ສ້າງເຂື່ອນໃສ່ນໍ້າຂອງເພື່ອນບ້ານ ກັງວົນ

ໃນວັນທີ 19 ກຸມພາ 2014 ທີ່ບາງກອກປະເທດໄທ ເຄື່ອຂ່າຍປະຊາຊົນແລະກຸ່ມສີ່ງແວດລ້ອມຈາກປະເທດໄທ ກຳພູຊາແລະວຽດນາມໄດ້ອອກ ຖແລງການ ຄັດຄ້ານການສ້າງເຂື່ອນໃສ່ແມ່ນ້ຳຂອງສາຍຫລັກຫມົດທຸກເຂື່ອນ. ດັ່ງທ່ານ ອິດທິພົລ ຄຳສຸກ ຕົວແທນເຄືອຂ່າຍ ຈາກປະເທດໄທ ກ່າວໃນຕອນນື່ງວ່າ:

"ໃຫ້ຣັຖບານທຸກປະເທດບໍ່ແມ່ນສະເພາະແຕ່ຣັຖບານໄທ ແລະຣັຖບານລາວທີ່ມີຄວາມສຳຄັນກັບແມ່ນ້ຳຂອງ ກຸ່ມທີ່ເປັນ ສະມາຊິກ ອົງການແມ່ ນ້ຳຂອງ ທັງຫມົດ ກໍໃຫ້ການຢືນຢັນໃນການຢັບຢັ້ງ ຫລືການທົບທວນ ໃນການສ້າງເຂື່ອນ ດອນສະໂຮງ".

ທ່ານກ່າວຕໍ່ໄປວ່າ ເຫດຜົລທີ່ມີການຄັດຄ້ານ ການກໍ່ສ້າງເຂື່ອນຕັນແມ່ນ້ຳຂອງນັ້ນ ຍ້ອນມີຜົລວິຈັຍຢ່າງຊັດເຈນວ່າ ເຂື່ອນແມ່ນ້ຳຂອງ ໃນລາວ ຈະສົ່ງຜົລກະທົບຕໍ່ປະຊາຊົນຕາມແຄມແມ່ນ້ຳຂອງ ທີ່ລຸ່ມນ້ຳລາຍໃຫຍ່ ບໍ່ວ່າຈະເປັນການຂື້ນລົງຂອງນ້ຳ ການກະເສດ ຕາມແຄມແມ່ນ້ຳຂອງ ແລະການທ່ອງທ່ຽວ ຈື່ງບໍ່ຢາກໃຫ້ມີການກໍ່ສ້າງເຂື່ອນດອນສະໂຮງ ແລະເຂື່ອນອື່ນໆ.

ນອກເໜືອຈາກນັ້ນ ຕົວແທນຈາກປະເທດກຳພູຊາ ກໍໄດ້ແສດງຄວາມກັງວົນກ່ຽວກັບ ຜົລກະທົບຕໍ່ພັນປາແລະການປະໂມງຕາມລຳແມ່ນ້ຳຂອງ ພວກເຂົາກໍບໍ່ເຫັນພ້ອມ ໃນການສ້າງເຂື່ອນຕັນແມ່ນ້ຳຂອງເຊັ່ນກັນ. ດັ່ງທ່ານ ຢຸກ ແສງລອງ ຕົວແທນຈາກປະເທດກຳພູຊາເວົ້າວ່າ:

"ພວກເຮົາມີຈຸດຢືນຢ່າງຈະແຈ້ງແລ້ວວ່າ ພວກເຮົາປະຕິເສດຕໍ່ການສ້າງເຂື່ອນໃສ່ແມ່ນ້ຳຂອງ ຮ່ວມທັງຈຸດຢືນຂອງຊາວຕົງເລສາບ ໃນກຳພູຊາ ກວ່ານຶ່ງລ້ານ ຫ້າແສນຄົນ ກໍປະຕິເສດການສ້າງເຂື່ອນດັ່ງກ່າວຄືກັນ ເພາະມັນບໍ່ໃຫ້ປະໂຫຍດຫຍັງຫມົດ".

ຕົວແທນຈາກວຽດນາມກໍໄດ້ແສດງຈຸດຢືນຂອງຕົນຄືກັນວ່າ ພວກຂະເຈົ້າຄັດຄ້ານ ການສ້າງເຂື່ອນໃສ່ແມ່ນ້ຳຂອງ ເພາະມັນຈະສົ່ງຜົລ ກະທົບຕໍ່ ປະຊາຊົນ ໃນບໍຣິເວນສາມຫລ່ຽມ ປາກແມ່ນ້ຳຂອງ ຊື່ງເປັນອູ່ເຂົ້າອູ່ນ້ຳຂອງວຽດນາມ.