ອຸບັດຕິເຫດ ແກ້ໄຂຍາກ ຍ້ອນເຈົ້າໜ້າທີ່ບໍ່ຈິງຈັງ ແຕ່ຍັງຮັບເງິນ
2023.04.10
ໂຕຢ່າງ ອຸບັດຕິເຫດ ຕາມທ້ອງຖນົນ ໃນ ນະຄອນຫຼວງວຽງຈັນ.
RFA
ປະຊາຊົນລາວເຫັນວ່າ ມັນເປັນການຍາກ ທີ່ຈະສະກັດກັ້ນ ແລະ ປ້ອງກັນອຸບັດຕິເຫດ ຕາມທ້ອງຖນົນ ໃນໄລຍະ ສລອງບຸນປີໃໝ່ລາວ ຍ້ອນວ່າປະຊາຊົນ ທີ່ເປັນຜູ້ຂັບຂີເອງ ຫຼາຍຄົນ ບໍ່ປະຕິບັດລະບຽບຈະຣາຈອນ ແລະ ເຈົ້າໜ້າທີ່ບາງຄົນ ບໍ່ເຄັ່ງຄັດ ໃນການບັງຄັບໃຊ້ກົດໝາຍ ເຊັ່ນເຈົ້າໜ້າທີ່ ເປັນຜູ້ຂັບຂີລະເມີດການຈະຣາຈອນ ແລ້ວກໍປ່ອຍໄປ.
ປະຊາຊົນ ທ່ານນຶ່ງ ໄດ້ໃຫ້ສັມພາດຕໍ່ວິທຍຸ ເອເຊັຽເສຣີ ວ່າ ຄົນບໍ່ຟັງຄວາມ ລະກະແຖມເຈົ້າໜ້າທີ່ກໍຍັງ ຊອດລອດ ແຊັດແລັດ ຢູ່ຈັ່ງຊັ້ນ ຄົນເຮົາຄັນວ່າ ຈ່າຍແລ້ວ ບໍ່ເປົ່າກະໄດ້.
ນັກຂ່າວ: ອະທິບາຍໃຫ້ຟັງແດ່ວ່າ ເຈົ້າໜ້າທີ່ຊອດລອດ ແຊັດແລັດ ນີ້ ເປັນຈັ່ງໃດ?
ປະຊາຊົນ: ອັນຊອດລອດ ແຊັດແລັດ ເຫັນມັນເມົາ ມັນບໍ່ເປົ່າ ອ້າວ ຈ່າຍໃຫ້ 2 ແສນ. ອ້າວໄປເລີຍ ບໍ່ເປົ່າກະໄດ້.
ນັກຂ່າວ: ມັນເກີດມີປະກົດການ ຈັ່ງຊີ້ຫວະຢູ່ບ້ານເຮົາ?
ປະຊາຊົນ: ວາຍເປັນຫຍັງມັນຈຶ່ງຈະບໍ່ມີ, ແຕ່ ກະບໍ່ເປັນທຸກຄົນ ກະເປັນສ່ວນນຶ່ງ ແຕ່ກະບໍ່ເປັນສ່ວນນຶ່ງ ເຄິ່ງໆ ໄປຊັ້ນແຫຼະ ມັນຍັງມີຊ່ອງວ່າງໂຕນີ້ຢູ່ຫວະ?
ປະຊາຊົນ: ຫ້ວຍ ມັນກະມີຫັ້ນແຫຼະ ໃບຂັບຂີ່ ຈ່າຍໄປກະພົ້ນໄປ.
ນັກຂ່າວ: ໃບຂັບຂີ່ຢູ່ບ້ານເຮົານີ້ ມັນເປັນຈັ່ງໃດ ຄືວ່າ ມັນຜ່ານການສອບເສັງ ຄັກແນ່ລະ ຄືວ່າ ເຄັ່ງຄັດຢູ່?
ປະຊາຊົນ: ໂອ້ຍ ເຄັ່ງຄັດ ກະຄົນຕົ໋ວວ່າ ຢູ່ຫັ້ນ ລະບົບຄອມພິວເຕີ້ຣ໌ ກະຄົນຕົ໋ວວ່າ ໃຫ້ຄະແນນ.
ນັກຂ່າວ: ສຳລັບຄົນເດ້ ສ່ວນຜູ້ຂັບຂີເອງເດ້ ມັນເປັນຈັ່ງໃດ?
ປະຊາຊົນ: ອັນນັ້ນແລ້ວ ຜູ້ຂັບຂີ ບັນຫາມັນ.
ນັກຂ່າວ: ເຈົ້າໜ້າທີ່ນີ້ ຊິຄວບຄຸມໄດ້ບໍ່ນິ ອຸບັດຕິເຫດປີນີ້?
ປະຊາຊົນ: ບໍ່ໄດ້ດອກ ບໍ່ໄດ້ ແຕ່ບາງປີ ກະເພີ່ມ ບາງປີກະຫຼຸດ ແຕ່ສ່ວນໃຫຍ່ ມັນກະເພີ່ມຫັ້ນແຫຼະ.
ປະຊາຊົນອີກທ່ານນຶ່ງ ກໍກ່າວວ່າ ບໍ່ຢາກອອກໄປທ່ຽວໃສ່ ຍ້ອນວ່າ ຢ້ານອຸບັດຕິເຫດ.
ດັ່ງທ່ານ ໃຫ້ສັມພາດວ່າ: ບໍ່ໃຫ້ເວົ້າແຫຼະ ປີໃໝ່ ບໍ່ຢາກໄປໃສ ລູກກະໜີໄປຮຽນໝົດ.
ນັກຂ່າວ: ແຕ່ວ່າ ໄລຍະປີໃໝ່ນີ້ເຮົາອອກບ້ານບໍ່?
ປະຊາຊົນ: ອອກໆ ເຣື່ອງອອກ ກະອອກ. ອອກກະອອກດ້າມມື້ ໄປກິນເຂົ້າປ່າ ລະກະໄປຢາມພີ່ຢາມນ້ອງຫັ້ນແຫຼ ໄປຢາມພວກອາວຸໂສຫັ້ນເດ້ ໄປຢາມພວກພະນັກງານ ບຳນານລະກະມາໂລດ.
ນັກຂ່າວ: ບໍ່ຄຶດຢ້ານ ອຸບັດຕິເຫດເບາະ?
ປະຊາຊົນ: ໂຕດຽວຫັ້ນແຫຼະ
ແລະ ປະຊາຊົນ ອີກທ່ານນຶ່ງ ກໍໃຫ້ສັມພາດວ່າ: ໂອບໍ່ໄປໃສຂາຍເຄື່ອງຢູ່ບ້ານ.
ນັກຂ່າວ: ມີກິຈກັມຫຍັງບໍ່ຫັ້ນນະ?
ປະຊາຊົນ: ກິຈກັມ ມີແຕ່ກິນສັງສັນ ນຳພີ່ນຳນ້ອງ ນຳເອື້ອຍນຳອ້າຍ ຈັ່ງຊີ້ແຫຼະ. ບໍ່ໄດ້ມີແຜນວ່າ ຊິໄປບ່ອນນັ້ນບ່ອນນີ້ດອກ. ມີແຕ່ວັນທີ 11 ນີ້ ຈະກິນລ້ຽງຢູ່ບໍລິສັດ ຂ້າແບ້ໂຕນຶ່ງ.
ເຖິງຢ່າງໃດກໍຕາມ, ເຈົ້າໜ້າທີ່ຕຳຣວດຈະຣາຈອນ ກໍມີແຜນປ້ອງກັນ ການເກີດອຸບັດຕິເຫດ ແລະ ອຳນວຍຄວາມສະດວກ ໃຫ້ຜູ້ຂັບຂີ່ໃນໄລຍະການ ສລອງບຸນໃໝ່ລາວ.
ພັນເອກ ຄຳເລັກ ໄຊຍະສິດ ຮອງກົມໃຫຍ່ ຕຳຣວດຈະຣາຈອນ ກະປ້ອງປ້ອງກັນຄວາມສງົບ ໄດ້ໃຫ້ສັມພາດຕໍ່ສື່ມວນຊົນລາວ ໃນວັນທີ 10 ເມສາ ວ່າ: ແຕ່ງຕັ້ງຈຸປະຈຳການ ຄອຍເຫດຂອງກົມ ເພື່ອເກັບກຳສະພາບອຸບັດຕິເຫດ ຢູ່ໃນຂອບເຂດທົ່ວປະເທດ ຕລອດ 24 ຊົ່ວໂມງ. ບັນຫາທີ່ສອງລະແຕ່ງຕັ້ງຈຸອອກກວດກາ ທາດເຫຼົ້າຈັບຄວາມໄວ ຢູ່ເຂດເສັ້ນທາງ 13 ເໜືອ, 13 ໃຕ້ ເພື່ອປ້ອງກັນ ສະກັດກັ້ນ ອຸບັດຕິເຫດ ຕາມທາງຍາວ.
ໃນປີ 2021 ທີ່ຜ່ານມາ, ມີຜູ້ເສັຽຊີວິດ ການເກີດອຸບັດຕິເຫດ ຕາມທ້ອງຖນົນ 30 ຄົນ, ບາດເຈັບ 170 ຄົນ.
ໃນປີ 2022 ມີຜູ້ເສັຽຊີວິດ ຈາກການເກີດອຸບັດຕິເຫດ ຕາມທ້ອງຖນົນ 35 ຄົນ ແລະ ບາດເຈັບ 500 ປາຍຄົນ ອີງຕາມຂໍ້ມູນ ຈາກທາງການລາວ.