သစ်သားပန်းပုလုပ်ငန်း

မြန်မာ့လက်မှုပညာ ပန်းဆယ်မျိုးထဲမှာ ပန်းပုလုပ်ငန်းဟာ သစ်သား၊ တိရစ္ဆာန်အရိုး၊အစွယ်၊ ရွှံ့စေး၊ ဖယောင်း စတာတွေနဲ့ ရုပ်လုံးရုပ်ကြွပေါ်အောင် ထွင်းထုရတဲ့ ပညာရပ်တစ်ခုဖြစ်ပါတယ်။

ပန်းပုပညာဟာ လွန်ခဲ့တဲ့ ပျူခေတ်ကာလကနေ စတင်ထွန်းကားခဲ့ပြီး ဒီနေ့ထိတိုင် မတိမ်ကောဘဲ သက်တမ်း ကြာရှည်စွာရပ်တည်နေပါတယ်။

ဒီနေ့ခေတ်မှာတော့ ပန်းပုတွေကို ဘုရား၊ ပုထိုး၊ ကျောင်းကန်တွေမှာသာမက နေအိမ်အလှဆင်တဲ့ နေရာတွေမှာပါ အသုံးပြုလာကြတာ ဖြစ်ပါတယ်။

မြန်မာ့လက်မှု ပန်းပုတွေကို နိုင်ငံတကာစျေးကွက် ထိုးဖောက်နိုင်ရေးအတွက်လည်း ပန်းပုပညာရှင်တွေက ကြိုးပမ်းနေကြပါတယ်။

လက်ရှိမှာတော့ ပြည်တွင်းကဝယ်ယူသူတွေနဲ့၊ နိုင်ငံတကာ ခရီးသွားဧည့်သည်တွေကို အဓိက မှီခိုအားထား ရောင်းနေရတာပါ။

ပန်းပုလက်ရာ အရွယ်အစားပေါ်မူတည်ပြီး စျေးနှုန်းကလည်း ကွဲပြားတယ်လို့ ပန်းပုထုသူတစ်ဦးက ပြောပါတယ်။

အများအားဖြင့် ဘုရားရုပ်ပုံတော် ပန်းပုတွေနဲ့၊ တရိစ္ဆာန်ရုပ်ပုံ ထွင်းထုထားတာတွေကို လူကြိုက်များပါတယ်။

ပြီးခဲ့တဲ့ ၂ဝ၁၉ ခုနှစ်ကလည်း ကမ္ဘာ့အကြီးဆုံး သစ်သားပန်းပု ပြပွဲပြိုင်ပွဲကို ပဲခူးမြို့မှာ လက်ခံကျင်းပခဲ့ပါတယ်။