ໃຫ້ປ້ອງກັນສັດລ້ຽງ ຈາກ ອາກາດຫນາວ

ຜແນກ ສັດລ້ຽງ ທີ່ ແຂວງຫົວພັນ ໄດ້ ອອກປະກາດ ເຕືອນ ຜູ້ລ້ຽງສັດ ໃຫ້ ຮັກສາ ສັດລ້ຽງ ຂອງຕົນ ໂດຍສະເພາະ ງົວຄວາຍ ຈາກ ສະພາບ ອາກາດ ຫນາວ ໃຫ້ຈັດຫາ ບ່ອນ ອົບອຸ່ນ ໃຫ້ ສັດລ້ຽງ ໃນຍາມ ຝົນຕົກ ລິນ ຫລາຍມື້ ອາຈເຮັດໃຫ້ ສັດລ້ຽງ ລົ້ມຕາຍ ໄດ້.

ແຂວງຫົວພັນ ໄດ້ມີ ບົດຮຽນ ມາແລ້ວໃນປີ 2009- 2010 ທີ່ ມີສັດລ້ຽງ ງົວ ຄວາຍ ຕາຍ ເປັນຈຳນວນ ຫລວງຫລາຍ ຍ້ອນ ອາກາດ ຫນາວຈັດ ໃນປີ ນັ້ນ. ດັ່ງ ເຈົ້າຫນ້າທີ່ ສັດລ້ຽງ ທ່ານນຶ່ງ ເວົ້າວ່າ:

"ໂຕນີ້ ເຮົາອອກ ແຈ້ງການ ໃຫ້ແຕ່ລະ ເມືອງ ໃຫ້ ປະຊາຊົນ ເອົາສັດ ເອົາຫຍັງ ມາແລ່ງ ຢູ່ ຄອກ ຢູ່ຫຍັງ ຂອງມັນ ຕ້ອງມີບ່ອນ ໃຫ້ມັນຊົ້ນ ຝົນ ເສັຽກ່ອນ ຍາມ ຝົນລິນ ໃຫ້ມັນ ຢູ່ຮົ່ມ ເຮົາມີ ບົດຮຽນ ຕອນປີ 2009-2010 ມາແລ້ວ".

ທ່ານກ່າວ ຕໍ່ໄປວ່າ ໃນປີ 2009 ຫາ 2010 ມີ ງົວ ຄວາຍ ຕາຍຍ້ອນ ອາກາດ ຫນາວ ໃນທົ່ວ ແຂວງ ປະມານ 1 ພັນ ກວ່າ ໂຕ ເຮັດໃຫ້ ປະຊາຊົນ ເດືອດຮ້ອນ ເພາະ ຂາດລາຍໄດ້ ຈາກ ການ ຂາຍສັດ. ທ່ານວ່າ ປັດຈຸບັນ ງົວ ຄວາຍ ໃນ ແຂວງ ຫົວພັນ ມີຢູ່ ປະມານ 1 ແສນ ກວ່າໂຕ ແລະ ໄດ້ຫລຸດລົງ ຢ່າງຕໍ່ເນຶ່ອງ ຍ້ອນວ່າ ຊາວນາ ໃຊ້ເຄຶ່ອງຈັກ ໃນ ການເຮັດນາ ຫລາຍຂຶ້ນ. ສ່ວນສັດ ທີ່ຍັງເຫລືອ ຢູ່ ກຸ່ມຜູ້ລ້ຽງ ສັດ ກໍໄດ້ລ້ຽງ ແບບ ດັ້ງເດີມ ຕາມເຄີຍ ປ່ອຍ ໃຫ້ ຫາກິນ ຕາມ ທັມມະຊາດ ດັ່ງນັ້ນ ທາງການ ຈຶ່ງຢາກ ຕັກເຕືອນ ໃຫ້ມີການ ເຝົ້່າຣະວັງ ສັດລ້ຽງ ຂອງຕົນ ໃຫ້ ຫລາຍ ຂຶ້ນ.