ໃນນະຄອນຫຼວງ ອາຊຍາກັມເພີ້ມຂຶ້ນ

ການ ກໍ່ອາຊຍາກັມ ຮຸນແຮງ ຂຶ້ນ ຢູ່ ນະຄອນຫລວງ ວຽງຈັນ ແລະ ໃນທົ່ວ ສປປລາວ ຄົນຮ້າຍ ໃຊ້ອາວຸດປືນ ປຸ້ນຈີ້ ທຳຮ້າຍ ຮ່າງກາຍ ແລະ ຂ້າຄົນ ຊິງຊັພ ຫລາຍຂື້ນ ຫລາຍກວ່າ ການໃຊ້ມີດ ເຮັດໃຫ້ ຊາວລາວ ເກີດຄວາມ ຢ້ານກົວ. ດັ່ງ ຊາວ ນະຄອນຫລວງ ວຽງຈັນ ຜູ້ນຶ່ງ ເວົ້າວ່າ:

“ກະຜົນກະທົບ ຫລາຍເຕີບ ຫັ່ນແຫລະ ມັນ ກໍຢ້ານ ຖືກໂຕເອງແດ່ ມື້ໃດມັນ ຈະຖືກ ໂຕເອງ ອາວຸດ ສົງຄາມ ບາງເທື່ອ ກະບໍ່ແມ່ນ ປືນແທ້ ເອົາມາຈີ້ກັນ ຫັ່ນນະ.”

ຊາວວຽງຈັນ ຜູ້ນີ້ ເວົ້າອີກວ່າ ກົດໝາຍລາວ ຫ້າມໃຊ້ປືນ ແລະ ຖືປືນ ໂດຍທີ່ ບໍ່ໄດ້ຮັບ ອະນຸຍາດ; ແຕ່ ປັດຈຸບັນ ປະກົດວ່າ ຄົນມີປືນ ແລະ ໃຊ້ປືນກໍ່ ອາຊຍາກັມ ຫລາຍຂື້ນ. ສ່ວນ ເຈົ້າໜ້າທີ່ ປ້ອງກັນ ຄວາມສງົບ ຜູ້ນຶ່ງ ເວົ້າວ່າ ຄົນຮ້າຍ ສ່ວນຫລາຍ ຊື້ປືນ ຈາກ ປະເທດ ເພື່ອນບ້ານ:

“ຢູ່ລາວນີ່ ມັນກໍຫາຊື້ ຍາກ ຊື້ກັນຂັ້ນວ່າ ບ່ອນມີ ມັນກໍ ລັບໆລື້ໆ ທີ່ສຸດ ບາງເທື່ອ ຊື້ມາ ຈາກໄທ ກໍມີ ຊື້ມາຈາກ ວຽດນາມ ກໍມີ ຢູ່ພາຍໃນ ກໍມີ ແຕ່ວ່າບ່ອນ ທີ່ວ່າມັນ ຈຳຫນ່າຍ ໂຕນີ້ ແທ້ໆຫັ່ນ ພວກເຮົາ ກໍບໍ່ທັນ ຈັບໄດ້.”

ເຈົ້າໜ້າທີ່ ທ່ານນີ້ ເວົ້າອີກວ່າ ປັດຈຸບັນ ເຈົ້າໜ້າທີ່ ທີ່ກ່ຽວຂ້ອງ ກຳລັງ ຊອກຄົ້ນຫາ ບ່ອນຂາຍປືນ ເຖື່ອນນັ້ນຢູ່ ແລະ ໄດ້ຂໍໃຫ້ ເຈົ້າໜ້າທີ່ ປະເທດ ເພື່ອນບ້ານ ຕາມ ດ່ານຊາຍແດນ ຕ່າງໆ ໃຫ້ຊ່ວຍ ກວດກາ ຊອກຫາອາວຸດ ເຖື່ອນ ເຄັ່ງຄັດຂື້ນ. ເມື່ອ ປະມານ 2 ເດືອນ ກ່ອນ ກໍມີການ ຍິງກັນຕາຍຢູ່ ກາງຖນົນ ໃນໃຈກາງ ນະຄອນຫລວງ ວຽງຈັນ; ຜູ້ມີປືນ ຂີ່ຣົດໃຫຍ່ ມາແລ້ວ ຍິງໃສ່ ຜູ້ຂີ່ຣົດຈັກ ຕາຍຄາທີ່. ເຈົ້າໜ້າທີ່ ສົງສັຍ ວ່າ ພວກຄ້າ ຢາເສບຕິດ ຂ້າປິດປາກ ກັນເອງ.