ຜູ້ປົກຄອງ ນັກຮຽນ-ນັກສຶກສາ ຈຳນວນຫລາຍຮູ້ສຶກກັງວົນໃຈ ທີ່ຢາເສບຕິດຮູບແບບໃໝ່ ຕາມສະຖານທີ່ບັນເທິງ ກຳລັງຣະບາດໃນສັງຄົມລາວ ເຊັ່ນ ປຸມເປົ້າອັດແກ໊ສ, ຢາສູບແບບແທ່ງ, ນ້ຳໃບກະທ້ອມ, ບາລາກຸ ຫລື ຊີ່ຊ່າ, ຢາສູບໄຟຟ້າ ຫລື ກາເຟ.
ຢູ່ເຂດນ້ຳພຸ ເມືອງຈັນທະບູຣີ ນະຄອນຫລວງວຽງຈັນ ຢູ່ຕາມສະຖານທີ່ບັນເທິງ ມີປຸມເປົ້າອັດແກ໊ສ ໄນຕຣັສ ອ໊ອກໄຊດ໌ (Nitrous oxide) ໜ່ວຍໃຫຍ່ ແລະ ໜາ ຢູ່ໜ້າໂຕະໃຜ ໜ້າໂຕະມັນ ເຖິງແມ່ນວ່າ ເຈົ້າໜ້າທີ່ລົງໄປກວດກາແລ້ວ ທາງຜູ້ປະກອບການ ສະຖານທີ່ບັນເທິງ ກໍຍັງລັກຂາຍປຸມເປົ້າອັດແກ໊ສ ອີກທັງເປັນສານເສບຕິດ ທີ່ເຮັດໃຫ້ເບື່ອເມົາສະມອງ ຖ້າສູບ ແລະ ດົມປຸມເປົ້າອັດແກ໊ສເກີນຂນາດ, ຂະນະທີ່ ແຕ່ດົນມາແລ້ວນັ້ນ ສານເຄມີ Nitrous oxide ເປັນສານທີ່ໃຊ້ ເພຶ່ອທາງການແພດ ແຕ່ປັດຈຸບັນ ສານນີ້ ໄດ້ຖືກນຳມາໃຊ້ເປັນສານເສບຕິດ ເປັນສິ່ງທີ່ຜິດກົດໝາຍ ແລະສົ່ງຜົລກະທົບຕໍ່ສຸຂພາບ ຜູ້ໃຊ້ສານນີ້ແລ້ວ.
ຕາມຄຳເວົ້າຜູ້ປົກຄອງທ່ານນຶ່ງ ທີ່ເຮັດວຽກດ້ານສາທາຣະນະສຸຂ ແລະ ມີຄວາມເປັນຫ່ວງລູກ-ຫລານ ຈະຕົກເປັນທາດຂອງຢາເສບຕິດ ຢູ່ເຂດນ້ຳພຸ ເມືອງຈັນທະບູຣີ ນະຄອນຫລວງວຽງຈັນ ທີ່ກ່າວຕໍ່ວິທະຍຸ ເອເຊັຽເສຣີ ໃນວັນທີ 30 ສິງຫາ ທີ່ຜ່ານມານີ້ວ່າ:
"ປຸມເປົ້າອັນນີ້ນີ້ ມັນບໍ່ແມ່ນປຸມເປົ້າທີ່ບາງໆ ທີ່ເຂົາເຮັດຫລືແຂວນຢູ່ນຳວັນເກີດ ມັນເປັນປຸມເປົ້າ ຂະໜາດໜາ ໜວ່ຍໃຫຍ່ເນາະ. ໂອ້ ເປັນຫ່ວງເດ້ ພວກ Nitrous oxide ນີ້ ມັນເກີດມາດົນແລ້ວເນາະ ສມັຍກ່ອນຫັ້ນລະແມ່ນ ເພິ່ນເອົາໄປແບບໃຊ້ ຢູ່ໃນຜ່າຕັດເນາະ ໃຫ້ຄົນສລົບ ແຕ່ວ່າ ຢູ່ໃນປັດຈຸບັນນີ້ ເຂົາພັດເອົາມາເຮັດ ແນວເປັນປະເພດຢາເສບຕິດ ຫັ້ນແຫລະ ເພາະວ່າ ມັນເຮັດດົມ ກາຍຂະໜາດຂອງມັນຫັ້ນນ່າ. ແລ້ວມັນກໍໄປເບື່ອເມົາສມອງເນາະ ເຮັດໃຫ້ບໍ່ຮູ້ເຣຶ່ອງອີ່ຫຍັງທັງໝົດ ເຮັດໃຫ້ເຫັນພາບຫລອນ ອີ່ຫຍັງຕ່າງໆ."
ຢູ່ທົ່ວນະຄອນຫລວງວຽງຈັນ ທີ່ມີສະຖານທີ່ບັນເທິງ ຈະມີປຸມເປົ້າອັດແກ໊ສ ໄນຕຣັສ ອ໊ອກໄຊດ໌ (Nitrous oxide) ເຊິ່ງເປັນສານເສບຕິດ ປະເພດໃໝ່ ມາປະກົດໃຫ້ເຫັນໃນໄລຍະນຶ່ງປີທິ່ຜ່ານມາ ແລະ ໃນຖານະຜູ້ປົກຄອງ ກໍຮູ້ສຶກເປັນຫວ່ງ ຫາກຜູ້ໃດ ໃຊ້ປຸມເປົ້າອັດແກ໊ສ ໄນຕຣັສ ອ໊ອກໄຊດ໌ (Nitrous oxide) ເກີນຂະໜາດ ຈະເຮັດໃຫ້ເກີດອັນຕລາຍຕໍ່ຊີວິຕ ເນຶ່ອງຈາກ ເຫັນກໍຣະນີຕົວຢ່າງມາແລ້ວ ອີກທັງ ສະພາບໂຕຈິງ ນຳຮ້ານອາຫານ ຮ້ານກິນດື່ມ ບາງບ່ອນ ຈະຫລີກເວັ້ນສາຍຕາ ຂອງເຈົ້າໜ້າທີ່ຈະຈັດຫ້ອງລັບພິເສດ ເພື່ອສູບດົມ ປຸມເປົ້າອັດແກ໊ສ ສະເພາະ.
ດັ່ງຜູ້ປົກຄອງ ຢູ່ບ້ານຊຽງຢືນ ເມືອງຈັນທະບູຣີ ນະຄອນຫລວງວຽງຈັນ ກ່າວໃນມື້ດຽວກັນນີ້ວ່າ:
“ຄືວ່າ ຢູ່ນະຄອນຫລວງເຮົານີ້ ມີຫລາຍ ໂດຍສະເພາະແມ່ນໝາກປຸມເປົ້ານີ້ແຫລະ. ກໍເປັນຫ່ວງຫັ້ນແຫລະ ກໍຄື ເຮົາເຫັນເຫດການທີ່ວ່າເພິ່ນສູບ ຕອນທີ່ຣົຖໄປ ວູບໄປ ກໍໄປເຂົ້າເຮືອນປະຊາຊົນ ຈົນເສັຽຊີວິຕຄາທີ່ເນາະ. ໂຕນີ້ນີ້ ເວລາເຮົາສູບເຂົ້າໄປປຸ້ບ ແລ້ວມັນຈະໄປຄວບຄຸມ ເຣຶ່ອງຣະບົບປະສາດ ເຮັດໃຫ້ເຮົາຕຶບ ປະມານ 4-5 ວິ ແລ້ວກໍຄືນມາ ເປັນຄວາມມ່ວນຊື່ນ. ຄືນຳຮ້ານອາຫານບໍ່ມີຫຍັງນີ້ ເຂົາຈະບໍ່ໂຊຢູ່ໜ້າຮ້ານ ມີຫ້ອງພິເສດ ຫລີກເວັ້ນຕາເຈົ້າໜ້າທີ່ເຮົາ.”
ນອກຈາກນີ້ນໍ້າໃບກະທ້ອມ ຍັງມີການຊື້-ຂາຍ ຢູ່ໃນຊື່ສັງຄົມອ່ອນລາຍແບບງ່າຍ ຈຶ່ງເປັນຫ່ວງວ່າ ເຍົາວະຊົນ ທີ່ຫັນມາລອງດື່ມນໍ້າໃບກະທ່ອມ ຈະເສັຽທັງການຮຽນ ແລະສຸຂພາບ ເນຶ່ອງຈາກ ມັນເປັນສານເສບຕິດທີ່ຜິດກົດໝາຍ ອີກທັງຜູ້ປົກຄອງຈຳນວນນຶ່ງ ກໍບໍ່ໄດ້ໃຫ້ຄວາມເອົາໃຈໄສ່ ຕັກເຕືອນລູກ-ຫລານ ແລະ ບາງເທຶ່ອ ຜູ້ປົກຄອງ ຫລື ຜູ້ໃຫຍ່ ກໍບໍ່ເປັນຕົວຢ່າງໃຫ້ລູກ-ຫລານ ຕົ້ມນໍ້າໃບກະທ້ອມ ດື່ມນຳລູກ-ຫລານເລີຍ.
ດັ່ງຜູ້ປົກຄອງ ຢູ່ນະຄອນຫລວງວຽງຈັນ ກ່າວໃນມື້ດຽວກັນນີ້ວ່າ:
“ຢູ່ຕາມອິນເຕິເນັດ ຄືແບບໂພສຕ໌ຂາຍ ຄືແບບວ່າ ຂາຍເສື້ອຜ້າທັມມະດາເລີຍຫັ້ນນ່າ. ມັນກໍເປັນໜ້າເປັນຫ່ວງໄດ່ ເພາະວ່າກິນແລ້ວ ມັນກໍເປັນສານເສບຕິດ ເຮັດໃຫ້ເຮົາຕິດ ລະກໍເຮັດໃຫ້ເຫງົານອນ ຄືແບບເອົາເປັນເອົາຕາຍເລີຍນ່າ ແລ້ວແບບວ່າ ບາງທີ່ ມັນກໍເສັຽການຮຽນ ທັງເສັຽສຸຂພາບ ຫັ້ນນ່າ. ພໍ່ແມ່ ກໍບໍ່ເຫັນຕັກເຕືອນ ບາງເທຶ່ອ ຜູ້ໃຫຍ່ເອງ ກໍເຮັດຄືກັນ. ບໍ່ຮູ້ວ່າ ມັນເປັນສິ່ງທີ່ຜິດກົດໝາຍ ຄິດວ່າ ມັນເຕືອນ ລະບໍ່ຟັງຫັ້ນນ່າ ກະເລີຍປ່ອຍປະລະເລີຍໄປເລີຍ.”
ດ້ານຜູ້ທີ່ຮູ້ ກ່ຽວກັບເຣຶ່ອງຢາເສບຕິດ ຢູ່ນະຄອນຫລວງວຽງຈັນ ກ່າວວ່າ ປັດຈຸບັນ ມີຢາສູບປະເພດໃໝ່ ຄື ຢາສູບແບບແທ່ງ ເປັນແບບສູບ ແລະ ດົມ ໂດຍບໍ່ຕ້ອງອາສັຍ ອຸປກອນສູບຢາຫລາຍຢ່າງ ຄື ຢາບສູບໄຟຟ້າ ພຽງແຕ່ແກະຫົວແລ້ວສູບ ຫລື ດົມໄດ້ເລີຍ ຄື ຍີ່ຫໍ້ VIPO BAR ( ວີໂພ ບາຣ໌)ແລະ PILOT (ພ່າຍລອດ) ເຊິ່ງຢາສູບ ແລະ ດົມ ປະເພດໃໝ່ນີ້ ຈະເປັນທີ່ນິຍົມ ຢູ່ໃນກຸ່ມທີ່ນັກທ່ອງທ່ຽວງານປາຕີ່ ແລະ ນິຍົມໃນກຸ່ມແມ່ຍິງ. ເອົາມາຂາຍຫລາຍເທົ່າໃດ ກໍຂາຍໝົດ ໂດຍສະເພາະຮຸ່ນສູບ ແລະ ດົມ ໄດ້ 500 ຄຳ ເນຶ່ອງຈາກ ຢາສູບແບບແທ່ງ ປະເພດໃໝ່ ຈະສູບ ແລະ ດົມ ອອກກິ່ນຫອມ ຄືໝາກໂມ, ໝາກໄມ້ລວມ, ກາເຟ-ຄາລາເມລ, ໜາກໜາວ ແລະ ກຸຫລາບ-ອະງຸ່ນ ຜູ້ປົກຄອງບໍ່ສາມາດຈັບໄດ້ ວ່າໄປສູບຢາເສບຕິດມາ ແລະ ບໍ່ເຮັດມີອາການແຄ້ນກິ່ນ ລະຫວ່າງສູບ ຄືຢາສູບໄຟຟ້າ.
"500 ເທຶ່ອສູບນີ້ນ່າ ຄົນໂຄດນິຍົມເລີຍ. ມັນສາມາດດູດແບບ ຄ້າຍຄືແບບເຮົາດູດເຄເຂົ້າດັງ ຫັ້ນນ່າ. ບາດໂຕເຕື່ມຢາຫັ້ນນ່າ ມັນຕ້ອງໃຊ້ອຸປກອນຫລາຍຢ່າງ ຕ້ອງມີຝ່ອຍ ມີຖ່ານ ມີສຳລີ ມີຫົວຫຍັງຫັ້ນນ່າ, ແມ່ຍິງສາຍປາຕີ້ ເຂົາຈະມັກສູບຮຸ້ນນີ້ນ່າ ຜູ້ຍິງນ່າ. ໂຕ PILOT ນີ້ ໂຄດນິຍົມ ເອົາມາປານໃດ ກະຈັກເທົ່າໃດ ສັ່ງມາເປັນຮ້ອຍກໍໝົດ. ມັນຈະອອກຫອມໆຫັ້ນນ່າ ສູບແບບນີ້ ມັນບໍ່ໄດ້ແຄ້ນແບບບຸຣີໄຟຟ້າອີ່ຫຍັງ. ແມ່ຈັບບໍ່ໄດ້ ມີຄວາມມວ່ນ ໃຫ້ເມົາກໍນິດໆ."
ເທົ່າທີ່ສັງເກດ ຢາເສບຕິດ ປະເພດບາລາກຸ ຫລື ຊີ່ຊ່າ ຍັງເປັນທີ່ຕ້ອງການ ຂອງຄົນລາວ ໃນສມັຍນີ້ ຈຶ່ງເຮັດໃຫ້ແມ່ຄ້າ-ພໍ່ຄ້າ ຂາຍເຄື່ອງ ອອນລ່າຍ ເອົາອຸປະກອນ ບາລາກຸ ມາຂາຍ ຫລາຍກວ່າ ອຸປະກອນສູບໄຟຟ້າ.
ດັ່ງແມ່ຄ້າຂາຍນໍ້າຢາ ບາລາກຸ ຢູ່ແຂວງຫລວງພຣະບາງ ກ່າວໃນມື້ດຽວກັນນີ້ວ່າ:
“ດຽວນີ້ ເຂົາມັກສູບ ໂຕເປັນແບບປ່ຽນຫົວໄດ້ ບາລາກຸ ແຕ່ກີ້ ເຂົາມັກສູບຢາສູບໄຟຟ້າ ແຕ່ດຽວນີ້ ເຂົາບໍ່ສູບແລ້ວ ເຂົານິຍົມໃຊ້ແບບນີ້ແລ້ວ ເຂົາເຈົ້າສູບ ກໍເລີຍເອົາມາຂາຍ ເພາະວ່າດຽວນີ້ ເຂົາຂາຍແຕ່ແບບນີ້ ແລ້ວກະ ແບບເກົ່າ ກໍບໍ່ມີແລ້ວ.”
ທຳອິດ ອາຍແກ້ສ ໄນຕຣັສ ອ໊ອກໄຊດ໌ (Nitrous oxide) ເປັນສານປະກອບທາງເຄມີ ແລ້ວຖືກບັນຈຸ ໃນໝາກປຸມເປົ້ານັ້ນ ບໍ່ໄດ້ຖືກລະບຸວ່າ ເປັນສານເສບຕິດ ໃນກົດໝາຍລາວ. ທາງຜະແນກກວດກາ ແລະ ຄຸມຢາເສບຕິດ ນະຄອນຫລວງວຽງຈັນ ຈຶ່ງໄດ້ສເນິຫາຣັຖບານ ແລ້ວ ທາງສະພາແຫ່ງຊາຕ ກໍຮັບຮອງໃຫ້ສານເຄມີ ໄນຕຣັສ ອ໊ອກໄຊດ໌ (Nitrous oxide) ເປັນສານເສບຕິດ ໃນປະມານເດືອນກັນຍາ 2021 ພາຍຫລັງ ທີ່ເຈົ້າໜ້າທີ່ຕຳຣວດ ນະຄອນຫລວງວຽງຈັນ ໄດ້ກວດພົບປຸມເປົ້າ ສຳລັບອັດແກ້ສ 31
ໜ່ວຍ ແລະ ບັ້ງແກ້ສ ທີ່ບັນຈຸສານ ໄນຕຣັສ ອ໊ອກໄຊດ໌ (Nitrous oxide) 2 ບັ້ງໃຫຍ່ ຢູ່ຮ້ານບັນເທິງ ໃນນະຄອນຫລວງວຽງຈັນ ໃນວັນທີ 30 ມົກກະຣາ, ວັນທີ 21 ທັນວາ 2020 ແລະ ວັນທີ 26 ມົກກະຣາ 2021.
ດັ່ງເຈົ້າໜ້າທີ່ ປ້ອງກັນຄວາມສງົບ ທ່ານນຶ່ງ ທີ່ຮູ້ກ່ຽວກັບບັນຫາດັ່ງກ່າວ ກ່າວໃນມື້ດຽວກັນນັ້ນວ່າ:
“ທີ່ຈິງ ຢູ່ໃນແຜນວາຣະແຫ່ງຊາດ ກໍໄດ້ກຳນົດເຂົ້າໃນການແກ້ໄຂຢູ່ແລ້ວ ແລ້ວກໍກົດໝາຍ ເພິ່ນໄດ້ກຳໜົດແລ້ວ, ເຮົາໄປຄົ້ນເອົາ ແລ້ວເອົາວິຈັຍເບິ່ງວ່າ ມັນເປັນໂຕໃດ ແນວໃດ. ພາຍຫລັງໄດ້ວິຈັຍແລ້ວ ກໍໄດ້ນຳສເນິ ທາງຣັຖບານ ແລ້ວເພິ່ນໄດ້ກຳນົດຜ່ານສະພາ ແລ້ວເພິ່ນໄດ້ເອົາເຂົ້າແລ້ວ.”
ທ່ານກ່າວຕື່ມວ່າ ສ່ວນການແກ້ໄຂບັນຫາ ໝາກປຸມເປົ້າອັດແກ໊ສ ໄນຕຣັສ ອ໊ອກໄຊດ໌ (Nitrous oxide) ແມ່ນເປັນວຽກງານ ຂອງຕຳຣວດປາບປາມຢາເສບຕິດ ແລະ ໃຫ້ລໍຖ້າໜ່ວຍວິຊາສະເພາະ ອອກບົດແນະນຳ ຫລືນິຕິກັມ ທີ່ ຈະປາບປາມ ໝາກປຸມເປົ້າອັດແກ້ສ ໄນຕຣັສ ອ໊ອກໄຊດ໌ (Nitrous oxide) ເປັນອັນດັບຕໍ່ໄປ.
ປັດຈຸບັນ ປກສ ເມືອງຈັນທະບູຣີ ກໍຍັງກວດກາຕາມສະຖານທີ່ບັນເທິງ ພາຍໃນເມືອງ, ພາຍຫລັງ ເຈົ້າໜ້າທີ່ຕຳຣວດ ນະຄອນຫລວງວຽງຈັນ ພົບເຫັນ ປຸມເປົ້າອັດແກ໊ສ, ບັ້ງສູບໄຟຟ້າ, ນໍ້າຢາຢາສູບ ແລະ ບາລາກຸ ຫາກພົບຮ້ານໃດ ຍັງສືບຕໍ່ຊື້-ຂາຍ ສານເສບຕິດດັ່ງກ່າວ ກໍຈະມີການແກ້ໄຂ ຕາມມາຕການຕໍ່ໄປ.
ດັ່ງເຈົ້າໜ້າທີ່ ປກສ ເມືອງຈັນທະບູຣີ ຜູ້ຂໍສງວນຊື່ ແລະ ຕຳແນ່ງ ໃນນະຄອນຫລວງວຽງຈັນ ກ່າວໃນມື້ດຽວກັນນີ້ວ່າ:
“ດຽວນີ້ແທ້ ໄທຂ້ອຍກໍພວມກວດກາຢູ່ເດິ້. ກວດກາຢູ່ ເພາະວ່າ ໂຕນີ້ ມັນກໍມີມາຕການແລ້ວເນາະ ໃນການຈັດຕັງປະຕິບັດນີ້. ຖ້າວ່າໝ່ອງໃດມີແທ້ ໄທຂ້ອຍກໍແກ້ ເດິ້.”
ທ່ານພົລເອກ ວິໄລ ຫລ້າຄຳຟອງ ຮອງນາຍຍົກຣັຖມົນຕຣີ ແລະ ຣັຖມົນຕຣີປ້ອງກັນຄວາມສງົບ ໄດ້ກ່າວໃນກອງປະຊຸມແຫ່ງຊາຕລາວ ສມັຍສາມັນເທຶ່ອທີ 3 ຂອງສະພາແຫ່ງຊາຕ ເທຶ່ອທີ 9 ເມຶ່ອບໍ່ດົນທີ່ຜ່ານມາວ່າ ເຈົ້າໜ້າທີ່ ປກສ ພວມເລັ່ງຄົ້ນຄວ້າ ແກ້ໄຂບັນຫາຢາເສບຕິດຮູບແບບໃໝ່ ຕາມສະຖານທີ່ບັນເທິງ ເຊັ່ນ ປຸມເປົ້າ, ກາເຟ ແລະ ຜລິຕພັນແນວດົມ ເຖິງແມ່ນວ່າ ຈະຄວບຄຸມຢາເສບຕິດ ຕາມສະຖານທີ່ບັນເທິງຍາກກໍຕາມ.
ດັ່ງ ທ່ານກ່າວວ່າ:
“ມັນກໍມີຫລາຍຊນິດ ເປັນ ເລ້ຫລ່ຽມ ຂອງເຂົາເຈົ້າ. ເຮັດເປັນກາເຟ ກໍມີ ເປັນໝາກປຸມເປົ້າ ກໍມີ ເຮັດເປັນແນວດົມ ກໍມີ ແນວໃດກໍມີ ສ່ວນຫລາຍລະແມ່ນ ສະຖານທີ່ບັນເທິງ. ບັນເທິງນີ້ ກໍຄຸມຍາກຄືກັນ ຈັກເຂົາເອົາມາແຕ່ໃສ ມາກິນຫັ້ນ ແຕ່ວ່າຢູ່ຫັ້ນ ພັດມີມົ້ວສຸມທຸກປະເພດ ຢູ່ຫັ້ນ. ໜ້າທີ່ຂອງພວກເຮົານີ້ ໄປກວດກາ ໄປຄວບຄຸມ ໄຢຕິດຕາມ ມີແລ້ວ ພວກເຮົາແກ້ ເຫັນແລ້ວ ກໍປະຕິບັດ ຕາມລະບຽບຫລັກການ. ມີແທ້ ພວກເຮົາກຳລັງຄົ້ນຄວ້າຢູ່ ຍັງກວດກາຢູ່ເນາະ.”
ນອກຈາກນີ້ ທ່ານພົລເອກ ວິໄລ ຫລ້າຄຳຟອງ ຍັງໄດ້ມີຄຳເຫັນ ກ່ຽວກັບການຕ້ານຢາເສບຕິດ ເນຶ່ອງໃນວັນສາກົນ ຕ້ານຢາເສບຕິດ ຄົບຮອບ 35 ປີ ເມຶ່ອວັນທີ 26 ມິຖຸນາ 2022 ທີ່ຜ່ານມາ ເຊິ່ງໄດ້ຣະບຸຕອນນຶ່ງວ່າ ເພຶ່ອຮັບປະກັນວຽກງານຄວບຄຸມ, ສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍສະເພາະ ແຜນດຳເນີນງານ ວາຣະແຫ່ງຊາຕ ວ່າດ້ວຍການແກ້ໄຂບັນຫາ ຢາເສບຕິດ ແຕ່ປີ 2021-2023 ໃຫ້ບັນລຸຕາມຄາດໝາຍນັ້ນ ຕ້ອງໄດ້ຖືເອົາການແກ້ໄຂ ບັນຫາຢາເສບຕິດ ໃຫ້ກາຍເປັນຄວາມຮັບຜິດຊອບ ຂອງທົ່ວສັງຄົມ. ສະບາຍດີ.