ອັດຕາແລກປ່ຽນ ຜັນຜວນ ປະຊາຊົນທຸກລະດັບ ເດືອດຮ້ອນ

ໄມຊູລີ:  ສະບາຍດີ ທ່ານຜູ້ຟັງທີ່ເຄົາລົບ..ຂໍຕ້ອນຮັບທ່ານເຂົ້າສູ່ ລາຍການ ມາຟັງນໍາກັນ ສຳລັບອາທິດນີ້ພວກເຮົາມາຕິດຕາມປະເດັນຮ້ອນກ່ຽວກັບອັດຕາແລກປ່ຽນແຮງຈົນເຮັດໃຫ້ປະຊາຊົນທຸກລະດັບເດືອດຮ້ອນ. ສຳລັບຫົວຂໍ້ໃນມື້ນີ້ ອັດຕາແລກປ່ຽນຜັນຜວນປະຊາຊົນທຸກລະດັບເດືອດຮ້ອນ. ຕໍ່ກໍລະນີດັ່ງກ່າວສະພາແຫ່ງຊາດໄດ້ຮັບຮອງມະຕິຍົກຍ້າຍຜູ້ວ່າການທະນາຄານແຫ່ງ ສປປ ລາວ. ທ່ານຜູ້ຟັງມີຄວາມຄິດເຫັນແນວໃດຊ່ອຍອອກຄຳເຫັນກັບພວກເຮົາດ້ວຍ. ສຳລັບມື້ນີ້ດຳເນີນລາຍການໂດຍ ໄມຊູລີ ແລະ ໄຊຍາ.

ໄຊຍາ:  ສະບາຍດີທ່ານຜູ້ຟັງ ກ່ຽວກັບບັນຫາອັດຕາແລກປ່ຽນຜັນຜວນມັນສົ່ງຜົນກະທົບໄປຍັງປະຊາຊົນທຸກລະດັບທັງຜູ້ຫາເຊົ້າກີນຄໍ່າ, ແມ່ຄ້າຊາວຂາຍ, ນັກທຸລະກິດທຸກລະດັບ.

ເປັນຫຍັງຈຶ່ງວ່າອັດຕາແລກປ່ຽນຜັນຜວນຫຼາຍທ່ານກໍ່ຄົງຈະຮຸູ້ກັນດີເນື່ອງຈາກອັດຕາແລກປ່ຽນມັນຂື້ນຜິດປົກກະຕິ ແລະ ກໍ່ຂື້ນໄປເລື້ອຍ ໆ ຈົນປະຈຸບັນບັນນີ້ອັດຕາແລກ ນອກລະບົບຢູ່ທີ່ 1 ບາດປະມານ 730-750 1 ໂດລາປະມານ 23,000-25,000 ກີບ

ໃນຂະນະທີ່ ທ່ານ ບຸນເຫຼືອ ສີນໄຊວໍຣະວົງ ອະດີດຜູ້ວ່າການທະນາຄານແຫ່ງ ສປປ ລາວ ໄດ້ລາຍງານວ່າມີມາດຕະການແກ້ໄຂແຕ່ກໍ່ບໍ່ສາມາດຄວບຄຸມສະຖານະການໄດ້ສົ່ງຜົນເຮັດໃຫ້ເກີດຜົນກະທົບເປັນວົງກ້ວາງ.