ອັດຕຣາເງິນເຟີ້ໃນເດືອນມົກກະຣາ ຫາ ເດືອນພຶສພາ ປີ 2022 ສະເລັ່ຽ ແລ້ວ ເກືອບ 9 ເປີເຊັນ ຕໍ່ເດືອນ ອີງຕາມຂໍ້ມູນຈາກ ຈາກທະນາຄານແຫ່ງ ສປປ ລາວ.
ຂໍ້ມູນຈາກທະຫນາຄານແຫ່ງ ສປປ ລາວ ໄດ້ລະບຸ ອັດຕຣາເງິນເຟີ້ ຄື:
- ເດືອນມົກກະຣາ ອັດຕຣາເງິນເຟີ ຢູ່ທີ່ 6.25 ເປີເຊັນ
- ເດືອນກຸມພາ ອັດຕຣາເງິນເຟີ 7.31 ເປີເຊັນ
- ເດືອນມີນາ 8.54 ເປີເຊັນ
- ເດືອນເມສາ 9.86 ເປີເຊັນ
- ເດືອນພຶສພາ 12.81 ເປີເຊັນ
ໃນຂະນະທີ່ອັດຕຣາແລກປ່ຽນເງິນ ຢູ່ ທະນາຄານການຄ້າຕ່າງປະເທດລາວ ໃນວັນທີ 8 ມິຖຸນາ ຢູ່ທີ່ 495.99 ກີບ ຕໍ່ 1 ບາດ ແລະ 14,364 ກີບ ຕໍ່ 1 ໂດລ້າຣ໌.
ສ່ວນວ່າ ອັດຕຣາປ່ຽນເງິນ ຢູ່ຮ້ານແລກປ່ຽນນອກລະບົບ ຢູ່ທີ່ 500 ປາຍ ກີບຕໍ່ 1 ບາດ ແລະ 16,000 ປາຍກີບ ຕໍ່ 1 ໂດລ້າຣ໌ ແລ້ວ.
ນັກທຸຣະກິຈ ແລະ ປະຊາຊົນລາວ ຈຳນວນນຶ່ງເຫັນວ່າ ການຄຸ້ມຄອງເງິນຕຣາ ຕ່າງປະເທດ ຢູ່ລາວ ມີຄວາມຫຍຸ້ງຍາກ ແລະ ບໍ່ສາມາດຄວບຄຸມໄດ້ ຍ້ອນວ່າ ການແລກປ່ຽນເງິນຕຣາ ມີຢູ່ທົ່ວທຸກບ່ອນ ທັງນອກລະບົບ ແລະ ໃນລະບົບ.
ນັກທຸຣະກິຈ ທ່ານ ນຶ່ງ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ວິທຍຸເອເຊັຽເສຣີ ວ່າ: "ຊິຄຸມໄດ້ຈັ່ງໃດ ເງິນມັນບໍ່ມີ, ເງິນບໍ່ເຂົ້າມາ ບໍ່ໄດ້ດອກ ຄຸມຈັ່ງໃດກະບໍ່ໄດ້ດອກ ເງິນມັນບໍ່ເຂົ້າທະນາຄານ ເງິນຢູ່ນອກ ຊິຄຸມຈັ່ງໃດໄດ້."
ທ່ານ ກ່າວຕື່ມອີກວ່າ: "ມັນໃຊ້ຈ່າຍຊະຊາຍຢູ່ດຽວນີ້ນະ ຄືໄທຍ ນີ້ມັນບໍ່ມີສາຂາເລີຍ ມັນບໍ່ໃຫ້ເລີຍ ເຮົາເອົາເງິນຫຼຽນໄປຊື້ ເຂົາບໍ່ເວົ້າເລີຍ ເຂົ້າຕ້ອງໃຫ້ໄປແລກເປັນເງິນບາດ, ແຕ່ ຢູ່ລາວ ຄຸມບໍ່ໄດ້ ແກ້ບໍ່ຕົກດອກ ມັນອັນຕລາຍນຳພວກຮ້ານແຕກເງິນນີ້ລະ ມັນອັນຕລາຍ ບໍ່ໄດ້ແກ້ບໍ່ຕົກລະໂຕນີ້."
ຮ້ານແລກປ່ຽນເກີດຂຶ້ນປານເຫັດ ປານປວກ ທັງນອກ ແລະ ໃນລະບົບ ເຊິ່ງມີການແລກປ່ຽນເງິນ ຢ່າງຊະຊາຍ.
ປະຊາຊົນຊາວ ນະຄອນຫລວງວຽງຈັນ ທ່ານຶ່ງ ໄດ້ໃຫ້ສຳພາດຕໍ່ເອເຊັຽເສຣີ ວ່າ:
ນັກຂ່າວ: ເປັນຈັ່ງໃດ ການຄຸ້ມຄອງເງິນຕຣາ ຄຶດວ່າ ເພິ່ນຊິເຮັດໄດ້ຢູ່ເບາະ ຢູ່ບ້ານເຮົາ?
ຊາວນະຄອນຫລວງວຽງຈັນ: "ໂອ້ຍ ຈັກມັນຊິຄຸມແນວໃດເນາະ ອັນ ຄັນວ່າ ມັນຊິຄຸມແທ້ໆ ຫັ້ນນ່າ ຮ້ານແລກປ່ຽນບໍ່ ອາແມ່ນຫຍັງເກາະ ເກີດຂຶ້ນປານເຫດ ປານປວກ ເອົາແຕ່ເຂົາຊິເຮັດໄປ.
ຄັນ ວ່າ ມັນເປັນເອກະພາຍກັນແທ້ເນາະ ເອີ ຜູ້ໃດມີເງິນຕຣາ ຢາກໄປປ່ຽນ ໃຫ້ໄປປ່ຽນທະນາຄານ ທະນາຄານພັດບໍ່ຕອບສນອງໃຫ້ ບາດນີ້ ມັນກະຮ້ານນ້ອຍເກີດຂຶ້ນລະ. ເປັນແບບນີ້ ແຕ່ໃດມາແລ້ວ ແຕ່ບ້ານເຮົາມັນມົ້ວ ແຕ່ວ່າ ເພິ່ນເວົ້າໄວ້ ງາມດູດີ ວ່າເພິ່ນຊິຄວບຄຸມໄດ້ຫັ້ນ ໂອ້ຍ ເບິ່ງໂຕຈິງລະຈັກ ຊິຄຸ້ມຈັ່ງໃດ."
ນັກຂ່າວ: ເປັນຈັ່ງໃດຊັ້ນນະ ຢູ່ຈັ່ງໃດກິນຈັ່ງໃດຊັ້ນນະ ຂັ້ນມາເຟີຈັ່ງຊີ້?
ຊາວນະຄອນຫລວງວຽງຈັນ: "ກະຈຳເປັນແຫຼະ ເສຖກິຈເຈົ້າແນວນີ້ ວຽກງານເຈົ້າແນວນີ້ ເປັນບໍ່. ພາສປອດ ກະພໍພາສປອດ ພາກັນຫຼັ່ງໄຫຼໄປໄທຍໝົດ. ເຈົ້າເປັນຫຍັງ ເຈົ້າບໍ່ມີວຽກເຮັດງານທຳ ໃຫ້ເຂົາ ຄັນວ່າ ມີເງິນເດືອນມັນກະບໍ່ກຸ້ມກິນ ເອົາເງິນເດືອນລ້ານປາຍ ຄືເງິນໂດລ້າຣ໌ ຫັ້ນລະ ດຽວນີ້ ມັນບໍ່ແມ່ນ."
ນັກຂ່າວ: ຄັນຊັ້ນກະວຸ້ນຕົ່ວບ້ານເຮົານະ?
ຊາວນະຄອນຫລວງວຽງຈັນ: "ໂອ້ ບໍ່ວຸ້ນແນວໃດເນາະ ເພິ່ນກະວ່າ ບໍ່ໃຫ້ແຕກຕື່ນ ເພິ່ນເວົ້າໝໍ ອັນນັ້ນຫັ້ນ ຈິຕສາຕ ພັດວ່າ ຈິຕສາຕ ຜີບ້າມັນຫຍັງ ເຂົາວ່າ ໂຣກປະສາຕຫັ້ນຕີ້. ຄືເບິ່ງຂ່າວເບິ່ງຫຍັງຫັ້ນລະ ເພິ່ນເວົ້າຫັ້ນ ບໍ່ມີນ້ຳມັນໃສ່ຣົຖ ພາລູກພາເຕົ້າໄປໂຮງຮ່ຳ ໂຮງຮຽນ ບໍ່ໄດ້ ກະບໍ່ໃຫ້ຕື່ນເຕັ້ນ ບໍ່ໃຫ້ຕື່ນຕນົກ ມັນເປັນຈິຕສາຕ ປະຊາຊົນຫາກຄິດໄປເອງ ເຂົາດ່າເພິ່ນໝົດທົ່ວປະເທດຕົ່ວຫັ້ນນ່າ."
ປະຊາຊົນ ຍັງບໍ່ມີຄວາມໝັ້ນໃຈວ່າ ການຄຸ້ມຄອງ ເງິນຕຣາຕ່າງປະເທດ ຈະໄປລອດ ເຖິງວ່າ ນາຍົກຣັຖມົນຕຣີ ໄດ້ແຕ່ງຕັ້ງຄະນະຮັບຜິດຊອບ ມາແກ້ໄຂບັນຫາເງິນເຟີ້ ກໍຕາມ.
ຊາວນະຄອນຫລວງວຽງຈັນ ອີກທ່ານນຶ່ງ ໄດ້ໃຫ້ສຳພາດຕໍ່ວິທຍຸເອເຊັຽເສຣີ ວ່າ: "ກະຫັ້ນແຫຼະ ອັນໃດກະຂຶ້ນລາຄາ ມັນຊິໄປລອດບໍ້ຈັ່ງວ່າ ໄດ້ຍິນວ່າ ນາຍົກເພິ່ນແຕ່ງຕັ້ງ ຄະນະຮັບຜິດຊອບວ່າຊັ້ນ.
ຈັ່ງ ວ່າ ຊິໄປລອດບໍ່ ຈັ່ງວ່າ ຟັງຢູ່ນີ້ ກະຫຍຸ້ງຢູ່ ບ້ວງເງິນລາຍຮັບ ມັນບໍ່ເຂົ້າທະນາຄານນີ້ຕີ້ ບາດນີ້ທະນາຄານກາງ ບໍ່ມີເງິນຕຣາຕ່າງປະເທດ ມັນກະຫຍຸງໂອ້ ແກ້ໄຂ, ແກ້ໄຂ ແນວໃດ ມີແຕ່ຢືມນຳຈີນຫັ້ນແຫຼ ທ່າດຽວ. ເພີ່ມໜີ້ຂຶ້ນອີກ ກະຊິເອົາຫຍັງໃຊ້ເຂົາ ກະຫຍຸ້ງຢູ່ດຽວນີ້ນິ ບໍ່ຈັກແນວຊິຄິດຈັ່ງວ່າ ຈັ່ງວ່າຊິເຮັດແນວໃດເຣື່ອງ ເສຖກິຈລາວເຮົານີ້. ໝາຍຄວາມວ່າ ເສຖກິຈສົ່ງອອກມັນລະບໍ່ມີ ຍ້ອນໂຄວິດນີ້ແຫຼະ ບາດນີ້ຊ້ຳວ່າ ສົ່ງອອກ ຄືບໍ່ສົ່ງອອກ ບໍ່ມີອັນສົ່ງ ມີແຕ່ວ່ານຳເຂົ້າ ນີ້ໂອ້ ມັນອັນຕຣາຍ ຄັນບໍ່ນໍາຂົ້າ ພັດບໍ່ມີອັນຄົບອັນກິນ ອັນໃຊ້ ອັນສອຍໂອ້ ມັນກະຄາແລ້ວ ອັນນີ້ນ່າ. ບໍ່ຮູ້ຈັກວ່າ ຊິຄຶດແນວໃດ ຈັ່ງວ່າ ບັນຫາໂຕນີ້ນິ ຈັກເພິ່ນຊິແກ້ໄຂແນວໃດ ມັນອາຫານການກິນ ປະຊາຊົນກະຈົ່ມ ເອີ ຖ້າວ່າ ເງິນເປັນແນວນີ້ແລ້ວ ຊິໄປຊອກໄປຫາກິນຕາມທັມມະຊາຕ ພໍໄດ້ຢູ່ ແຕ່ວ່າ ບາດນີ້ ຊ້ຳບັນຫານ້ຳມັນອີກ."
ເຖິງຢ່າງໃດກໍຕາມ, ສຳນັກຂ່າວສານປະເທາດລາວ ໄດ້ຣາຍງານ ໃນວັນທີ 9 ມິຖຸນາ ທີ່ຜ່ານມາ ວ່າ ກອງປະຊຸມສະພາແຫ່ງຊາຕ ຈະມີການນຳສເນີ ຮ່າງກົດໝາຍການຄຸ້ມຄອງ ເງິນຕຣາຕ່າງປະເທດ ສະບັບປັບປຸງ.
ສຳນັກຂ່າວສານ ປະເທດລາວ ຍັງຣາຍງານວ່າ 8 ມິຖຸນາ 2022 ວ່າ: ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ເນັ້ນໃຫ້ບັນດາທະນາຄານ ທຸລະກິຈ ຢູ່ແຂວງອຸດົມໄຊ ເອົາໃຈໃສ່ ໃນຄຸ້ມຄອງການໝູນວຽນ ຂອງເງິນໃນແຕ່ລະໄລຍະ, ເອົາໃຈໃສ່ຄຸ້ມຄອງສິນເຊື່ອ ໃຫ້ກຸ່ມເປົ້າໝາຍຢ່າງມີຄຸນນະພາບ ແລະ ຮັບປະກັນດ້ານຄວາມສ່ຽງ, ຄຸ້ມຄອງການແລກປ່ຽນ ເງິນຕຣາ ຕາມຈຳນວນທີ່ທະນາຄານກາງ ກຳນົດໄວ້.