ລາວຄຣິສຈຽນຖືກຈັບ​ຢູ່ເມືອງນອງ

ເຈົ້າຫນ້າທີ່ ຮັກສາ ຄວາມສງົບ ປະຈຳ ບ້ານ 5 ຄົນ ທີ່ ບ້ານ ລອຍນາມ ເມືອງນອງ ແຂວງ ສວັນນະເຂດ ໄດ້ຈັບກຸມ ທ້າວ ຊອດ ຊາວລາວ ຄຣິສຈຽນ ແລ້ວ ມັດລາວໃສ່ ຫລັກຮົ້ວ ແລ້ວ ຫົວຫຼອກ ລໍ້ ເຍາະເຍີ້ຍ ຕ່າງໆນາໆ ແລະ ບັງຄັບ ໃຫ້ລາວ ປະລະ ຄວາມ ເຊຶ່ອຖື ສາສນາ ຄຣິສຈຽນ. ເມື່ອລາວ ປະຕິເສດ ເຈົ້າຫນ້າທີ່ ກໍເອົາ ໂຕ ລາວໄປ ຂັງຄຸກ ຢູ່ ເມືອງນອງ.

ທ້າວ ຊອດ ຊົນເຜົ່າ ລາວເທິງ ອາຍຸ 40 ປີ ໄດ້ເຊຶ່ອຖື ສາສນາ ຄຣິສຈຽນ ໃນປີ ທີ່ຜ່ານມາ ແລະ ກໍເປັນຄົນ ທຳອິດ ທີ່ເຊື່ອຖື ສາສນາ ຄຣິສຈຽນ ໃນເມືອງ ນອງ ທີ່ ປະກອບ ດ້ວຍ 20 ບ້ານ. ຂ່າວກ່ຽວ ກັບການ ນັບຖື ສາສນາ ຄຣິສຈຽນ ຂອງ ທ້າວຊອດ ໄດ້ລາມໄປ ແບບໄຟ ໄຫມ້ປ່າ ໃນວັນທີ 15 ເດືອນ ພຶສພາ ຈຶ່ງມີ ເຈົ້າຫນ້າທີ່ ຮັກສາ ຄວາມສງົບ ເຂົ້າໄປ ເຮືອນລາວ ແລ້ວສັ່ງ ໃຫ້ລາວ ປະລະ ການເຊຶ່ອຖື ດ້ວຍການ ນາບຂູ່ ລາວວ່າ ຈະຢຶດບ້ານ ເຮືອນ ໄຮ່ນາ ຂອງ ລາວ ແລ້ວໄລ່ລາວ ຫນີຈາກ ໝູ່ບ້ານ.

ແຕ່ ທ້າວ ຊອດ ຍັງຍຶດຫມັ້ນ ໃນຄຳເວົ້າ ຄຳດຽວວ່າ ລາວຈະບໍ່ ປະລະ ການນັບຖື ສາສນາ ຄຣິສຈຽນ ຂອງລາວ ເພາະລາວ ບໍ່ໄດ້ເຮັດ ຜິດກົດຫມາຍ ເຮັດ ໃຫ້ ເຈົ້າຫນ້າທີ່ ໃຈຮ້າຍ ຫລັງຈາກ ພຍາຍາມ ຊັກຊວນລາວ ຫລາຍຄັ້ງ ຈຶ່ງຈັບລາວ ໃນມື້ວັນ ທີ 29 ເດືອນ ພຶສພາ ຊຶ່ງ ເປັນສິ່ງທີ່ ຜິດ ກົດຫມາຍ ແລະ ຣະເມີດ ສິດທິ ທາງ ສາສນາ ໃນລາວ. ອົງການ ສີ້ງຊອມ ສິດທິ ທາງ ສາສນາ ສາກົນ ໄດ້ຮຽກຮອ້ງ ໃຫ້ທາງການ ລາວ ປ່ອຍຕົວ ທ້າວ ຊອດ ຢ່າງ ຮີບດ່ວນ.