ໂຈນປຸ້ນຮ້ານຂາຍຄໍາ

ເກີດເຫດການ ໂຈນປຸ້ນ ຮ້ານຂາຍຄໍາ ຢູ່ ແຂວງສາຣະວັນ ຊຶ່ງອາຈມີ ຊາວວຽດນາມ ຮ່ວມນໍາ.

ເມື່ອວັນທີ່ 2 ສິງຫາ ຜ່ານມາ ເກີດເຫດການ ໂຈນປຸ້ນ ຮ້ານຂາຍຄໍາ ແຫ່ງນຶ່ງ ໃນໂຕເມືອງ ສາຣະວັນ. ຄົນຮ້າຍບໍ່ຊາບຈໍານວນ ໄດ້ເອົາ ປືນຈີ້ ພະນັກງານ ຮ້ານຂາຍຄໍາ ແລ້ວເອົາຄໍາ ຈາກຮ້ານໄປ ຄິດເປັນມູນຄ່າ 800 ລ້ານ ກ່ວາກີບ. ເຈົ້າໜ້າທີ່ ຕັ້ງຂໍ້ສົງໄສວ່າ ການປຸ້ນຈີ້ ຄັ້ງນີ້ອາດມີຄົນວຽດນາມຮ່ວມນໍາດ້ວຍເພາະເຫັນວ່າ ຄົນລາວ ຄົງບໍ່ກ້າ ລົງມື ກໍ່ຄະດີໃຫ່ຽ ແບບນີ້ ໂດຍລໍາພັງ. ຕາມຄໍາເວົ້າ ຂອງເຈົ້າໜ້າທີ່ ຮັກສາ ຄວາມປອດພັຍ ທີ່ ນະຄອນຫລວງ ວຽງຈັນ ໃນວັນທີ່ 6 ສິງຫາ ນີ້:

"ມື້ວັນທີ່ 2 ຢູ່ແຂວງ ສາຣະວັນ ຄໍາເຂົາເສັຽເປັນ ຈໍານວນຫລາຍເດ້ 800 ກ່ວາລ້ານກີບ. ເຮົາສົງໄສ ເປົ້າໝາຍນີ້ ເປັນຄົນວຽດກຽວ. ຄົນວຽດກຽວ ສົມທົບ ກັບຄົນພື້ນທີ່ ແຖວນັ້ນແຫລະ. ດຽວນີ້ ເປັນຄະດີໃຫ່ຽ ຄະດີປຸ້ນຊັບ ມັນໃຊ້ປືນຈີ້ ເຈົ້າຂອງ ຄໍາເດ".

ເຈົ້າໜ້າທີ່ ກ່າວວ່າ ເຫດການ ປຸ້ນຮ້ານຄໍາ ທີ່ວ່ານີ້ ເກີດຂຶ້ນ ໃນຕອນກາງເວັນ ຕໍ່ໜ້າຕໍ່ຕາ ຂອງ ຜູ້ຄົນ ຈໍານວນຫລາຍ ຊຶ່ງຖືວ່າເປັນການ ທ້າທາຍ ຕໍ່ກົດໝາຍ ບ້ານເມືອງທີ່ສຸດ ແຕ່ຄົນຮ້າຍ ບໍ່ໄດ້ຍິງຄົນ ໃນຮ້ານຄໍາ. ທາງກະຊວງ ປ້ອງກັນ ຄວາມສງົບ ໄດ້ສົ່ງເຈົ້າໜ້າທີ່ ລົງໄປ ສົມທົບກັບ ເຈົ້າໜ້າທີ່ ໃນແຂວງ ສາຣະວັນ ເພື່ອຕິດຕາມ ຫາຄົນຮ້າຍ.

ວິທຍຸ ເອເຊັຽເສຣີ ໄດ້ຕິດຕໍ່ໄປຍັງ ເຈົ້າໜ້າທີ່ ປ້ອງກັນ ຄວາມສງົບ ແຂວງ ສາຣະວັນ ເພື່ອສອບຖາມ ລາຍລະອຽດຕື່ມ ແຕ່ບໍ່ສາມາດ ຕິດຕໍ່ກັບ ເຈົ້າໜ້າທີ່ ໄດ້. ເຫດການປຸ້ນຈີ້ ຢູ່ລາວ ປັດຈຸບັນນີ້ ຮຸນແຮງຂຶ້ນ ຊຶ່ງເຫັນໄດ້ ຈາກຫລາຍໆ ກໍຣະນີ ຄົນຮ້າຍ ໃຊ້ອາວຸດປືນຈີ້ ເອົາສິ່ງຂອງ ທີ່ມີຄ່າຈາກ ປະຊາຊົນ. ສາເຫດທີ່ເກີດຂຶ້ນ ຍ້ອນວ່າ ສະພາບສັງຄົມ ມີຄວາມສັບສົນ ຍ້ອນມີຊາວຕ່າງຊາຕທີ່ບໍ່ດີ ເຂົ້າມາຢູ່ ໃນລາວ ນັບມື້ຫລາຍຂຶ້ນ.