ເຂື່ອນຊະນະຄາມ ທາງການໄທຍ ເປັນຫ່ວງຜົລກະທົບ
2020.08.07
ແມ່ນ້ຳຂອງ ພວມກາຍເປັນແມ່ນ້ຳ ທີ່ຈະມີເຂື່ອນໄຟຟ້າ ພະລັງງານນ້ຳ ຖືກສ້າງໃສ່ ຢ່າງຫຼວງຫຼາຍ ໃນອະນາຄົດ. ຮູບຖ່າຍເມື່ອ ເດືອນກໍຣະກະດາ 2020 ຈາກແຂວງໜອງຄາຍ ປະເທດໄທຍ
RFA/PV
ໂຄງການ ເຂື່ອນຊະນະຄາມ ຂອງນັກລົງທຶນຈີນ ທີ່ຈະສ້າງໃສ່ແມ່ນ້ຳຂອງ ຢູ່ເຂດເມືອງຊະນະຄາມ ແຂວງວຽງຈັນ ບໍ່ໄດ້ເນັ້ນໃສ່ ເຣື່ອງການຂາຍໄຟຟ້າ, ແຕ່ມີຜົລປໂຍດ ທາງດ້ານທຸຣະກິຈກໍ່ສ້າງ ຢູ່ເບື້ອງຫຼັງ.
ທ່ານ ວິທູນ ເພີ່ມພົງສາຈເຣີນ, ຜູ້ອຳນວຍການ ໂຄງການພະລັງງານ ເພື່ອນິເວດວິທຍາ ເຂດລຸ່ມແມ່ນ້ຳຂອງ ໄດ້ກ່າວຕໍ່ເອເຊັຽເສຣີ ວ່າ:
"ຜູ້ລົງທຶນຈີນ ບໍ່ສົນໃຈວ່າ ມີຄວາມຕ້ອງການ ໄຟຟ້າ ຫຼືບໍ່, ຂໍແຕ່ໃຫ້ມີ ງານກໍ່ສ້າງ ໃຫ້ບໍຣິສັດຕົວເອງ ສາມາດ ເຮັດທຸຣະກິຈ ກໍ່ສ້າງໄດ້ ກໍເຮັດເຂື່ອນເລີຍ. ແລ້ວໄປຫາຕລາດ ຂາຍໄຟຟ້າເອົາ ພາຍຫຼັງ."
ເຂື່ອນດັ່ງກ່າວ ບໍ່ສາມາດສົ່ງໄຟຟ້າ ໄປຂາຍຢູ່ຈີນໄດ້ ເພາະວ່າ ຣະບົບສາຍສົ່ງ ບໍ່ມີຄວາມພ້ອມ, ດັ່ງ ທ່ານ ວິທູນ ກ່າວຕື່ມອີກວ່າ:
"ຜູ້ລົງທຶນຈີນ ມີເງິນ ຈຶ່ງດຳເນີນການໄປເລື້ອຍໆ, ໂດຍທີ່ບໍ່ຈຳເປັນ ຈະຕ້ອງເຣີ່ມຕົ້ນ ຈາກການເຊັນສັນຍາ ຊື້ຂາຍໄຟ, ເຊິ່ງອັນນີ້ ຍິ່ງບໍ່ມີ ຄວາມຈະແຈ້ງ ເພາະວ່າ ການສົ່ງໄຟຟ້າ ໄປຂາຍຢູ່ປະເທດຈີນ ເປັນໄປບໍ່ໄດ້ ເພາະວ່າ ຣະບົບສາຍສົ່ງ ບໍ່ມີຄວາມພ້ອມ."
ນັກວິຊາການລາວ ບໍ່ມີຄວາມເຊື່ອໝັ້ນວ່າ ນັກລົງທຶນຈີນ ຈະໃສ່ໃຈເຣື່ອງ ຜົລກະທົບ ຕໍ່ສິ່ງແວດລ້ອມ. ຊ່ຽວຊານລາວ ທີ່ເຮັດວຽກ ເຣື່ອງການວິຈັຍປາ ແລະ ສິ່ງແວດລ້ອມ ເຄີຍກ່າວຕໍ່ ເອເຊັຽເສຣີວ່າ:
"ກະທົບແທ້ໆ ມັນຊິກະທົບຫັ້ນແຫຼະ ຈີນ ກະຄືດັ່ງທີ່ຮູ້ຫັ້ນແຫຼະ ມັນຢາກເຮັດແນວໃດ ກະໄດ້ຫັ້ນແຫຼະ. ມັນກະວ່າ ມັນເຮັດຕາມມາຕຖານ ຂອງສິ່ງແວດລ້ອມໂລກຢູ່, ຫາກແຕ່ວ່າ ບາງເທື່ອ ມັນກະບໍ່ໄດ້ສົນ ມັນເອົາເງິນ ໃຫ້ຣັຖບານລາວ ໄປທົດແທນ ສິ່ງແວດລ້ອມເບາະ ຄືວ່າ ມັນກະອັນນັ້ນເອງ ລະມັນກະ ອັນນັ້ນເລີຍ ບໍ່ສົນນ່າ. ໃຫ້ຄົນລາວ ແກ້ອັນເອງນ່າ ກັບປະຊາຊົນ ມັນເຮັດແບບນັ້ນໄດ໋."
ຈຸດທີຕັ້ງຂອງເຂື່ອນ ຫ່າງຈາກ ເມືອງຊະນະຄາມ ແຂວງວຽງຈັນຂຶ້ນໄປ 25 ກິໂລແມັຕ ແລະ ຫ່າງຈາກຊາຍແດນ ປະເທດໄທຍ ພຽງແຕ່ 2 ກິໂລແມັຕເທົ່ານັ້ນ. ທາງການປະເທດໄທຍ ໄດ້ສະແດງຄວາມເປັນຫ່ວງ ກ່ຽວກັບ ບັນຫາຜົລກະທົບ ຂ້າມຊາຍແດນ ຈາກເຂື່ອນດັ່ງກ່າວ.
ສຳນັກຂ່າວ Thai PBS ໄດ້ຣາຍງານ ໃນວັນທີ 3 ສິງຫາ ວ່າ ຣັຖບານໄທຍ ມີຄວາມຫ່ວງໃຍ ຕໍ່ຜົລກະທົບ ໃນດ້ານຕ່າງໆ [ຈາກເຂື່ອນຊະນະຄາມ] ທີ່ອາຈເກີດຂຶ້ນ ໃນອະນາຄົດ ເນື່ອງຈາກ ທີ່ຕັ້ງຂອງເຂື່ອນ ຊະນະຄາມ ຢູ່ໃກ້ຊາຍແດນໄທຍຫຼາຍ ຄືມີໄລຍະຫ່າງ ພຽງແຕ່ 2 ກິໂລເມັຕ.
ສຳນັກຂ່າວດັ່ງກ່າວ ອ້າງຄຳເວົ້າຂອງ ພົລເອກ ປະວິດ ວົງສຸວັນ, ຮອງນາຍົກຣັຖມົນຕຣີ ຝ່າຍຄວາມໝັ້ນຄົງ ຂອງໄທຍ ວ່າ ຈະມີການ ພິຈາຣະນາ ຄວາມເໝາະສົມອີກຄັ້ງ ເພື່ອໃຫ້ເກີດ ຄວາມຄອບຄຸມ ໃຫ້ຫຼາຍຂຶ້ນ, ໂດຍຈະມີ ການເຊີນຜູ້ແທນ ປະເທດລາວ ເພື່ອມາໃຫ້ຂໍ້ມູນ ແລະ ຕອບຄຳຖາມ ພາກປະຊາຊົນ.
ເຂື່ອນຊະນະຄາມ ເປັນຂອງບໍຣິສັດ ພະລັງງານໄຟຟ້ານ້ຳຕົກ ຕ້າຖາງລາວ ຊະນະຄາມ ຈຳກັດ ທີ່ມີກຳລັງການຜລິຕ 684 ເມກະວັຕ. ມີມູລຄ່າປະມານ 2 ຕື້ໂດລ້າຣ, ຈະສົ່ງຜົລກະທົບ ຕໍ່ປະຊາຊົນ ຢູ່ແຂວງວຽງຈັນ ແລະ ແຂວງໄຊຍະບູຣີ ເກືອບ 3,000 ຄົນ.
ໂຄງການ ເຂື່ອນຊະນະຄາມ ໄດ້ເຣີ່ມຂະບວນການ ເປິກສາຫາລື ກ່ອນລ່ວງໜ້າ ນັບແຕ່ວັນທີ 30 ກໍຣະກະດາ ໄປເປັນເວລາ 6 ເດືອນ.