ງົດຈັດງານບຸນອອກພັນສາ ປ້ອງກັນໂຄວິດ-19

ທາງການລາວໄດ້ອອກແຈ້ງການ ໃນມື້ວັນທີ 20 ຕຸລາ 2021 ບໍ່ໃຫ້ປະຊາຊົນ ທີ່ຢູ່ໃນເຂດພື້ນທີ່ສີແດງ ຊຶ່ງມີການຣະບາດ ຂອງເຊື້ອໂຄວິດ-19 ຈັດງານບຸນອອກພັນສາເດັດຂາດ ເພື່ອປ້ອງກັນບໍ່ໃຫ້ ເຊື້ອຣະບາດອອກໄປໃນຊຸມຊົນຕື່ມ, ສ່ວນເຂດບ້ານສີຂຽວ ຫຼືບ້ານທີ່ບໍ່ມີຄົນຕິດໂຄວິດ-19 ໃຫ້ຈັດໄດ້ ແຕ່ຕ້ອງເຮັດພໍເປັນພິທີ ຕາມຮີດຄອງປະເພນີເທົ່ານັ້ນ ແລະຕ້ອງປະຕິບັດຕາມ ມາຕການປ້ອງກັນໂຄວິດ-19, ບໍ່ໃຫ້ມີ ການເຕົ້າໂຮມຄົນຫຼາຍ, ຮັກສາໄລຍະຫ່າງ, ໃຊ້ເຈວລ້າງມື, ໃສ່ຜ້າອັດປາກອັດດັງ ດັ່ງເຈົ້າໜ້າທີ່ ທີ່ກ່ຽວ ຂ້ອງ ຢູ່ນະຄອນຫຼວງວຽງຈັນ ຜູ້ຂໍສງວນຊື່ ແລະຕໍາແໜ່ງທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 21 ຕຸລານີ້ວ່າ:

“ເຂດບ້ານແດງຫ້າມຫັ້ນແລ້ວ ບໍ່ຢາກໃຫ້ຈັດ ຈະໄປເຮັດບຸນບໍ່ໄດ້ ຖ້າຫາກວ່າຢູ່ເຂດໃດ ບໍ່ແມ່ນເຂດສ່ຽງ ບໍ່ແມ່ນເຂດແດງຫັ້ນນ່າ ແຕ່ກໍບໍ່ໃຫ້ມັນເອິກກະເຫຼີກ ຊິໃສ່ບາດກໍຕັ້ງບາດໄວ້ ມາໃສ່ແລ້ວກໍກັບ ບໍ່ໃຫ້ຢູ່ໃກ້ກັນ ຢູ່ຫ່າງກັນ ບໍ່ໃຫ້ໄປໃກ້ຄຣູບາ ບໍ່ໃຫ້ໂຮມຊຸນຸມ.”

ປີນີ້ ທາງການກໍໄດ້ປະກາດ ບໍ່ໃຫ້ມີບຸນຊ່ວງເຮືອຕາມປະເພນີ ໃນພິທີເຮັດບຸນອອກພັນສາ, ສໍາລັບວັດທີ່ຢູ່ໃນພື້ນທີ່ສີຂຽວ ແມ່ນໃຫ້ທາງວັດ ເອົາບາດມາຕັ້ງລຽນໄວ້ ໃຫ້ອອກຕົນຍາດໂຍມ ຄ່ອຍພາກັນມາໃສ່ບາດ, ເມື່ອໃສ່ບາດແລ້ວ ກໍແຍກຍ້າຍກັນກັບບ້ານເຮືອນຂອງໃຜລາວ. ສໍາລັບອອກຕົນຍາດໂຍມ ທີ່ມີສັດທາ ຕ້ອງການໃຫ້ທານ ກັບທາງວັດ ກໍໃຫ້ທານ ທາງອອນລາຍນ໌ ຜ່ານລະບົບທະນາຄານ ແລະທາງພຣະສົງ ກໍໃຫ້ພອນ ຜູ້ທານທາງອອນລາຍນ໌ ເຊັ່ນກັນ.

ຢູ່ແຂວງຫຼວງພຣະບາງ ທາງການບໍ່ອະນຸຍາດໃຫ້ປະຊາຊົນ ໃນທົ່ວແຂວງຮວມທັງ ຜູ້ທີ່ຢູ່ໃນບ້ານທີ່ບໍ່ມີຄົນຕິດເຊື້ອ ໂຄວິດ-19 ເຮັດບຸນອອກພັນສາ ເດັດຂາດ, ມີແຕ່ອະນຸຍາດໃຫ້ ພຣະສົງ ຈັດພິທີທາງສາສນາ ຢູ່ພາຍໃນຂອງແຕ່ລະວັດ ເພື່ອປ້ອງກັນບໍ່ໃຫ້ ເຊື້ອແພ່ຣະບາດອອກໄປ ເປັນວົງກວ້າງຕື່ມ ດັ່ງເຈົ້າໜ້າທີ່ ທີ່ກ່ຽວຂ້ອງ ຢູ່ແຂວງຫຼວງພຣະບາງ ທ່ານນຶ່ງເວົ້າ ໃນມື້ດຽວກັນນີ້ວ່າ:

“ຫຼວງພຣະບາງນີ້ ບໍ່ໄດ້ເຮັດເລີຍ ມີແຕ່ໃຫ້ວັດເຮັດ ແລ້ວກໍແລ້ວ ວັດໃຜວັດລາວ ບໍ່ໃຫ້ຈົວວັດນັ້ນ ມາຫາວັດນີ້ ພຣະວັດນີ້ໄປຫາ ວັດນັ້ນ ບໍ່ໃຫ້ມີເລີຍ ຍາດໂຍມຫຍັງ ກໍບໍ່ໃຫ້ໄປເລີຍ.”

ປະຊາຊົນ ຢູ່ແຂວງຫຼວງພຣະບາງ ຜູ້ນຶ່ງກໍເວົ້າວ່າ ປີນີ້ທາງການແຂວງ ໄດ້ສັ່ງຫ້າມບໍ່ໃຫ້ ຊາວບ້ານໃນທົ່ວແຂວງ ໄປເຮັດບຸນອອກພັນສາ ຢູ່ວັດ, ໃຫ້ແຕ່ທາງວັດເພິ່ນ ຈັດພິທີເອົາເອງ, ຕົນເອງຮູ້ສຶກງຽບເຫງົາ ທີ່ບໍ່ໄດ້ໄປເຮັດບຸນປະເພນີ ທີ່ເຄີຍປະຕິບັດສືບທອດກັນມາ:

“ບໍ່ໄດ້ຈັດຄືກັນ ທຸກໆບ້ານຫັ້ນແຫຼະ ບ້ານເຮົາກໍບໍ່ ມັນງຽບເຫງົາ ແລ້ວປີກາຍກໍບໍ່ໄດ້ເຮັດ ເຮັດຕາມຮີດຊື່ໆຫັ້ນນ່າ ລະກໍແລ້ວ.”

ຢູ່ນະຄອນຫຼວງວຽງຈັນ ພຣະອາຈານອົງນຶ່ງ ຢູ່ວັດສີສະເກດ ກ່າວວ່າ ມື້ວັນທີ 21 ຕຸລາ ນີ້ເປັນມື້ອອກພັນສາ, ຕາມປົກກະຕິ ມື້ນີ້ຈະເປັນມື້ຕັກບາດ ໃນຕອນເຊົ້າ ແລະຕອນແລງກໍມີການວຽນທຽນ, ແຕ່ປີນີ້ ທາງວັດຈະບໍ່ໄດ້ຈັດ ເພາະວັດນີ້ ຢູ່ໃນເຂດພື້ນທີ່ສີແດງ, ແຕ່ທາງວັດກໍຈະມີການສູຕມົນ ແລະເຮັດກິຈກັມສົງຕາມຮີດຄອງປະເພນີ ດັ່ງພຣະອາຈານກ່າວວ່າ:

“ໂດຍທົ່ວໄປເນາະ ມື້ນີ້ຕັກບາດເນາະບ້ານເຮົາ ວຽນທຽນແຕ່ວ່າດຽວນີ້ມັນບໍ່ໄດ້ເຮັດ ຕອນເຊົ້າຂອງມື້ວັນເສົາຫັ້ນ ຂອງພຣະສົງເພິ່ນຕ້ອງໄດ້ເຮັດ ກໍມີພິທີໄຫວ້ພຣະ ປາວໍຣະນາ ແລະກໍກ່າວຕັກເຕືອນກັນຫັ້ນລະເນາະ ຕາມຂໍ້ປະຕິບັດຂອງພຣະສົງ ຄັນວ່າບ້ານທີ່ບໍ່ໄດ້ຢູ່ເຂດແດງຫັ້ນ ປອດພັຍຫັ້ນນ່າ ຍາດໂຍມທີ່ມີສ່ວນຮ່ວມກໍມື້ໃສ່ບາດຫັ້ນ.”

ສໍາລັບວັດທີ່ ບໍ່ມີພຣະສົງຕິດເຊື້ອ ໂຄວິດ-19 ກໍອະນຸຍາດໃຫ້ຈັດກິຈກັມ ທາງສາສນາພໍເປັນພິທີ, ບໍ່ໃຫ້ຈັດໃຫຍ່ໂຕ, ປະຕິບັດຕາມ ມາຕການປ້ອງກັນໂຄວິດ-19 ແລະໃຫ້ມີເຈົ້າໜ້າທີ່ບ້ານ ຕິດຕາມຊ່ອຍເຫຼືອ. ກ່ຽວກັບເຣື່ອງທີ່ນີ້ ປະຊາຊົນໃນນະຄອນຫຼວງວຽງຈັນ ທ່ານນຶ່ງເວົ້າວ່າ ອອກພັນສາປີນີ້ ບໍ່ໄດ້ໄປເຮັດບຸນໃສ່ບາດຢູ່ວັດ ຄືແຕ່ກ່ອນ, ບັນຍາກາດງຽບເຫງົາ ບໍ່ຄຶກຄື້ນຄືກັບແຕ່ກ່ອນ, ປັດຈຸບັນ ຊາວບ້ານຫຼາຍຄົນ ໄດ້ແຕ່ຝາກອາຫານແຫ້ງ ໄປຖວາຍພຣະສົງ ນໍາເຈົ້າໜ້າທີ່ ທີ່ກ່ຽວຂ້ອງ ໄປຮ່ວມກິນທານ ຢູ່ໃນວັດເທົ່ານັ້ນ:

“ເປັນບຸນໃຫຍ່ຄືເກົ່າ ບໍ່ໄດ້ເຮັດແລ້ວ ທຸກປີຕ້ອງເຮັດ ເຂົ້າຕົ້ມເຂົ້າໜົມແລ້ວກໍມ່ວນ. ຜູ້ໃດຢາກທານຫຍັງກໍທານ ແຕ່ປີນີ້ບໍ່ມີເດ໋ ກໍຫງວ່ມເຫງົາຫຼາຍແຫຼະເນາະ ມີແຕ່ເອົາຂອງກິນແຫ້ງ ໃຫ້ພວກເຂົາເຈົ້າ ສົ່ງເຄື່ອງຫັ້ນ ໄປສົ່ງວັດນັ້ນວັດນີ້ນ່າ.”

ເວົ້າເຖິງເຣື່ອງການຕິດເຊື້ອ ໂຄວິດ-19 ຢູ່ປະເທດລາວ ໃນປັດຈຸບັນແມ່ນຍັງມີ ຜູ້ຕິດເຊື້ອໃນຊຸມຊົນຫຼາຍຢູ່. ໂຄວິດ-19 ໄດ້ແພ່ລາມໄປເຖິງ ເກືອບທຸກພາກສ່ວນໃນສັງຄົມ ຮວມທັງແພດ, ໝໍ ແລະທະຫານຢູ່ວິທຍາຄານໄກສອນ ຄ້າຍຈິນາຍໂມ້ ນະຄອນຫຼວງວຽງຈັນ, ເຈົ້າໜ້າທີ່ຕໍາຣວດ, ນັກໂທດໃນຄ້າຍຄຸມຂັງ ແລະປະຊາຊົນທົ່ວໄປ ຊຶ່ງໃນນັ້ນຫຼາຍຄົນ ໄດ້ສັກວັກຊິນປ້ອງກັນ ໂຄວິດ-19 ຄົບຕາມກໍານົດແລ້ວ.

ທາງການລາວ ປະກາດໃນມື້ວັນທີ 21 ຕຸລາ ນີ້ວ່າ ຈາກຜົລຂອງການ ກວດວິເຄາະຫາເຊື້ອ ໂຄວິດ-19  6,579 ຄົນ ໃນມື້ວັນທີ 20 ຕຸລາ, ກວດພົບຜູ້ຕິດເຊື້ອໃໝ່ຕື່ມ 392 ຄົນ, ໃນນັ້ນຕິດເຊື້ອໃນຊຸມຊົນ 389 ຄົນ ແລະນໍາເຂົ້າ 3 ຄົນ. ໃນຈໍານວນຜູ້ຕິດເຊື້ອໃໝ່ 392 ຄົນ ນັ້ນຕິດຫຼາຍກວ່າໝູ່ແມ່ນຢູ່ ນະຄອນຫຼວງວຽງຈັນ 158 ຄົນ, ຮອງລົງມາແມ່ນແຂວງວຽງຈັນ 99 ຄົນ, ແຂວງຫຼວງພຣະບາງ 44 ຄົນ ແລະຢູ່ແຂວງອື່ນໆອີກ 9 ແຂວງ. ມາເຖິງປັດຈຸບັນ ມີຜູ້ຕິດເຊື້ອສະສົມ 33,998 ຄົນ, ກໍາລັງປິ່ນປົວ 6,985 ຄົນ, ປິ່ນປົວເຊົາແລ້ວ 26,964 ຄົນ ແລະເສັຽຊີວິດ 49.