ເດັກນ້ອຍແມ່ຍິງລາວ ໃນໄທ

ເຂດນິຄົມອຸດສາຫະກັມ ໃນພາກຕາເວັນອອກ ຂອງໄທ ທີ່ປະກອບດ້ວຍ ແຂວງ ຊົນບຸລີ, ຣະຍອງ, ຈັນທະບູຣີ, ຕາດ ແລະແຂວງ ຊະເຊິງ ເຊົາ ນັ້ນໄດ້ກາຍເປັນແຫລ່ງຂາຍບໍຣິການ ທາງເພດ ຂອງເດັກນ້ອຍແມ່ຍິງ ທີ່ໄປຈາກ ສປປລາວ ຫລາຍຂຶ້ນນັບມື້. ຕາມການຢືນຢັນຂອງ ທ່ານ ຊູວິດ ກະມົນວິເສດ ສະມາຊິກຣັຖສະພາໄທ ທີ່ໄດ້ເປີດເຜີຍຕໍ່ສື່ມວນຊົນໄທ ເມື່ອມໍ່ໆມານີ້. ທ່ານວ່າ ທ່ານໄດ້ພົບເຫັນ ໃນໂອກາດທີ່ ທ່ານ ໄດ້ເດີນ ທາງໄປ ເກັບກໍາຂໍ້ມູນ ໃນທາງລັບ ຢູ່ເຂດແຂວງ ຊະເຊີງເຊົາ:

"ທ່ານວ່າ ແຫ່ງລວມການຄ້າ ບໍຣິການ ທາງເພດ ເດັກນ້ອຍ ແມ່ຍິງລາວ ມີຫລາຍຢູ່ ແຂວງ ຊະເຊິງເຊົາ ແລະວ່າ ການທີ່ ຂະບວນການ ຄ້າມະນຸດ ຈະເຣີນເຕີບໂຕນັ້ນ ກໍເປັນເພາະ ເຈົ້າໜ້າທີ່ ບາງທ່ານ ໃນ ສໍານັກງານ ຕໍາຣວດ ກວດຄົນ ເຂົ້າເມືອງ ແລະເຈົ້າໜ້າທີ່ຕໍາຣວດ ທ້ອງຖິ່ນ ມີຜົລປໂຍຊນ໌ ນໍາ. ທ່ານວ່າ ເປັນໄປບໍ່ໄດ້ ທີ່ ເຈົ້າໜ້າທີ່ ຈະບໍ່ຮູ້ ເພາະສະຖານທີ່ ຮວມທັງເດັກ ນ້ອຍຍິງ ບໍຣິການ ມີຫລາຍ ຂນາດ ນັ້ນ".

ແລະນັກພັທນາ ສິດທິ ສັດຕຣີ ໃນໄທ ກໍໃຫ້ການ ຢືນຢັນວ່າ ກໍຣະນີ ທີ່ກໍາລັງ ຈະກາຍເປັນ ບັນຫາໃຫຍ່ ແລະ ໜ້າເປັນຫ່ວງ ອີກຢ່າງນຶ່ງ ທີ່ ເກີດຂຶ້ນ ໃນຕົວເມືອງ ໃຫຍ່ ຂອງໄທ ຊຶ່ງມີຊາຍແດນ ຕິດກັບລາວ ນັ້ນຄື ການ ເດີນທາງເຂົ້າ ມາລັກຂາຍ ບໍຣິການ ທາງເພດ ຂອງ ນັກຮຽນ ນັກສຶກສາ ຂະນະທີ່ ອົງການ ຄຸ້ມຄອງ ແຮງງານ ຕ່າງດ້າວ ໃນໄທ ເຊື່ອວ່າ ມີຄົນງານ ລາວ ຫລາຍກວ່າ 6 ແສນ ຄົນ ທີ່ລັກ ເຮັດ ວຽກຢູ່ໄທ. ໃນນັ້ນ ເປັນຄົນງານ ເພດຍິງ ເຖິງ 56% ທີ່ຖືເປັນ ກຸ່ມສ່ຽງ ຕໍ່ການ ທີ່ ຈະຖືກ ບັງຄັບ ຫລື ສມັກໃຈ ຂາຍ ບໍຣິການ ທາງເພດ.