ຜົລກະທົບ ຫົວອາຫານ ແພງຂຶ້ນ, ແຕ່ລາຄາໝູຖືກລົງ
2021.12.15
RFA
ປັດຈຸບັນ ຜູ້ປະກອບການລ້ຽງໝູຫຼາຍຄົນ ໄດ້ຮັບຜົລກະທົບໃນເຣື່ອງລາຄາຂາຍໝູ ຢູ່ໜ້າຟາມ ລາຄາຖືກລົງຫຼາຍ ແລະ ບາງຄົນ ກໍຖືກພໍ່ຄ້າ-ແມ່ຄ້າ ຄົນກາງ ກົດລາຄາ ເຫຼືອພຽງ 18,000-20,000 ກີບ ຕໍ່ກິໂລກຼາມ ຖ້າຄິດໄລ່ ຄ່າຫົວອາຫານ, ຄ່າລ້ຽງໝູ ກໍຖືວ່າຂາດທຶນ. ຫຼາຍຄົນຕ້ອງຍອມຂາຍໝູອອກ ເຂົາເຈົ້າຕ້ອງປະສົບລາຄາຫົວອາຫານແພງ ຊຶ່ງບາງຮ້ານຂາຍຫົວອາຫານ 105,000 ກີບ ຕໍ່ກະສອບ ຈາກແຕ່ກ່ອນ 101,000 ກີບ ຕໍ່ກະສອບ. ຜູ້ລ້ຽງໝູ ທ່ານນຶ່ງ ຢູ່ແຂວງ ສວັນນະເຂດ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 14 ທັນວາ ວ່າ:
”ກະທົບຢູ່ໃດ ເຣື່ອງລາຄາ ແບບວ່າ ຫົວອາຫານ ກໍແພງ ເນາະ ບາດນີ້ລາຄາ ພັດຖືກ ແຕ່ລະເທື່ອ ມີແມ່ຄ້າກົດລາຄາ ກິໂລລະ 20,000 ກີບ ແບບນີ້ ກົດຈົນແບບຂາຍບໍ່ອອກ ຂາຍບໍ່ໄດ້ ເລີຍ ລາຄາທີ່ເພິ່ນຢາກໄດ້ນ່າ ພັດເຮົາມາໄລ່ ໃສ່ການດູແລມັນ ພັດກວ່າເລີຍເດ້ ບາງເທື່ອກໍຍອມເດ້ ແບ່ງຂາຍຫັ້ນນ່າ ເຮົາພັດຝືນບໍ່ໄດ້ເນາະ ໝູເຮົາກໍລ້ຽງມາເຫີງ ເຮາກໍຢາກໄດ້ເງິນ ຍອມຫຼຸບ.
ທ່ານກ່າວຕື່ມວ່າ ຖ້າຫາກເປັນໄປໄດ້ ກໍຢາກຂາຍໝູ ຢູ່ໜ້າຟາມ ໃນລາຄາປະມານ 24,000-25,000 ກີບຕໍ່ກິໂລກຼາມ ກໍຍັງບໍ່ພໍໄດ້ທຶນຄືນ. ໃນໄລຍະນີ້ ເຈົ້າຂອງຟາມຂາຍໝູອອກຫຼາຍ ແລະ ມີພໍ່ຄ້າຄົນກາງມາຮັບຊື້ໝູ່ຢູ່ໜ້າຟາມໃນລາຄາ 15 ພັນ ກີບ ຕໍ່ກິໂລກຼາມ ຕ່ຳສຸດ ຊຶ່ງເປັນລາຄາທີ່ຖືກ ໃນຂນະທີ່ຫົວອາຫານຢູ່ບາງຮ້ານ ກໍຂາຍໃນລາຄາ 108,000 ກີບ ຕໍ່ກະສອບ. ຜູ້ລ້ຽງໝູອີກທ່ານນຶ່ງ ຢູ່ນະຄອນຫລວງວຽງຈັນ ໄດ້ກ່າວວ່າ:
“ຂາຍກໍບໍ່ໄດ້ຊ້ວງນີ້ ເຂົາກົດລາຄາ ບາງຄົນ ໃຫ້ 18,000 ກີບ ບາງຄົນຍັງໃຫ້ 15,000 ກີບ [ຕໍ່ກິໂລກຼາມ] ເຂົາໃຫ້ ຂ້ອຍຂາຍບໍ່ໄດ້ ອາຫານກໍຂຶ້ນ ມາຕລອດນ່າ ຕັ້ງແຕ່ຊ້ວງຕົ້ນປີ ແສນປາຍ ດຽວນີ້ ຂຶ້ນ 107,000 ກີບ 108,000 ກີບ ແລ້ວ ລະເຮົາກະບໍ່ມີບ່ອນສົ່ງ ມັນຢາກໂທຫາແມ່ຄ້າໃດ ກະປາກົດວ່າ ລັກຊະນະ ຄືເຂົາລົມກັນ ພໍ່ຄ້າຄົນກາງນີ້.”
ນອກຈາກນີ້ ຜູ້ລ້ຽງປາກະຊັງ ກໍປະສົບກັບບັນຫາ ຍ້ອນວ່າ ຫົວອາຫານແພງ ກະສອບນຶ່ງຂາຍໃນລາຄາ 107,000 ຫາ 108,000 ກີບ ຈາກແຕ່ກ່ອນຂາຍ 103,000 ກີບ ແລະ ສ່ວນນຶ່ງ ກໍມີຄົນຂາຍຫຼາຍຂຶ້ນໃນໄລຍະໂຄວິດ-19 ຣະບາດ. ຜູ້ລ້ຽງປາກະຊັງ ໄດ້ກ່າວວ່າ:
”ກໍກະທົບຫຼາຍ ຈາກທີ່ເຮົາເຄີຍ ໄດ້ຂາຍດີ ຂາຍໄດ້ຫຼາຍແສນໂຕຊິ ເຮົາກະບໍ່ໄດ້ຂາຍ ເຂົາເຈົ້າກະບໍ່ກ້າຊື້ ຈາກທີ່ເຂົາເຈົ້າວ່າປີນີ້ຈະຊີ້ 3,000 ກີບ ແຕ່ກໍຫຼຸດລົງເຫຼືອ 1,000 ດຽວ ຈັ່ງຊິ ເຂົາເຈົ້າເກັບເງິນໄວ້ໃຊ້ຍາມໂຄວິດເດ້ ປັດຈຸບັນ ກະຄົນຂາຍຫຼາຍຂາຍລາຄາຖືກ.”
ຢູ່ແຂວງສວັນນະເຂດ ເຈົ້າໜ້າທີ່ມີແຜນການຕັ້ງສະຫະກອນ ເພື່ອໃຫ້ຜູ້ຊື້-ຜູ້ຂາຍ ຮູ້ລາຄາຊື້-ຂາຍຮ່ວມກັນ. ເຈົ້າໜ້າທີ່ກະສິກັມ ແລະ ປ່າໄມ້ ແຂວງສວັນນະເຂດ ໄດ້ກ່າວວ່າ:
”ບັນຫາ ທີ່ເຮົາເຈີ ຢູ່ຕລອດ ກໍຍັງມີຄວາມຫຍຸ້ງຍາກ ດຽວນີ້ ຫັ້ນນ່າ ສິ່ງທີ່ເຮົາ ພຍາຍາມ ເຮັດກໍຄື ຢາກຈັດຕັ້ງກຸ່ມ ສຫະກອນຂອງເຂົາເຈົ້າຫັ້ນນ່າ ໃຫ້ມັນເຂັ້ມແຂງ ລວມທັງກຸ່ມຜູ້ລ້ຽງ ລວມທັງຜູ້ຈຳໜ່າຍ ມັນຍັງບໍ່ໄປພ້ອມກັນຢູ່.”
ຢູ່ນະຄອນຫລວງວຽງຈັນ ເຈົ້າໜ້າທີ່ຈະເຄັ່ງຄັດເຣື່ອງລະບຽບການຫຼັກອະນາໄມ ແລະ ການລ້ຽງຕ້ອງມີຄຸນນະພາບ. ເຈົ້າໜ້າຜແນກກະສິກັມ ແລະ ປ່າໄມ້ ນະຄອນຫລວງວຽງຈັນ ໄດ້ກ່າວວ່າ:
”ກ່ອນເຮົາຈະລ້ຽງໝູນ່າ ທັມມະດາ ພວກເຮົາ ສະມາຄົມ ເຂົາຈະຕ້ອງຕລາດ ຮອງຮັບ ຢູ່ແລ້ວ ຈັ່ງລ້ຽງບໍ່ແມ່ນວ່າ ຢູ່ຊື່ໆ ກະລ້ຽງໄປ ມັນຕ້ອງມີການສັນຍາກັບພວກໂຮງຂ້າສັດ ເພື່ອໄປປ້ອນຕລາດ ເຮົາຊຸກຍູ້ດຽວນີ້ ຟາມທີ່ມີຄວາມປອດໄພສູງ.”
ໃນຂະນະທີ່ ລາຄາຊີ້ນໝູຢູ່ຕລາດ ນະຄອນຫລວງວຽງຈັນ ຂາຍໃນລາຄາ 70,000 ກີບ ຕໍ່ກິໂລກຼາມ ຈາກແຕ່ກ່ອນ 45,000 ກີບ ຕໍ່ກິໂລກຼາມ ແລະ ຊາວບ້ານບາງຄົນ ກໍບໍ່ກ້າຊື້ກິນ ເພາະມັນແພງ. ຊາວນະຄອນຫລວງວຽງຈັນ ໄດ້ ກ່າວວ່າ:
”ເອີກະແພງ ຢູ່ ຊີ້ນສົດລະ 70,000 ພັນ ກີບ ເຂົາເຈົ້າວ່າ ຮັບມາແພງ ເຮົາກະວ່າ ມັນແພງຫັ້ນແຫຼະ ກະຫຼຸດລົງ ບໍ່ກິນໝູຫຼາຍ ເຮົາລ້ຽງເປັດ ລ້ຽງໄກ່ ຢູ່ເຮືອນເຮົາ ຄັນປານິນກະຊັງ ກິໂລກຼາມ ລະ 22,000 ກີບ ສິນຄ້າ ເຂົາເຈົ້າຂຶ້ນໆ ລົງໆ ທຸກໆ ຕລາດກະເປັນໝົດ.”
ທ່ານ ກ່າວຕື່ມວ່າ ບັນດາປານິນ ຫຼື ປາຊະນິດອື່ນ ທີ່ລ້ຽງໃນກະຊັງ ກໍບໍ່ແພງຫຼາຍ ຖືວ່າປົກຕິ. ສຳລັບລາຄາ ຂາຍຊີ້ນໝູ ທີ່ກະຊວງອຸດສາຫະກັມ ແລະ ການຄ້າ ໄດ້ກຳນົດໄວ້ ໃນໄລຍະກາງປີ 2021 ນີ້ ຊີ້ນໝູປະເພດ 1 ຂາຍໃນລາຄາບໍ່ເກີນ 48 ພັນ ກີບ ຕໍ່ກິໂລກຼາມ, ສ່ວນຊີ້ນໝູໜ້າຟາມ ຂາຍໃນລາຄາ ຕໍ່າສຸດ ບໍ່ໃຫ້ຫຼຸດ 25,000 ກີບ ຕໍ່ກິໂລກຼາມ ແລະ ບໍ່ໃຫ້ເກີນ 27,000 ກີບ ຕໍ່ກິໂລກຼາມ.