ລາວຂາຍໄມ້ແຕ່ເກືອບບໍ່ມີ ລາຍໄດ້ ເຂົ້າຄັງຫລວງ

ການລັກລອບຕັດໄມ້ ແລະຂາຍໄມ້ ຜິດກົດໝາຍໃນທົ່ວປະເທດ ປັດຈຸບັນ ຍັງຫນ້າເປັນຫ່ວງຢູ່. ເວົ້າຕາມຂໍ້ມູນ ຈາກຣັຖບານ ແລະອົງການ ປົກປັກຮັກສາສິ່ງແວດລ້ອມ. ໃນແຕ່ລະປີ ລາວ ສູນເສັຽລາຍໄດ້ຈາກການເກັບພາສີໄມ້ ເປັນຈໍານວນຫລາຍລ້ານໂດລາ ສະຫະຣັຖ.

ທ່ານ ພູເພັດ ຄໍາພູວົງ ຣັຖມົນຕຣີ ກະຊວງການເງິນ ເປີດເຜີຽຕໍ່ໜັງສືພິມ ຂ່າວສານປະເທດລາວ ກ່ຽວກັບການເກັບລາຍຮັບ ຂອງຣັຖບານ ສົກປີ 2012-2013 ວ່າ ລາວ ສາມາດເກັບພາສີຈາກການຂາຍໄມ້ ໄດ້ບໍ່ຮອດ 20 ລ້ານໂດລາຕໍ່ປີ. ແຕ່ຖ້າເບິ່ງຕາມຂໍ້ມູນ ການນໍາເຂົ້າໄມ້ ຂອງປະເທດເພື່ອນບ້ານ ພົບວ່າ ໄມ້ທີ່ນໍາເຂົ້າຈາກປະເທດລາວ ມີມູນຄ່າ ຍັງມີຫລາຍ. ເຈົ້າໜ້າທີ່ກະຊວງການເງິນ ຄົນນຶ່ງທີ່ບໍ່ປະສົງອອກຊື່ ເວົ້າວ່າ ການເກັບພາສີໄມ້ຜິດກົດໝາຍ ແລະການຄວບຄຸມການຕັດໄມ້ ຂາຍໄມ້ ເປັນເຣື້ອງຫຍຸ້ງຍາກ ທີ່ສຸດ:

"ຫາກທຽບໃສ່ການຈັບກຸມໄມ້ໜີພາສີລະຫ່ວາງປີ 2013 ກັບປີ 2012 ຖືວ່າເທົ່າໆກັນນັ້ນແຫລະ ທຽບໃສ່ກັນລະຍະປີກາຍກັບປີນີ້ນະໃກ້ຄຽງ ກັນ ກໍພົບຊໍ່ານີ້ແຫລະ ມັນກໍຫລາຍຫັ້ນແຫລະ ແຕ່ເຮົາສາມາດຈັບໄດ້ຊໍ່ານີ້ ຊາຍແດນມັນຍາວໄກ ຂ້າມມາຢູ່ໃສກໍໄດ້".

ຕາມຄໍາເວົ້າຂອງເຈົ້າໜ້າທີ່ລາວ ເມື່ອປີ 2010 ວ່າມູນຄ່າການສົ່ງໄມ້ອອກຈາກລາວໄປຂາຍໃນປະເທດເພືຶ່ອນບ້ານເພີ້ມຂື້ນ ຢ່າງຫຼວງຫຼາຍ. ໃນປີ 2000 ມູນຄ່າການສົ່ງອອກໄມ້ມີ 130 ລ້ານໂດລາ. ມາຮອດປີ 2008 ມູນຄ່າການສົ່ງອອກມີ 1,000ລ້ານໂດລາ.