ດິນເຈື່ອນທັບເຮືອນ ເສັຽຊີວິດ 4 ຄົນ

ດິນເຈື່ອນທັບເຮືອນປະຊາຊົນ ບ້ານາກາງ ເມືອງໃໝ່ ແຂວງຜົ້ງສາລີ ເມື່ອວັນທີ 02 ມິຖຸນາ ຜ່ານມາມີຜູ້ເສັຽຊີວິດຄາທີ່ 4 ຄົນລອດຊີວິດ ນຶ່ງຄົນ ຍ້ອນຝົນຕົກໜັກຕໍ່ເນື່ອງກັນ ຫຼາຍວັນ ປະກອບກັບ ເຮືອນຫຼັງດັ່ງກ່າວ ແມ່ນຕັ້ງຢູ່ຕີນພູ. ໂດຍອີງຕາມຄຳເວົ້າ ຂອງປະຊາຊົນ ຢູ່ໃນເຫດການ ຕໍ່ສຳນັກຂ່າວ RFA ເມື່ອວັນທີ 03 ມິຖຸນາ ວ່າ:

"ເມື່ອວານນີ້ຕອນເຊົ້າ 3 ໂມງ ມີຄົນເສັຽຊີວິດນີ້ 4 ຄົນ ເມື່ອວານໄດ້ທໍາພິທີ ເອີ້ນວ່າໄປເຜົາ ມື້ນີ້ໄດ້ໄປເກັບກະດູກ ທັງໝົດມີ 5 ຄົນ ເສັຽຊີວິດ 4 ຄົນ ລອດຊີວິດມາຜູ້ນຶ່ງ ດຽວນີ້ຍັງໄປປີ່ນປົວຢູ່ໂຮງໝໍຢູ່ວຽດ ຜູ້ລອດຊີວິດນັ້ນກໍ."

ຕາມການຣາຍງານຂອງເຈົ້າໜ້າທີ່ ເຫດການດິນເຈື່ອນ ມີຜູ້ເສັຽຊີວິດ 4 ຄົນ ໃນນັ້ນມີ ພໍ່ແມ່ ພ້ອມດ້ວຍລູກແຝດຊາຍ ອາຍຸ 4 ປີ ແລະ ຜູ້ລອດຊີວິດ ເປັນລູກຊາຍອາຍຸ 8 ປີ ປັດຈຸບັນ ຜູ້ເຄາະຮ້າຍທີ່ເສັຽຊີວິດທັງ 4 ຄົນນັ້ນ ທາງການໄດ້ຈັດພິທີ ຊາປະນະກິດສົບ ຕາມພິທີ ທາງສາສນາແລ້ວ ສ່ວນລູກຊາຍຜູ້ລອດຊີວິດ ກຳລັງປິ່ນປົວ ທີ່ໂຮງໝໍເຂດຊາຍແດນວຽດນາມ ທາງດ້ານຄ່າໃຊ້ຈ່າຍ ທາງເມືອງຈະເປັນ ຜູ້ຮັບຜິດຊອບຊ່ອຍເຫຼືອ.

ຕໍ່ເຫດການດິນເຈື່ອນ ເຈົ້າໜ້າທີ່ຫ້ອງການປົກຄອງເມືອງໃໝ່ ແຂວງຜົ້ງສາລີ ໄດ້ເວົ້າໃນມື້ດຽວກັນວ່າ ເຮືອນທີ່ເກີດເຫດ ຕັ້ງຢູ່ແຄມຫ້ວຍ ຂະເຈົ້າຫາກໍຖົມດິນຂຶ້ນມາໃໝ່ ແລະ ສ້າງເຮືອນໃສ່ ເຊິ່ງຢູ່ໄດ້ປະມານ 3 ເດືອນ.

”ມັນເປັນຕາຝັ່ງຢູ່ທາງຣົດ ແລ້ວກໍຂະເຈົ້າເອົາດິນຖົມ ແລ້ວກໍຕັ້ງເຮືອນໃສ່ນະ ມັນບໍ່ແມ່ນດິນມາຕຖານ ຫຼັງຈາກຝົນຕົກ ມັນຮັບນໍ້າໜັກບໍ່ໄດ້ ແລ້ວກໍລຸ ເບິ່ງສະພາບ ມັນກໍທີ່ຕັ້ງຂອງເຮືອນ ມັນກໍຈຳກັດແດ່ແລ້ວ ກໍຍັງມີຫຼາຍຢູ່ບ່ອນຄວາມສ່ຽງ.”

ເຈົ້າໜ້າທີ່ ຫ້ອງການປົກຄອງເມືອງໃໝ່ ເວົ້າຕື່ມວ່າ ເຫດການດິນເຈື່ອນເທື່ອນີ້ ຖືວ່າເປັນເທື່ອທຳອິດຂອງປີ ເຊິ່ງສ້າງຄວາມສູນເສັຽ ທັງຊັບສິນແລະຊີວິດ ຂນະທີ່ ສະພາບການເປັນຢູ່ຂອງປະຊາຊົນ ພາຍໃນເມືອງໃໝ່ ມັກຈະສ້າງເຮືອນຕາມແຄມທາງ ແລະ ພູດອຍ ເຊິ່ງເປັນພື້ນທີ່ສ່ຽງ ທີ່ຈະເກີດດິນເຈື່ອນໄດ້ທຸກເວລາ ໂດຍສະເພາະໃນໄລຍະຣະດູຝົນ.