ມ.ໂຂງ ປາຂ່່າໃກ້ສູນພັນ

ຈຳນວນປ່າຂ່າ ໃນແມ່ນໍ້າຂອງ ຢູ່ເມືອງໂຂງ ແຂວງຈຳປາສັກ ຫຼຸດລົງເລື້ອຍໆ ຈົນໃກ້ສູນພັນແລ້ວ ຫຼັງຈາກມີການລັກລອບ ໃຊ້ອຸປກອນ ຫາປາ ຊນິດທຳລາຍລ້າງ ເປັນຕົ້ນເຄື່ອງຊ໋ອດໄຟຟ້າ ແລະຣະເບີດ ນອກຈາກນີ້ແລ້ວ ຍັງມີການ ສ້າງເຂື່ອນດອນສະໂຮງ ໃກ້ກັບບ່ອນຢູ່ ອາສັຍຂອງປ່າຂ່າ ແລະເຮັດໃຫ້ປານ້ອຍຊນິດອື່ນໆຫຼຸດລົງເຊັ່ນກັນ, ດັ່ງເຈົ້າໜ້າທີ່ ອະນຸຮັກພັນປາເມືອງໂຂງ ກ່າວຕໍ່ເອເຊັຍເສຣີ ໃນວັນທີ 26 ເມສາ ນີ້ວ່າ:

“ຜ່ານມາບໍ່ເຂົ້າໃຈກ່ຽວກັບປາຂ່ານີ້ ໄປຖືກໂຕ່ງ ຖືກມອງ ໂດຍບໍ່ມີການອະນຸຮັກສາ ມັນຈັ່ງທຳໃຫ້ປານັ້ນຫຼຸດນ້ອຍລົງ ຄິດວ່າປານີ້ບໍ່ມີຄຸນຄ່າ ຊັ້ນນ່າ ຕະກີ້ຢູ່ນີ້ ໃນວັງຕົວນີ້ ມີຢູ່ຫມ້ອງ 17-18 ໂຕ ແລ້ວກໍ່ມາມີຢູ່ວັງເຮົານີ້ 3 ໂຕ 4 ໂຕເທົ່ານັ້ນ.”

ເຈົ້າໜ້າທີ່ເວົ້າວ່າ ແຕ່ກີ້ປາຂ່າ ໃນເຂດຊາຍແດນແມ່ນໍ້າຂອງ ລາວ-ກັມພູຊາ ນັ້ນມີຫຼາຍໂຕ ທັງຢູ່ແຂວງຊຽງແຕງ ປະເທດກັມພູຊາ ແລະ ແຂວງຈຳປາສັກ ເຊັ່ນ: ເຂດບ້ານຫາງສະດຳ, ຫາງຄອນ ແລະບ້ານນາກະສັງ ເມືອງໂຂງ.

ອົງການຄຸ້ມຄອງສັດປ່າໂລກ ຫຼື WWF ຣາຍງານວ່າປັດຈຸບັນຈຳນວນປາຂ່າ ໃນຝັ່ງກັມພູຊາເຫຼືອປະມານ 90 ໂຕ ຢູ່ເຂດບ້ານຫາງຄອນ ເມືອງໂຂງ ຊຶ່ງເປັນບ່ອນດຽວ ໃນປະເທດລາວ ທີ່ມີປາຊນິດນີ້ ພຽງ 5 ໂຕ ແລະເມື່ອເດືອນມີນາ ທີ່ຜ່ານມານີ້ ເຈົ້າໜ້າທີ່ອະນຸຮັກ ພັນປາ ຜູ້ນີ້ກໍບອກວ່າ ລູກປາຂ່າອາຍຸ 3 ເດືອນ ຕາຍໄປອີກແລ້ວ 1 ໂຕ:

“5 ໂຕ ກັບໂຕນ້ອຍ ໂຕຕາຍຫັ້ນ ມັນຖືກຜົນກະທົບ ກໍ່ເໝືອນກັບເດັກນ້ອຍເຮົານິແລ້ວ ເພາະວ່າມັນເກີດໃໝ່ ມັນກະທົບແຮງ ຫຼາຍກໍເລີຍ ຕາຍຫຼືວ່າຊິເປັນນໍານໍ້າ ບໍແບບວ່າມີພິດໄພ ເວົ້າເລື້ອງສາຍນໍ້າຂອງແຕ່ຈີນລົງມາ ຈັງເຂົາສິເອົາອິສັງໃສ່ຈັ່ງໃດ ແລ້ວເທລົງນໍ້າຂອງ ໃຫ້ນໍ້າເປິ ນໍ້າເປື້ອນ ເຮົາກໍ່ໍບໍ່ເຂົ້າໃຈໂຕນີ້ນິ່ນະ ເລື່ອງການອະນຸຮັກສາ ພວກເຮົາກໍເຮັດເຕັມທີ່ແລ້ວ ເຮົານີ້ກໍ່ໄດ້ໃຊ້ໜ່ວນລາດຕະເວນຕລອດ.”

ທ່ານກ່າວຕື່ມວ່າ ເພື່ອອະນຸຮັກປາຂ່າ ທີ່ຍັງເຫຼືອໃນຕອນນີ້ໄວ້ ເຈົ້າໜ້າກໍມີການກວດກາ ລາດຕະເວນເຂັ້ມງວດຂຶ້ນ ແລະຈະລົງໂທດຜູ້ທີ່ໃຊ້ ອຸປກອນຫາປາ ທີ່ຕ້ອງຫ້າມ ນັ້ນນຳດ້ວຍ.