ຝຸ່ນລະອອງ PM 2.5 ທີ່ນະຄອນຫຼວງ ຢູ່ໃນລະດັບ ທີ່ເປັນອັນຕະລາຍ ຕໍ່ສຸຂພາບ
2023.04.06
ສະພາບຝຸ່ນລະອອງ PM 2.5 ໃນນະຄອນຫຼວງວຽງຈັນ. ວັນທີ 6 ເມສາ 2023.
RFA
ລະດັບຝຸ່ນລະອອງ PM 2.5 ຢູ່ນະຄອນຫລວງວຽງຈັນ ຢູ່ໃນລະດັບສີແດງ ທີ່ເປັນອັນຕລາຍທີ່ສຸດຕໍ່ສຸຂພາບປະຊາຊົນ ເຊັ່ນໂຣກລະບົບທາງເດີນຫາຍໃຈ, ແສບດັງ, ຫາຍໃຈຝືດ, ເປັນຫວັດ, ເປັນໄອ, ຄັນຕາ. ຊາວບ້ານ ໃນນະຄອນຫລວງວຽງຈັນ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ໃນວັນທີ 6 ເມສາ ວ່າ:
“ກໍຍັງເຫັນເປັນຂ່າວຢູ່ ປ້ອງກັນແລກໆ ຄັນອອກເຮືອນກໍຕ້ອງໃສ່ແມສຄ໌ ໃສ່ຫຍັງ ກໍມີແຕ່ເດັກນ້ອຍ ຄັນຕາ ຄັນດັງຫັ້ນແຫຼະ ຄືແບບເປັນຫວັດ ເປັນໄຂ້ຂຶ້ນມາ ສ່ວນຫຼາຍພວກຜູ້ໃຫຍ່ ກະຊິບໍ່ເປັນຫຍັງ.”
ຂະນະທີ່ ຊາວບ້ານ ໃນນະຄອນຫລວງວຽງຈັນ ອີກທ່ານນຶ່ງ ກ່າວວ່າ ເຈົ້າໜ້າທີ່ທາງການເວົ້າວ່າ ໄດ້ມອດໄຟຢູ່ພູພະນັງແລ້ວ, ແຕ່ສະພາບອາກາດ ຍັງບໍ່ດີຂຶ້ນ ຍັງມົວໆຢູ່ ຫຼາຍຄົນກໍມີບັນຫາ ເຣື່ອງສຸຂພາບກັນຫຼາຍ ໂດຍສະເພາະເປັນຫວັດ ເປັນໄອ. ທີ່ຜ່ານມາ ເຈົ້າໜ້າທີ່ກໍມີການແຈ້ງເຕືອນ ໃຫ້ຊາວບ້ານປ້ອງກັນໂຕເອງ ໃນເວລາອອກໄປນອກ ໃຫ້ໃສ່ຜ້າອັດປາກ-ອັດດັງ.
“ກະເປັນມົວໆ ເປັນທົ່ວໆໄປ ຂ້ອຍຂີ່ຣົຖທາງບ້ານໃໝ່ ໜອງດາ ກໍເປັນຄືກັນໝົດຫັ້ນແຫຼະເນາະ. ບາງຄົນເຂົາເຈົ້າກໍເປັນຫວັດ ເປັນຫຍັງຫັ້ນແຫຼະ ເພາະວ່າ ຝົນມັນບໍ່ຕົກເດ້ ຖ້າຝົນຕົກກໍຄືຊິບໍ່ມີ ແຕ່ກໍທາງບ້ານກໍໄດ້ປະກາດໂທລະໂຄ່ງ ໃຫ້ເຂົາເຈົ້າອອກຈາກບ້ານ ອອກຫຍັງກໍໃສ່ແມສຄ໌ ໃສ່ຫຍັງຫັ້ນແລ້ວ ເພື່ອປ້ອງກັນຝຸ່ນລະອອງ.”
ເຖິງວ່າ ເຈົ້າໜ້າທີ່ຈະຢືນຢັນວ່າ ໄດ້ມອດໄຟປ່າ ຢູ່ເຂດປາສງວນພູພະນັງ ແລ້ວກໍຕາມ, ແຕ່ສະພາບອາກາດໂດຍລວມ ຍັງບໍ່ດີຂຶ້ນ, ຊາວບ້ານ ຕ້ອງປ້ອງກັນໂຕໂອງ ດ້ວຍການໃສ່ຜ້າອັດປາກ-ອັດດັງ.
ຊາວນະຄອນຫລວງວຽງຈັນ ອີກທ່ານນຶ່ງ ທີ່ຢູ່ໃກ້ເຂດພູພະນັງ ໄດ້ກ່າວວ່າ:
“ໄລຍະນຶ່ງມາ ຕິດກັບບ້ານສຳມະນາ ນີ້ ປາດໃໝ້ຮຸນແຮງຂນາດເດ້ ແລ້ວກໍໝອກຄວັນ ດຽວນີ້ຍັງມີຢູ່ ໝອກຍັງຄຸມຢູ່ເນາະ ຫ້ວຍມັນກະອາກາດ ມັນບໍ່ຢາກຄ່ອຍດີປານໃດ ໝອກຄວັນ ບໍ່ມີກິນຂິວຄວັນໄຟເດ້ ກະໃສ່ຜ້າອັດປາກ-ອັດດັງ ແຫຼະ ຖ້າບໍ່ອອກຈາກບ້ານ ກໍບໍ່ໄດ້ໃສ່.”
ບັນຫາຝຸ່ນລະອອງ PM 2.5 ຢູ່ນະຄອນຫລວງວຽງຈັນ ເປັນເລື່ອງທີ່ແກ້ໄຂໄດ້ຍາກ ຕ້ອງລໍຖ້າເກີດຝົນຕົກ ໝອກຄວັນ ຈຶ່ງຈະຈາງຫາຍໄປ.
ທາງການລາວ ໄດ້ມີການແຈ້ງເຕືອນ ໃຫ້ປະຊາຊົນ ບໍ່ຄວນອອກຈາກເຮືອນ ຫຼື ອາຄານ, ຖ້າຈະອອກໄປ ກໍຕ້ອງໃສ່ຜ້າອັດປາກ-ອັດດັງ ເພື່ອປ້ອງກັນຝຸ່ນລະອອງ ເພາະວ່າ ຖ້າປະຊາຊົນ ສູດດົມເອົາຫຼາຍ ກໍຈະມີຜົລຕໍ່ສຸຂະພາບ.
ເຖິງວ່າ ຈະມີຄົນປ່ວຍໂຣກລະບົບ ທາງເດີນຫາຍໃຈ, ແຕ່ ເຈົ້າໜ້າທີ່ ສາທາຣະນະສຸຂ ຍັງບໍ່ສາມາດຢືນຢັນໄດ້ວ່າ ມີຈຳນວນຄົນປ່ວຍໂຣກ ລະບົບທາງເດີນຫາຍໃຈ ອັນເກີດຈາກຝຸ່ນລະອອງ PM 2.5 ເຂົ້າມາປິ່ນປົວ ຫຼາຍປານໃດ ຍ້ອນວ່າ ບໍ່ມີເຄື່ອງກວດໂດຍຕຣົງ.
ທ່ານໝໍ ຢູ່ໂຮງໝໍ ນະຄອນຫລວງວຽງຈັນ ທ່ານນຶ່ງ ຜູ້ທີ່ບໍ່ປະສົງອອກຊື່ ແລະ ຕຳແໜ່ງ ໄດ້ກ່າວວ່າ:
“ຄົນເຈັບ ທີ່ກ່ຽວກັບລະບົບຫາຍໃຈ ນີ້ ມັນກໍມີຫຼາຍ ຢູ່ນີ້. ເຮົາບໍ່ແນ່ໃຈວ່າ ມາຈາກຝຸ່ນລະອອງ PM 2.5 ບໍ່, ບໍ່ແນ່ໃຈວ່າ ມາຈາກໂຕນັ້ນບໍ່ເນາະ ເຮົາບໍ່ມີເຄື່ອງກວດຢູ່ນີ້.”
ອີງຕາມຣາຍງານ ຂອງເວບໄຊ້ IQ Air ທີ່ເປັນຖານຂໍ້ມູນເລື່ອງຝຸ່ນ PM 2.5 ສະເພາະໃນວັນທີ 6 ເມສາ 2023 ເວລາປະມານ 6 ໂມງເຊົ້າ, ຝຸ່ນລະອອງ PM 2.5 ໃນນະຄອນຫລວງວຽງຈັນ ແທກໄດ້ຢູ່ທີ່ 401 AQI ຢູ່ໃນລະດັບສີແດງ ທີເປັນເປັນອັນຕລາຍ ຮ້າຍແຮງ ຕໍ່ສຸຂພາບ ຂອງຄົນ, ແຕ່ໃນເວລາຕອນສວາຍ ໄປຫາ ຕອນແລງ ຢູ່ນະຄອນຫລວງວຽງຈັນ ຄ່າສະເລັ່ຽຂອງຝຸ່ນລະອອງ PM 2.5 ຈະຫຼຸດລົງ, ແຕ່ ກໍຍັງຖືກຈັດຢູ່ໃນພື້ນທີ່ ສີແດງຄືເກົ່າ.