກະຊວງປ້ອງກັນຄວາມສງົບ ຂອງຈີນ, ແລະອີງຕາມຄວາມຮ່ວມມື ຂອງ 2 ກໍາລັງຕໍາຣວດ ລາວ-ຈີນ ໃນການມ້າງກຸ່ມແກ້ງດັ່ງກ່າວ.
ກ່ຽວກັບເຣື່ອງນີ້ ເຈົ້າໜ້າທີ່ປະຈໍາຫ້ອງການ ກວດຄົນເຂົ້າເມືອງ ຢູ່ສນາມບິນສາກົລວັດໄຕ ທ່ານນຶ່ງ ທີ່ຂໍສງວນຊື່ແລະສຽງ ກ່າວຕໍ່ວິທຍຸເອເຊັຽເສຣີ ໃນຕອນແລງ ຂອງວັນທີ 11 ກັນຍາ ທີ່ຜ່ານມາວ່າ:
“ການສົ່ງມອບໂຕ ຜູ້ຕ້ອງຫາຊາວຈີນດັ່ງກ່າວ ໄດ້ມີຂຶ້ນ ໃນຊ່ວງຕອນເຊົ້າ ຂອງວັນທີ 11 ກັນຍາ 2023 ໂດຍເຈົ້າໜ້າທີ່ຕໍາຣວດຈີນ ໄດ້ຂີ່ເຮືອບິນ ຖຽວບິນພິເສດ ຂອງສາຍການບິນ China Southern ຈາກປະເທດຈີນ ມາຮັບຜູ້ຕ້ອງຫາຈໍານວນດັ່ງກ່າວ ຢູ່ສນາມບິນສາກົລວັດໄຕ. ສ່ວນຣາຍລະອຽດເພີ່ມຕື່ມ ບໍ່ສາມາດໃຫ້ຂໍ້ມູນຫຼາຍໄປກວ່ານີ້ໄດ້.”
ພ້ອມດຽວກັນນີ້ ວິທຍຸເອເຊັຽເສຣີ ໄດ້ສອບຖາມໄປຍັງເຈົ້າໜ້າທີ່ ຢູ່ຄະນະຄຸ້ມຄອງເຂດເສຖກິຈ ພິເສດສາມຫຼ່ຽມຄໍາ ເພື່ອສອບຖາມຣາຍລະອຽດເພີ່ມຕື່ມ ແຕ່ເຈົ້າໜ້າທີ່ ທີ່ກ່ຽວຂ້ອງ ຍັງບໍ່ສະດວກໃຫ້ສໍາພາດ ແລະກໍໄດ້ຕິດຕໍ່ໄປຍັງ ສະຖານທູດຈີນ ປະຈໍາປະເທດລາວ ເຊິ່ງເຈົ້າໜ້າທີ່ ຜູ້ທີ່ຮັບໂທຣະສັບ ລະບຸພຽງແຕ່ວ່າ ທາງສະຖານທູດ ໄດ້ຮັບຣາຍງານດັ່ງກ່າວແລ້ວ ແຕ່ບໍ່ສະດວກທີ່ຈະໃຫ້ຄໍາເຫັນເພີ່ມຕື່ມ.
ໃນຂະນະທີ່ ຊາວລາວທີ່ຮູ້ຂ່າວດັ່ງກ່າວ ຫຼາຍຄົນກໍຮູ້ສຶກຍິນດີ ທີ່ເຈົ້າໜ້າທີ່ຕໍາຣວດລາວ ສາມາດມ້າງກຸ່ມແກ້ງດັ່ງກ່າວໄດ້ ຍ້ອນເປັນໄພອັນຕະລາຍຕໍ່ສັງຄົມ ແລະກໍມີສ່ວນ ທີ່ຕົວະໃຫ້ຊາວລາວ ຕົກໄປເປັນເຫຍື່ອຄ້າມະນຸສ ຢູ່ເຂດສາມຫຼ່ຽມຄໍາ ແລະກໍຢາກໃຫ້ເຈົ້າໜ້າທີ່ຕໍາຣວດ ລົງຕິດຕາມກວດກາເລື້ອຍໆ.
ດັ່ງຊາວລາວ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 12 ກັນຍາ ນີ້ວ່າ:
“ເອີ່! ກະໄດ້ຍິນຢູ່ ກະຫຼາຍຢູ່ໃດ໋ ມັນກະເຮັດໃຫ້ອັນນີ້ແຫຼະ ພວກກ້ອນແກ້ງຄອລເຊັນເຕີ້ຣ໌ອິຫຍັງນີ້ ມັນກະຫຼຸດໆລົງ ອິຫຍັງປະມານນີ້.”
ແຕ່ຊາວລາວອີກທ່ານນຶ່ງ ເຫັນວ່າ ການມ້າງກຸ່ມແກ້ງຊາວຈີນດັ່ງກ່່າວ ແມ່ນເປັນການແກ້ບັນຫາ ສະເພາະໜ້າ ແລະແກ້ໄຂທີ່ປາຍເຫດ ຍ້ອນບັນດາໂຕການໃຫຍ່ທີ່ເຮັດໃຫ້ເກີດບັນຫາເຫຼົ່ານີ້ ຍັງບໍ່ທັນຖືກຈັບ ຫຼືມ້າງທໍາລາຍໄດ້ເທື່ອ ຈຶ່ງຢາກໃຫ້ພາກສ່ວນທີ່ກ່ຽວຂ້ອງ ມີການແກ້ໄຂຢ່າງຖືກຈຸດ.
ດັ່ງທ່ານກ່າວວ່າ:
“ແກ້ໄຂບັນຫາສະເພາະໜ້າເນາະ ແຕ່່ວ່າສໍາລັບສ່ວນເລິກຫັ້ນ ຈະບໍ່ຄ່ອຍໄດ້ແກ້ໄຂບັນຫາ ເລິກຊື້ງປານໃດ ເພາະວ່າການທີ່ວ່າເຮົາຈັບແບບນີ້ນ່າ ມັນບໍ່ທັນແກ້ໄຂຖືກຈຸດເທື່ອ ມັນຄືແກ້ໄຂປາຍເຫດເນາະ ເຫັນໂຕຈິງມາແລ້ວ ວ່າຢູ່ປະເທດລາວເຮົານີ້ ມັນມີເຫດການຄໍເຊັນເຕີ້ຂ້າມປະເທດແບບນີ້ ມັນຫຼາຍເນາະ.”
ທາງດ້ານຜູ້ປົກຄອງຂອງເດັກນ້ອຍລາວ ຄົນນຶ່ງ ທີ່ຕົກເປັນເຫຍື່ອກຸ່ມແກ້ງຄົນຈີນດັ່ງກ່າວ ແລ້ວຖືກຂາຍຕໍ່ໄປຍັງປະເທດພະມ້າ ກ່າວວ່າ ທ່ານເອງ ກໍຮູ້ສຶກດີໃຈເລັກໜ້ອຍທີ່ກຸ່ມແກ້ງຄົນຈີນດັ່ງກ່າວ ໄດ້ຖືກມ້າງໄປຈຳນວນນຶ່ງ ແຕ່ກໍຢາກໃຫ້ເຈົ້າໜ້າທີ່ລາວ ແລະຈີນ ເລັ່ງໃຫ້ການຊ່ອຍເຫຼືອຄົນລາວທີ່ຕົກເປັນເຫຍື່ອ ທັງຢູ່ເຂດເສຖກິຈພິເສດສາມຫຼ່ຽມຄຳ ແລະຢູ່ປະເທດພະມ້າ ແລະນຳພາພວກເຂົາເຈົ້າກັບຄືນສູ່ຄອບຄົວໃນລາວ.
ດັ່ງທ່ານກ່າວວ່າ:
“ໄດ້ຍິນຂ່າວວ່າ ເຂົາວ່າແນວນັ້ນ ໂອ ເຂົາວ່າຄົນຈີນທີ່ໄປຕອບແຊັດ ມັນມີຕໍາຣວດຈີນເຂົາມາເອົາໝົດແລ້ວຄົນຈີນເຂົ້າໄດ້ ກະຊ່ວຍເຫຼືອລາວແດ່ ເພາະວ່າ ດຽວນີ້ສະຖານທູດຈີນ ກະຫະປະຈໍາຢູ່ໃນລາວເຮົາ ລາວເຮົາກະປະຈໍາຢູ່ຈີນ ໃຫ້ເຈົ້ານາຍເຂົາ ປຶກສາກັນ.”
ໃນຂະນະດຽວກັນ ຜູ້ປົກຄອງຂອງເດັກນ້ອຍລາວ ອີກຄົນນຶ່ງ ກໍຢາກໃຫ້ເຈົ້າໜ້າທີ່ລາວ ກັບເຈົ້າໜ້າທີ່ຈີນ ຮ່ວມກັນປະສານງານຫາເຈົ້າໜ້າທີ່ ໃນປະເທດພະມ້າ ເພື່ອຊ່ອຍຊອກຫາ ແລະຊ່ອຍເຫຼືອແກ່ເດັກນ້ອຍລາວຈຳນວນຫຼາຍ ທີ່ເປັນເຫຍື່ອຂອງແກ້ງຄອລເຊັນເຕີ້ຣ໌ດັ່ງກ່າວ ເຊິ່ງຍັງຕິດຄ້າງຢູ່ກາສິໂນ ໃນປະເທດພະມ້າ.
ດັ່ງຍານາງ ກ່າວວ່າ:
“ໂອ! ຢາກຂໍຢາກນໍານີ້ແຫຼະ ກິນເຂົ້າກະບໍ່ແຊບ ນອນກະບໍ່ລົງ ໄດ້ຄິດແຕ່ລູກ ລູກກະທໍຣະມານທຸກມື້ທຸກເວລາຢູ່ພຸ້ນນ່າ ບໍ່ໄດ້ໂທຫາ ມືຖືກະບໍ່ມີລູກເຮົານີ່ນ່າ ວັນທີ 22 ຂອງເດືອນ 1 ພຽງແຕ່ເດືອນນັ້ນແຫຼະ ມິດຈີ່ຫຼີ່ເລີຍດຽວນີ້ນ່າ ບໍ່ໄດ້ຍິນຂ່າວຍິນຫຍັງຈັກຕາຍຫຼືເປັນ ບໍ່ຮູ້ແຫຼະດຽວນີ້ນ່າ.”
ແຕ່ເຖິງຢ່າງໃດກໍຕາມ ປັດຈຸບັນ ຢູ່ໃນເຂດເສຖກິຈພິເສດສາມຫຼ່ຽມຄຳ ຍັງມີຫຼາຍບໍຣິສັດ ທີ່ຍັງປະກາດຮັບສມັກງານ ກ່ຽວກັບການຕອບແຊັດ ຫຼື ຄອລເຊັນເຕີ້ຣ໌ຢູ່ເລື້ອຍໆ ໂດຍໄດ້ລົງປະກາດຜ່ານສື່ສັງຄົມອ໋ອນລາຍນ໌ ຢ່າງຈະແຈ້ງ.
ດັ່ງພະນັກງານຕອບແຊັດ ນາງນຶ່ງ ກ່າວວ່າ:
“ຮັບເຈົ້າ ເງິນເດືອນເລີ່ມຕົ້ນ 2,000 ຢວນ ແລ້ວກໍບວກເງິນຂະຫຍັນອີກ 1,000 ຖ້າເຮົາບໍ່ຂາດວຽກ ມື້ພັກວຽກເປັນວັນອາທິດ ພັກເຄິ່ງມື້ໄດ້ ພັກຕອນເຊົ້າຮອດ 2 ໂມງ ເຂົ້າວຽກຄືເກົ່າ.”
ກ່ອນໜ້ານີ້ ເມື່ອທ້າຍສັປດາທີ່ຜ່ານມາ ເຈົ້າໜ້າທີ່ຕຳຣວດ ຂອງປະເທດພະມ້າ ຫາກໍສົ່ງໂຕຜູ້ຕ້ອງຫາຊາວຈີນ ທີ່ເຄື່ອນໄຫວເປັນແກ້ງຄອລເຊັນເຕີ້ຣ໌ ຢູ່ປະເທດພະມ້າ ຈຳນວນ 1,207 ຄົນ ໃຫ້ແກ່ເຈົ້າໜ້າທີ່ຕຳຣວດແຂວງຢູນນານ ຂອງຈີນ ເພື່ອນຳໂຕຜູ້ຕ້ອງການຈຳນວນດັ່ງກ່າວ ໄປດຳເນີນຄະດີ ຢູ່ປະເທດຈີນເຊັ່ນດຽວກັນ, ອີງຕາມຣາຍງານ ຂອງວິທຍຸເອເຊັຽເສຣີ.