ກະແສຂ່າວທ້ອງຖີ່ນ ລາຍງານວ່າ ເມື່ອມໍ່ໆມານີ້ ຫ້ອງການຣັຖບານ ໄດ້ອອກແຈ້ງການ ໂດຍອິງຕາມດຳຣັດ ນາຍົກຣັຖມົນຕຣີ ໃຫ້ປະຕິບັດ ມາຕການຕໍ່ບໍຣິສັດ ສົ່ງໄມ້ທ່ອນອອກຕ່າງປະເທດ ທີ່ບໍ່ຖືກຕ້ອງຕາມກົດໝາຍ ຢູ່ດ່ານພາສີລະໄລ ແຂວງສາຣະວັນ ຕາມທີ່ກະຊວງການເງິນ ສເນີມາຢ່າງເຂັ້ດງວດ. ໃນມາຕການດັ່ງກ່າວ ກໍແມ່ນວ່າ:
1-ໄດ້ສັ່ງໃຫ້ກົມພາສິີ ເຊີນບໍຣິສັດຜູ້ສົ່ງໄມ້ອອກ ຊື່ງລ້ວນແຕ່ເປັນ ບໍຣິສັດຈາກວຽດນາມ ໃຫ້ມາຮັບຮູ້ຜົລຂອງການກວດກາ ຂໍ້ມູນການສົ່ງໄມ້ ອອກ ທີ່ບໍ່ຖືກຕ້ອງຕາມຣະບຽບກົດຫມາຍ.
2-ໃຫ້ກະຊວງການເງີນອອກໃບສັັ່ງລາຍຮັບງົປມານ ເປັນຕົ້ນພາສີພິເສດ 30% ແລະຄ່າປັບໄຫມ 30% ຖ້າມີການຝ່າຝືນ ຕາມໂຕເລກທີ່ໄດ້ ຕົກລົງກັນໄວ້ ກັບບໍຣິສັດຜູ້ສົ່ງໄມ້ອອກ.
3- ບໍຣິສັດໃດຫາກບໍ່ຍອມ ປະຕິບັດຕາມ ກໍໃຫ້ດຳເນີນການ ປະກອບເອກກະສານ ເພື່ອຟ້ອງສານ ຕາມກະບວນການຍຸຕິທັມຂອງ ປະເທດ.
4-ກ່ຽວກັບການປະຕິບັດວິນັຍ ຕໍ່ເຈົ້າຫນ້າທີ່ຣັຖ ມອບໃຫ້ເປັນພາລະ ຂອງຄນະພັກກະຊວງການເງີນ ເປັນຜູ້ປະຕິບັດມາຕການ ໃຫ້ຂຽນເປັນ ຮ່າງຄວາມຮັບຜິດຊອບ ໂດຍຈະມີການໂຍກຍ້າຍ ແລະສັບປ່ຽນ ເຈົ້າຫນ້າທີ່ພາສິີຜູ້ທີ່ຝ່າຝືນ ແລະປັບປຸງມາຕຖານຄວາມຮັບຜິດຊອບ ຂອງ ຫນ່ວຍງານພາສີໃຫມ່ ໂດຍເລືອກເອົາບຸກຄົນ ຜູ້ທີ່ມີຄວາມຊື່ສັດ ແລະມີຄວາມຮູ້ຄວາມສາມາດມາເປັນຜູ້ດຳເນີນງານ.
5-ເຈົ້າຫນ້າທີ່ທ້ອງຖີ່ນ ຜູ້ທີ່ມີສ່ວນພົວພັນ ແລະສົມຮູ້ຮ່ວມຄິດ ກັບກຸ່ມຄ້າໄມ້ ທີ່ລະເມີດກົດຫມາຍ ແລະສ້າງຄວາມສັຽຫາຍ ໃຫ້ແກ່ປະເທດ ຊາດນັ້ນແມ່ນມອບໃຫ້ເປັນພາລະຂອງຂແນງການ ທີ່ກ່ຽວຂ້ອງ ເປັນຜູ້ດຳເນີນການກວດກາ ຄວາມຮັບຜິດຊອບ ແລະ ລົງໂທດຫລືໃສ່ວິນັຍ ຕາມຣະບຽບການ.
ນັກວິເຄາະເວົ້າວ່າການອອກວິນັຍຂອງຣັຖບານລາວທີ່ຜ່ານມາ ບໍ່ມີຄວາມສັກສິດ ຍ້ອນຂາດປະສິດທິພາບ ໃນການບັງຄັບໃຊ້ ຜູ້ກະທຳຜິດ ສ່ວນໃຫຍ່ຍັງລອຍນວນຢູ່.