ພະນັກງານ ສະຖານີຣົຖໄຟ ລາວ-ຈີນ ຊື້ປີ້ຣົຖໄຟ ຂາຍຕໍ່

ພະນັກງານຈໍານວນນຶ່ງ ທີ່ເຮັດວຽກຢູ່ໃນສະຖານີຣົຖໄຟ ລາວ-ຈີນ ແຕ່ລະແຫ່ງ ຊື້ປີ້ຣົຖໄຟ ໃຫ້ຄົນຮູ້ຈັກກັນ ຫລືໃຫ້ຜູ້ທີ່ຢາກໄດ້ ປີ້ຣົຖໄຟດ່ວນ ໂດຍຄິດຄ່າບໍຣິການແຕ່ 30 ​ພັນກີບຫາ 50 ພັນກີບຕໍ່ຄົນ, ເຮັດໃຫ້ຜູ້ໂດຍສານຫລາຍຄົນ ທີ່ລຽນແຖວລໍຖ້າຊື້ ບາງມື້ກໍບໍ່ໄດ້ປີ້ຣົຖໄຟ ຍ້ອນປີ້ໝົດກ່ອນ, ອີງຕາມຄໍາເວົ້າຂອງປະຊາຊົນລາວນາງນຶ່ງ ຕໍ່ວິທຍຸເອເຊັຽເສຣີ ໃນມື້ວັນທີ 15 ກຸມພານີ້.

“ແມ່ລະທີ່ວ່າຂະເຈົ້າກັກປີ້ໄວ້ ກະມີ ເຈົ້າກະເຫັນ ກະເຫັນມີ ຊ່ວງນີ້ກະຍັງຢູ່ຣົຖໄຟ.”

ຊາວລາວອີກຄົນນຶ່ງ ທີ່ເຄີຍໄປຊື້ປີ້ຢູ່ສະຖານຣົຖໄຟລາວ-ຈີນ ກໍເວົ້າວ່າ ຕົນເອງກໍເຄີຍໄດ້ຊື້ປີ້ຣົຖໄຟ ນໍາພະນັກງານ ທີ່ເຮັດວຽກຢູ່ສະຖານີຣົຖໄຟລາວ-ຈີນ ໂດຍໄດ້ເສັຍຄ່າບໍຣິການເພີ່ມ ເທື່ອລະປະມານ 30 ພັນກີບຫາ 50 ພັນກີບຕໍ່ຄົນ ແລະກໍເຫັນພະນັກງານຣົຖໄຟ ຫລາຍຄົນ ທີ່ເຮັດຄືແນວນັ້ນ.

“ເຮົາຊື້ຕໍ່ນ່າ ເກັບບວກຂຶ້ນ 260 ພັນກີບ ກະບໍ່ໄດ້ລຽນແຖວ ສົ່ງໃຫ້ເລີຍສົ່ງເຖິງທີ່ເລີຍ.”

ໃນຂະນະດຽວກັນ ປະຊາຊົນລາວອີກນາງນຶ່ງ ກໍເວົ້າໃນມື້ດຽວກັນນັ້ນວ່າ ຢູ່ຕາມສະຖານີຣົຖໄຟລາວ-ຈີນຫລາຍແຫ່ງ ກໍມີກົດລະບຽບກ່ຽວກັບການຊື້ປີ້ຣົຖໄຟລ່ວງໜ້າ ໂດຍຫ້າມບໍ່ໃຫ້ພະນັກງານ ພາຍໃນສະຖານີ ຊື້ປີ້ຣົຖໄຟ ເພື່ອເອົາໄປຂາຍຕໍ່ ຫາເງິນເຂົ້າຖົງໂຕເອງ ຊຶ່ງຕົນກໍຢາກໃຫ້ພາກສ່ວນທີ່ກ່ຽວຂ້ອງ ກວດສອບເຣື່ອງນີ້ ເພື່ອຄວາມເປັນລະບຽບ.

“ເຮັດບໍ່ໄດ້ ຂະເຈົ້າມີກົດລະບຽບ ສຸກ-ເສົາ ແຮງໝົດໄວ ມື້ທັມດາຫັ້ນບໍ່ຄ່ອຍປານໃດ ມັນໝົດໄວຫຍູ້ງຍາກຫັ້ນແຫລະ ດົນເປັນຊົ່ວໂມງ.”

ແລະຊາວລາວອີກນາງນຶ່ງ ທີ່ເຄີຍໄປຊື້ປີ້ຣົຖໄຟນັ້ນກໍເວົ້າຕໍ່ ວິທຍຸເອເຊັຽເສຣີ ກ່ຽວກັບເຣື່ອງພະນັກງານສວຍໂອກາດຊື້ປີ້ຣົຖໄຟໄປຂາຍຕໍ່ນັ້ນວ່າ ຕົນກໍບໍ່ທັນເຫັນຕົວຈິງ ຖ້າເປັນຄືແນວນັ້ນແທ້ ຕົນເຊື່ອວ່າ ເປັນສາເຫດນຶ່ງ ທີ່ເຮັດໃຫ້ປີ້ຣົຖໄຟລາວ-ຈີນ ມັກຂາຍໝົດໄວໃນບາງມື້ ຊຶ່ງທາງທີ່ດີແລ້ວ ຄິດວ່າ ຄວນແກ້ໄຂບັນຫານີ້ ດ້ວຍການຂາຍປີ້ຣົຖໄຟ ຜ່ານທາງລະບົບອອນລາຍນ໌.

“ເຮົາກະເວົ້າບໍ່ໄດ້ເນາະ ເພາະເຮົາບໍ່ເຫັນໂຕຈິງ ແຕ່ຊ່ວງນີ້ກະບາງມື້ເນາະ ເຮົາກະບໍ່ໄດ້ເນາະ ເພາະວ່າຍັງບໍ່ມີລະບົບບອອນລາຍນ໌ ຢ້ານຕ່າງຄົນຕ່າງໄປລຽນຄິວເນາະ ບາງມື້ກະລຽນໄປກະບໍ່ໄດ້.”

ກ່ຽວກັບເຣື່ອງທີ່ວ່ານີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາບໍຣິສັດທາງຣົຖໄຟລາວ-ຈີນ ຈໍາກັດເພື່ອຂໍຮູ້ກ່ຽວກັບແນວທາງແກ້ໄຂບັນຫາທີ່ວ່ານັ້ນ ແລະມາຕການລົງໂທດພະນັກງານ ຜູ້ທີ່ກະທໍາຜິດກົດລະບຽບ, ແຕ່ເຈົ້າໜ້າທີ່ທີ່ກ່ຽວຂ້ອງ ຍັງບໍ່ສະດວກທີ່ຈະໃຫ້ຄໍາເຫັນ.

ແຕ່ເຖິງຢ່າງໃດກໍຕາມ ເຈົ້າໜ້າທີ່ລາວທ່ານນຶ່ງ ທີ່ຮູ້ເຣື່ອງນີ້ ກໍເວົ້າຕໍ່ ວິທຍຸເອເຊັຽເສຣີ ໃນມື້ວັນທີ 15 ກຸມພານີ້ວ່າ ໃນການແກ້ໄຂບັນຫາ ພະນັກງານປະຈໍາສະຖານີຣົຖໄຟ ແລະຄົນທີ່ຊື້ປີ້ໄວ້ຂາຍໃຫ້ຄົນຮູ້ຈັກກັນ ແລະຜູ້ທີ່ຕ້ອງການຂີ່ຣົຖໄຟດ່ວນນັ້ນ ທາງການກໍບໍ່ໄດ້ເມີນ ເສີຍ ແລະກໍມີບົດລົງໂທດພະນັກງານ ທີ່ສວຍໂອກາດເຮັດຄືແນວນັ້ນ ເພາະຖືວ່າ ເປັນການສ້າງຄວາມເຊື່ອມເສັຍ ໃຫ້ມີພາບພົດອັນບໍ່ດີ.

“ສິແມ່ນຢູ່ໃນໝູ່ພະນັກງານຂອງເຂົາ ໄປເລາະຫາຊື້ປີ້ໄວ້ແລ້ວຖ້າຜູ້ໃດຟ້າວຫັ້ນ ຂາຍໃຫ້ຜູ້ນັ້ນ ເພາະວ່າໃນຊ່ວງນີ້ຫັ້ນຊື້ປີ້ຍາກ ສວຍ ໂອກາດເດ້ ເພິ່ນກະປັບຫລືວ່າຖືກວິນັຍ ຖືກໂທດຫັ້ນແຫລ້ວ ກະທໍາຜິດທາງອາຍາແລ້ວໄດ໋ ທາງການເຮົາກະບໍ່ໄດ້ລົດລະດອກ ໂຕນີ້.”

ນອກຈາກບັນຫາທີ່ວ່ານັ້ນແລ້ວ ກໍຍັງມີຄົນຈໍານວນນຶ່ງ ໄປລຽນແຖວຊື້ປີ້ຣົຖໄຟ ຢູ່ຕາມສະ ຖານີຕ່າງໆ ເພື່ອນໍາໄປຂາຍຕໍ່ໃຫ້ຜູ້ໂດຍສານ ທີ່ບໍ່ຢາກໄປລຽນແຖວຊື້ປີ້ເອງ ໂດຍຄິດຄ່າບໍຣິການແຕ່ 20 ພັນກີບຫາ 30 ພັນກີບຕໍ່ຄົນ ຊຶ່ງເກີດມີບັນຫາ ເຣື່ອງການຂາຍປີ້ ໃຫ້ຜູ້ທີ່ໃຫ້ຄ່າບໍຣິການ ຫລາຍກວ່າຕາມມາ. ດັ່ງນັ້ນ ປະຊາຊົນລາວ ຜູ້ໃຊ້ສື່ສັງຄົມອອນລາຍນ໌ ຫລາຍຄົນຈຶ່ງເຫັນວ່າ ນັ້ນເປັນບັນຫາສໍາຄັນ ທີ່ພາກ ສ່ວນກ່ຽວຂ້ອງ ຈະຕ້ອງໄດ້ແກ້ໄຂຢ່າງຮີບດ່ວນ ກ່ອນທີ່ຈະເປີດປະເທດ ຕ້ອນຮັບນັກທ່ອງທ່ຽວນີ້.

ບໍຣິສັດທາງຣົຖໄຟ ລາວ-ຈີນຈໍາກັດ ໄດ້ອອກແຈ້ງການວ່າ ນັບຕັ້ງແຕ່ມື້ວັນທີ 14 ກຸມພາ 2022 ນີ້ເປັນຕົ້ນໄປ ຈະນໍາໃຊ້ຂະບວນຣົຖໄຟ RMU 1 ຂະບວນແລ່ນຈາກ ນະຄອນຫລວງວຽງຈັນ ຫາບໍ່ເຕັນ ດ້ວຍຖຽວຣົຖໄຟ C82/1 1 ຄູ່ ໂດຍໃຫ້ບໍຣິການ 7 ສະຖານີ ຄືສະຖານີ ນະຄອນຫລວງວຽງຈັນ, ໂພນໂຮງ, ວັງວຽງ, ຫລວງພຣະບາງ, ເມືອງໄຊ, ນາເຕີຍ ແລະສະຖານີ ບໍ່ເຕັນ ແລະແລ່ນຈາກນະຄອນຫລວງວຽງຈັນ ຫາຫລວງພຣະບາງ ດ້ວຍຖ້ຽວຣົຖໄຟ C84/3 ອີກ 1 ຄູ່ ໂດຍໃຫ້ບໍຣິການພຽງ 3 ສະຖານີ ຄືສະຖານີ ນະຄອນຫລວງວຽງຈັນ, ວັງວຽງ ແລະສະຖານີຫລວງພຣະບາງ.