ຄົນງານລາວຈາກໄທສ່ວນຫຼາຍ ອອກສູນແລ້ວ

ຄົນງານລາວ ທີ່ກັບມາຈາກໄທ ເມື່ອຕົ້ນເດືອນເມສາ ທີ່ຜ່ານມາ ອອກຈາກສູນກັກກັນຊົ່ວຄາວ ຢູ່ເມືອງແລະແຂວງຕ່າງໆ ເກືອບໝົດແລ້ວ. ເປັນຕົ້ນ ຢູ່ແຂວງສວັນນະເຂດ ທີ່ມີຄົນງານລາວກັບຈາກໄທ 20 ພັນ ປາຍຄົນ ໃນຈໍານວນ 27 ພັນປາຍຄົນ ທີ່ຜ່ານດ່ານຂົວມິຕພາບ ລາວ-ໄທ ແຫ່ງທີ 2. ພວກເຂົາເຈົ້າ ໄດ້ກັບເມືອເຮືອນ ແລະ ມີເຈົ້າໜ້າທີ່ກ່ຽວຂ້ອງ ຢູ່ທ້ອງຖິ່ນຕິດຕາມອາການ.

ອີງຕາມ ຄໍາເວົ້າຂອງເຈົ້າໜ້າທີ່ເມືອງນຶ່ງ ໃນແຂວງສວັນນະເຂດ ຕໍ່ RFA ໃນມື້ວັນທີ 8 ພຶສພາ ນີ້, ປັດຈຸບັນຍັງເຫລືອແຕ່ພວກເດີນທາງ ເຂົ້າມາໃໝ່ 100 ປາຍຄົນ ຊຶ່ງສ່ວນໃຫຍ່ມາຈາກໄທ ແລະເຈົ້າໜ້າທີ່ ຍັງກັກກັນຕົວໄວ້ 14 ມື້ ຕາມຣະບຽບການ. ທ່ານເວົ້າວ່າ ຢູ່ເຂດ ເມືອງຂອງທ່ານ ແຕ່ກ່ອນ ມີ 6 ພັນ ປາຍຄົນ:

“ສ່ວນໃຫຍ່ກັບເມື່ອເຮືອນ ໝົດແລ້ວ ກະ 6 ພັນ ປາຍຄົນ ຕິດຕາມຢູ່ບ້ານອີກ. ເຮົາມີສາຍຣະບົບຣາຍງານ ມີຄົນໃໝ່ຈໍານວນນຶ່ງເຂົ້າມາມື້ນີ້ ລະຄົນສອງຄົນສາມຄົນ ເຂົ້າມາຈາກຕ່າງປະເທດ ຫັ້ນແຫລະ ເຮົາກໍໄດ້ໄປຮັບຢູ່ ແຂວງຈໍາປາສັກ.”

ທ່ານກ່າວຕື່ມວ່າ ປັດຈຸບັນ ໄດ້ຕຽມສະຖານທີ່ກັກກັນຕົວໄວ້ຮອງຮັບ ຄົນງານລາວທີ່ກັບມາຈາກຕ່າງປະເທດ ກຸ່ມໃໝ່ແລະເຈົ້າໜ້າທີ່ຕ່າງ ປະເທດ ທີ່ຈະມາເຮັດວຽກຢູ່ລາວ ໄວ້ແລ້ວ  ຊຶ່ງເບື້ອງຕົ້ນຈະໃຊ້ຫໍພັກ ບ້ານພັກ ເປັນສະຖານທີ່ກັກກັນ.

ໃນຂນະດຽວກັນ ເຈົ້າໜ້າທີ່ແຂວງຈໍາປາສັກ ເວົ້າວ່າ ແຂວງຈໍາປາສັກ ມີຄົນງານລາວ 3 ພັນປາຍຄົນ ທີ່ຖືກກັກກັນໂຕ ກໍໄດ້ໃຫ້ກັບເມືອ ເຮືອນໝົດແລ້ວ ໂດຍມີເຈົ້າໜ້າທີ່ ຄອຍຕິດ ຕາມຄືກັນ ຊຶ່ງມາຮອດມື້ນີ້ ກໍບໍ່ມີຜູ້ໃດປາກົດວ່າມີເຊື້ອ. ແຂວງຈໍາປາສັກ ປັດຈຸບັນ ມີຄົນລາວ ທີ່ວ່າງງານ ເດີນທາງເຂົ້າມາຈໍານວນນຶ່ງ ທັ້ງໆທີ່ດ່ານຍັງບໍ່ໄດ້ເປີດ ແຕ່ເຈົ້າໜ້າທີ່ກໍຈໍາຕ້ອງໃຫ້ເຂົ້າ ແລະ ກໍຕ້ອງຖືກກັກກັນໂຕ 14 ມື້:

“ເພິ່ນກໍກັບໄປໝົດແລ້ວ ຍັງແຕ່ສູນຂອງແຂວງເຮົານີ໋ຍັງຢູ່ 3 ສູນສ່ວນໃຫຍ່ກໍມາຈາກໄທ ປົກກະຕິເພິ່ນກະບໍ່ເປີດຫັ້ນແຫລະ. ລາວເຮົາກໍສິ ຮັບຫັ້ນ ແຫລະ ກະກັກໝົດຫັ້ນແຫລະ.”  

ທ່ານກ່າວຕື່ມວ່າປັດຈຸບັນ ແຂວງຈໍາປາສັກ ໄດ້ຕຽມສະຖານທີ່ ຮອງຮັບຄົນງານລາວກຸ່ມໃໝ່ ທີ່ກັບມາຈາກຕ່າງປະເທດໄວ້ 3 ແຫ່ງຢູ່ນະ ຄອນປາກເຊ ແລະເມືອງປະທຸມພອນ ນອກນັ້ນປິດໝົດແລ້ວ ໂດຍຈະໃຊ້ໂຮງໝໍ ເຮືອນພັກຕ່າງໆ ເປັນສະຖານທີ່ກັກກັນໂຕ.

ທີ່ແຂວງຄໍາມ່ວນ ເຈົ້າໜ້າທີ່ເວົ້າວ່າ ມີຄົນງານລາວຖືກກັກກັນຕົວທັງໝົດ 7 ພັນປາຍຄົນ ຊຶ່ງຂນະນີ້ສ່ວນໃຫຍ່ ກັບເມືອເຮືອນແລ້ວຈະ ເຫລືອສູນລະຄົນເທົ່ານັ້ນ:

"ແຂວງຄໍາມ່ວນປະມານ 7 ພັນປາຍຄົນກັບມານະ ເມືອເປັນສ່ວນຫຼາຍແລ້ວ ແຕ່ລະສູນແຕ່ລະບ່ອນ ຖືວ່າຢາກໝົດແລ້ວນະ. ເຂົາກັບ ເມືອເຮືອນເມືອຊານ ກັນສິໝົດແລ້ວ. ມີແຕ່ລະສູນກໍດ້າມຄົນນີ້.”  

ແຂວງສາລະວັນ ເຈົ້າໜ້າທີ່ແຂວງທ່ານນຶ່ງ ກໍກ່າວຕໍ່ RFA ວ່າ ແຂວງສາລະວັນ ມີຄົນງານລາວທີ່ກັບມາຈາກປະເທດໄທ 2 ພັນປາຍຄົນ, ທາງເຈົ້າໜ້າທີ່ ໄດ້ເມືອເຮືອນໝົດແລ້ວ, ບໍ່ມີຜູ້ໃດຢູ່ສູນກັກກັນອີກ ແລ້ວ. ຖ້າຫາກດ່ານສາກົລເປີດ ຈະຕ້ອງໄດ້ເອົາ ເຮືອນພັກ ແລະ ວັດ ເປັນບ່ອນກັກກັນ ຫລືຜູ້ໃດຢູ່ຖຽງນາ ໄດ້ກໍໃຫ້ໄປຢູ່:

“ເຂົາເຈົ້າກັບໝົດແລ້ວ ແຕ່ລະຈຸດເພິ່ນກະຕິດຕາມຫັ້ນແຫຼະ ໂດຍສະເພາະນາຍບ້ານມີກັກໂຕເພິ່ນຕຽມໄວ້ແລ້ວທຸກເມືອງ ມັນກະມີທຸກບ້ານ ອີກ. ແຕ່ລະບ້ານເພິ່ນຈະເອົາຈຸດທີ່ຫ່າງໆແດ່. ບາງບ້ານກະຢູ່ວັດ ຜູ້ທີ່ມີເງື່ອນໄຂ ຢູ່ຖຽງນາ ກະແມ່ນຢູ່ຖຽງນາໂຕເອງ.”

ຢ່າງໃດກໍຕາມ ເຖິງແມ່ນວ່າຄົນງານລາວ ທີ່ກັບມາຈາກຕ່າງປະເທດ ຈະໄດ້ກັບເມືອເຮືອນເປັນສ່ວນໃຫຍ່ແລ້ວ ແຕ່ກໍຍັງມີເຈົ້າໜ້າທີ່່ ຄອຍ ຕິດຕາມກວດກາເບິ່ງ ອີກເທື່ອນຶ່ງ. ແລະຫລາຍໆແຂວງ ກໍໄດ້ຕຽມ ສະຖານທີ່ຮອງຮັບ ຄົນງານລາວທີ່ຈະເດີນທາງ ຈາກຕ່າງປະເທດ ຫລື ນັກວິຊາການ ທີ່ຈະເຂົ້າມາເຮັດວຽກ ຢູ່ລາວນັ້ນ ໄວ້ແລ້ວ ຖ້າມີຄໍາສັ່ງໃຫ້ເປີດດ່ານສາກົລ.