သက်မွေးပညာသင်ပေးတဲ့ ပဲခူးမိဘမဲ့ကျောင်း

ပဲခူးမြို့၊ ဥဿာမြို့သစ်မှာရှိတဲ့ ရင်ခွင့်မဲ့သူများဆုံဆည်းရာ ဘက်စုံလူငယ်ဖွံ့ဖြိုးရေးကျောင်းမှာ မိဘမဲ့ကလေး ၁၈၀ ဦးကို သူတို့စိတ်ပါဝင်စားရာ အတတ်ပညာအမျိုးမျိုး သင်ကြားပေးနေပါတယ်။

၂၀၁၉ ခုနှစ်ကစပြီး ဖွင့်လှစ်ခဲ့တဲ့ အဲဒီကျောင်းမှာ ကွန်ပျူတာ၊ ဘာသာစကား၊ စက်ချုပ်၊ အဆိုနဲ့ အတီး၊ စားဖိုမှူး၊ ကိတ်မုန့်ဖုတ်ပညာနဲ့ လက်မှုပညာတွေကို သင်ကြားပေးနေသလို ဘုန်းတော်ကြီးသင် ပညာရေးကျောင်းကိုပါ တွဲဖွင့်ထားပါတယ်။

ဒီကျောင်းကနေ ဘက်စုံဖွံ့ဖြိုးပြီး ထူးချွန်ထက်မြတ်တဲ့ အနာဂတ်မျိုးဆက်သစ်တွေ ပေါ်ထွန်းစေဖို့နဲ့ လူ့အဖွဲ့အစည်းကို လှပအောင်ဖန်းတီပေးနိုင်မယ့် ခေါင်ဆောင်ကောင်းတွေ ပေါ်ထွန်းလာဖို့ရည်ရွယ်ပြီး ဖွင့်လှစ်ခဲ့တာလို့ နာယကဆရာတော် အရှင်ကုသလက RFA ကို မိန့်ပါတယ်။

လက်ရှိကျောင်းမှာ မြန်မာနိုင်ငံဒေသအစုံက လသားအရွယ်ကနေ အသက် ၁၆ နှစ်အရွယ်အထိရှိပြီး အများစုဟာ အိမ်ထောင်ကွဲမိဘတွေနဲ့ မိဘရဲ့စွန့်ပစ်ခံရမှုကြောင့် ခိုလှုံရာရင်ခွင့်မဲ့နေသူတွေ ဖြစ်တယ်လို့ ဆိုပါတယ်။

နာယကဆရာတော်ဟာ သက်တော် ၂၆ နှစ်သာရှိပေမယ့် ကလေးတွေအားလုံးအပေါ် နွေးထွေးတဲ့မေတ္တာနဲ့ အတတ်ပညာတွေ သင်ပေးနေတာကြောင့် သူတို့ရဲ့ဘဝတွေ အများကြီးပြောင်းလဲမှုရှိတယ်လို့ ဒီကျောင်းမှာ နေထိုင်တဲ့ မိဘမဲ့ကလေးတွေက ပြောကြပါတယ်။

ကျောင်းရဲ့နေ့စဉ် ကုန်ကျမှုအတွက် မင်္ဂလာအခမ်းအနားတွေနဲ့ မွေးနေပွဲကျင်းပဖို့ ခန်းမငှားရမ်းတာ၊ အစားအသောက် ချက်ပြုတ်ပေးတာတွေကနေ ရတဲ့အလှူငွေနဲ့ လည်ပတ်နေတာလို့ နာယကဆရာတော်က မိန့်ပါတယ်။