ທ່ານ ອານຸພາບ ຕຸນາລົມ ຄະນະເລຂາທິການ ສູນກາງພັກ, ເລຂາທິການພັກ ພັທນານະຄອນຫລວງວຽງຈັນ ໄດ້ຣາຍງານ ວ່າ 5 ປີ ໄດ້ລົບລ້າງ (ຄວາມທຸກຍາກຢູ່) 8 ເມືອງ ໃນນະຄອນຫລວງວຽງຈັນ ໃຫ້ພົ້ນທຸກ.
ເມືອງດັ່ງກ່າວປະກອບມີ:
- ເມືອງຈັນທະບູລີ
- ເມືອງສີໂຄດຕະບອງ
- ເມືອງໄຊເສດຖາ
- ເມືອງສີສັດຕະນາກ
- ເມືອງ ນາຊາຍທອງ
- ເມືອງໄຊທານີ
- ເມືອງຫາດຊາຍຟອງ ແລະ
- ເມືອງສັງທອງ
ແຕ່ ເຫຼືອພຽງ ເມືອງປາກງື່ມ ທີ່ເປັນເມືອງທີ່ຍັງບໍ່ເຖິງຂັ້ນ ຫຼຸດພົ້ນອອກຈາກຄວາມທຸກຍາກ.
ເຈົ້າໜ້າທີ່ກ່ຽວຂ້ອງ ທ່ານນຶ່ງ ທີ່ຂໍສງວນຊື່ ແລະ ຕຳແໜ່ງ ໄດ້ກ່າວໃນວັນທີ 22 ກັນຍາ ນີ້ວ່າ:
"ເຮົາ ໄລ່ ເປັນ ໄລ ຍະ 5 ປີ ຄືນ ຫຼັງ , 5 ປີ ໄປ ໜ້າ ຊິີ້ນ່າ ໂດຍ ການ ວັດ ເຣີ່ມ ຈາກ ຄອບ ຄົວນີ້ ລະວັດ ໄປ ແຕ່ ລະ ບ້ານ ແຕ່ ລະ ບ້ານ. ເຂົາ ໄລ່ GDP ຂອງ ລາຍ ໄດ້ ຫັ້ນ ແຫຼະ ຕໍ່ ຫົວ ຄົນ ນັ້ນ. ໄຟ ຟ້ານີ້ ຖື ວ່າ ບໍ່ ມີ ຜູ້ ໃດ ໄຕ້ ຕະ ກຽງ ແລ້ວດຽວນີ້ ນ່າ ຜູ້ ບໍ່ ມີ ຣົ ຖ ໃຫຍ່ ກໍ ມີ ຣົ ຖ ຈັກ. ປະ ມານ ທ້າຍໆ ປີ ພຸ້ນ ລະ ."
ອີງຕາມຜົລການປະເມີນ, ດຳຣັຖສະບັບເລກທີ 348 ລົງວັນທີ 16 ພຶສຈິກາ 2017 ວ່າ ດ້ວຍມາຕຖານພົ້ນທຸກ ແລະ ມາຕຖານພັທນາ ມາຮອດປັດຈຸບັນ. ໃນນະຄອນຫລວງວຽງຈັນ ມີຄອບຄົວ ພົ້ນທຸກ 150,000 ປາຍ ຄອບຄົວ, ແລະ ບໍ່ບັນລຸ ປະມານ 4,000 ປາຍ ຄອບຄົວ. ມີຄອບຄົວທີ່ພັທນາ ຈຳນວນ 140,000 ປາຍ ຄອບຄົວ ແລະ ຍັງບໍ່ບັນລຸ 16,000 ປາຍ ຄອບຄົວ. ມີບ້ານພົ້ນທຸກ 478 ບ້ານ, ແຕ່ ຍັງບໍ່ບັນລຸ 3 ບ້ານ.
ທຸກຂແນງການທີ່ກ່ຽວຂ້ອງ ໄດ້ລົງເກັບກຳຂໍ້ມູນທຸກເມືອງ ທຸກບ້ານ ຕາມ 8 ເງື່ອນໄຂ ທີ່ທາງການກຳນົດໃຫ້ເປັນບ້ານພົ້ນທຸກນັ້ນ ຄື ມີການເຂົ້າເຖິງໂຮງຮຽນປະຖົມ ໂຮງຮຽນມັທຍົມຕອນຕົ້ນ, ມີການເຂົ້າເຖິງສຸຂສາລາ ການບໍຣິການສຸຂພາບ ຂັ້ນພື້ນຖານ, ມີແຫຼ່ງນ້ຳສະອາດ, ມີເສັ້ນທາງຄົມມະນາຄົມ ທີ່ສາມາດທຽວໄດ້ຕລອດປີ, ມີການເຂົ້າເຖິງການບໍຣິການ ດ້ານໂທລະຄົມມະນາຄົມ ແລະການຂົນສົ່ງ, ມີການເຂົ້າເຖິງການຊື້ຂາຍ ແລະ ແລກປ່ຽນສິນຄ້າ ຫຼືຕລາດ, ມີຕະຂ່າຍໄຟຟ້າໃນລະບົບ, ມີຄອບຄົວພົ້ນທຸກໃນອັດຕຣາ 70 ເປີເຊັນ ຂຶ້ນໄປ ຂອງຄອບຄົວ ທັງໝົດພາຍໃນບ້ານ.
ເຈົ້າໜ້າທີ່ກ່ຽວຂ້ອງ ທ່ານດັ່ງກ່າວ ໄດ້ກ່າວຕື່ມວ່າ:
" ມາ ເບິ່ງ ແທ້ ຈິງ ມັນ ພຸ້ນ ແຫຼະ ເນາະ ແຕ່ ວ່າ ໃນ ນັ້ນ ຫັ້ນ ກວດ ແທ້ ກໍ ຍັງ ມີ ຢູ່ ບໍ່ ທັນໝົດ ດອກ ຈຸດ ດີ ກໍ ຄື ວ່າ ນຶ່ງ ແມ່ນ ນັກ ລົງ ທຶນ ເຂົາ ກໍ ສຸມ ໃສ່ ເຂົາ ກໍ ສຸມ ໃສ່ ຫຼາຍ ໂຮງ ຈັກ ໂຮງ ງານ ມາ ໃຫ້ ປະ ຊາ ຊົນມີ ວຽກ ເຮັດ ງານ ທຳ ເດ້ ໃຫ້ ປະ ຊາ ຊົນ ມີ ລາຍ ຮັບ ສ່ວນ ຫຼາຍ ຢູ່ ບ້ານເຮົາ ອອກ ໄປ ເຮັດ ວຽກ ຢູ່ ຕ່າງ ປະ ເທດ ຫຼາຍ ໄປ ເຮັດ ຢູ່ ພຸ້ນຄັນ ຜູ້ ໃດ ບໍ່ ຕັ້ງ ໃຈ ກະ ທຸກ ມາ ຫັ້ນ ແຫຼະ ."
ແຕ່ ໃນສ່ວນຂອງປະຊາຊົນເຫັນວ່າ ການປະກາດປະຊາຊົນພົ້ນທຸກ ຢູ່ນະຄອນຫລວງວຽງຈັນ ຍັງບໍ່ສອດຄ່ອງ ແລະ ຍັງບໍ່ເໝາະສົມ.
ປະຊາຊົນ ຢູ່ເມືອງສີໂຄດຕະບອງ ໄດ້ກ່າວວ່າ:
"ອີງ ຕາມ ຊີ ວິດ ການ ເປັນ ຢູ່ ແບບນີ້ ເຮົາ ວ່າ ຍັງ ບໍ່ ທັນ ສອດ ຄ່ອງ ເທື່ອ ນ່າ ມັນ ຍັງ ຢູ່ ຫ່າງ ໄກ ຈາກ ຄຳ ວ່າ ພົ້ນ ທຸກ ກຸ່ມ ຄົນ ທີ່ ອາ ສັຍ ຢູ່ໃນ ນະ ຄອນ ຫລວງວຽງ ຈັນ ມັນ ມີ ຫຼາຍ ຊົນ ຊັ້ນ ມີ ທັງ ຜູ້ ມີ ວຽກ ເຮັດ ງານ ທຳ ແບບ ໝັ້ນ ຄົງ ທັງ ແບບ ຜູ້ ຫາ ກິນ ແບບ ໄປ ວັນ ໆ ພໍ ໄດ້ ກຸ້ມມື້ ໄປ ກະ ມີ ຫັ້ນ ນ່າ ການ ເປັນ ຢູ່ ຂອງ ປະ ຊາ ຊົນ ສະ ພາບ ຂອງ ທາງ ດ້ານ ການ ເງິນ ເຮົາ ມາ ສົມ ທຽບ ໃສ່ ປັດຈຸ ບັນ ກຳ ລັງ ຊື້ ຂອງ ເຮົາ ຫຼຸດ ລົງ ຢູ່ ຫັ້ນ ເນາະ ."
ຢູ່ເມືອງປາກງື່ມ ປະຊາຊົນ ກໍຍັງບໍ່ສາມາດເຂົ້າເຖິງແຫຼ່ງນ້ຳສະອາດ ແລະ ຫຼາຍຄອບຄົວ ຍັງໃຊ້ນ້ຳບາດານຢູ່.
ປະຊາຊົນເມືອງປາກງື່ມ ໄດ້ກ່າວວ່າ:
"ອັນ ເຂດ ປາກ ງື່ມ ນ້ຳ ສະ ອາດ ກໍ ຍັງ ບໍ່ ທັນ ໄດ້ ທົ່ວ ເຖິງ ກະ ນອກ ເມືອງ ກໍ ຍັງ ບໍ່ ທັນ ມີ ນ້ຳ ປະ ປາ ນ່າ ມີ ແຕ່ ນ້ຳ ບາ ດານ ແຫຼະ ສ່ວນ ຫຼາຍ ໃຊ້ ນ້ຳ ບາ ດານ ທາງ ດ້ານ ເສ ຖ ກິ ຈ ຊອກ ຢູ່ ຫາ ກິນນີ້ ແຫຼະ ກະ ຍັງ ບໍ່ ທັນ ໄດ້ ເສັ້ນ ທາງ ກະ ຖື ວ່າ ໄປ ມາ ສະ ດວກ ບາງ ບ້ານ ກໍ ຍັງ ຝືດ ເຄືອງ ຢູ່ ."
ຢູ່ເມືອງຫາດຊາຍຟອງ ປະຊາຊົນ ກໍເຂົ້າເຖິງຣະບົບນ້ຳສະອາດ ແຕ່ກໍຍັງມີບາງຄອບຄົວ ຍັງທຸກຍາກຢູ່. ປະຊາຊົນ ຢູ່ ເມືອງຫາດຊາຍຟອງ ໄດ້ກ່າວວ່າ:
" ໂຕ ຈິງ ມັນ ເປັນ ແນວ ນັ້ນ ນ້ຳ ສະ ອາດ ອັນ ໃດ ກໍ ເຂົ້າ ເຖິງ ໝົດ ແລ້ວ ແຕ່ ມັນ ກໍ ຍັງ ມີ ບາງ ຄອບ ຄົວ ຍັງ ຂາດ ເຂີນ ຢູ່ ກະ ເວົ້າ ຮ້ອຍ ມັນ ກໍ ຮ້ອຍບໍ່ ໄດ້ ຊິບໍ່ ມີ ຜູ້ ທຸກ ຜູ້ ຍາກ ມັນ ເປັນ ໄປ ບໍ່ ໄດ້ ດອກ ມັນ ຍັງ ມີ ຢູ່ ."
ທ່ານ ທອງສະລິດ ມັງໜໍ່ເມກ ຫົວໜ້າຫ້ອງການສູນກາງພັກ ຣາຍງານແຕ່ວັນທີ 14-15 ກັນຍາ 2022 ວ່າ ແຕ່ ປີ 2016-2021 ທາງການລາວ ສາມາດລົບລ້າງຄວາມທຸກຍາກ ເກືອບ 14,000 ຄອບຄອບ ຈາກຈຳນວນ 76,000 ຄອບຄົວ ໃນທົ່ວປະເທດ ລົບລ້າງບ້ານທຸກຍາກໄດ້ 260 ປາຍບ້ານ ຈາກຈຳນວນເກືອບ 1,700 ບ້ານ.