မြေပုံမြို့နယ်မှာ သေနတ်ပစ်ခံရလို့ အမျိုးသမီးတစ်ဦးသေဆုံး

ရခိုင်ပြည်နယ်၊ မြေပုံမြို့နယ်၊ ဝက်ရူးကျေးရွာကနေ ရွာသာရွာကျေးရွာကို စက်လှေနဲ့ ငါးသွားရောင်းတဲ့ လင်မယားနှစ်ဦးဟာ ဒီနေ့မနက်မှာ သေနတ်နဲ့ပစ်ခတ်ခံရလို့ အမျိုးသမီးပွဲချင်းပြီး သေဆုံးသွားခဲ့ပါတယ်။

ဒီနေ့မနက် ၉ နာရီခန့်မှာ မြေပုံမြို့နယ်၊ ယောချောင်းအတွင်း မောင်းနှင်နေတဲ့ စက်လှေတစ်စီးကို ရွာသာရွာ ကျေးရွာမှာ အထိုင်ချနေတဲ့ တပ်မတော်သားတွေက သေနတ်နဲ့ လှမ်းပစ်ခဲ့တာကြောင့် စက်လှေပေါ်ပါလာတဲ့ အမျိုးသမီး ဘယ်ဘက်ရင်အုံကို ကျည်မှန်ပြီး ပွဲချင်းပြီး သေဆုံးသွားခဲ့တယ်လို့ ဒေသခံတွေက ပြောပါတယ်။

သေဆုံးသူ ဒေါ်ဦးခင်သန်း ဟာ အသက် ၃၀ ခန့်ရှိပြီဖြစ်ပါတယ်။ ဒေါ်ခင်သန်းဦးရဲ့ အမျိုးတော်စပ်သူ တစ်ဦးက တပ်မတော်က ဒေါ်ဦးခင်သန်းတို့ကို စစ်ဆေးမေးမြန်းပြီးနောက် စက်လှေလှည့်ထွက်လာချိန်မှာ နောက်ကနေ ပစ်ခတ်ခဲ့တာလို့ RFA ကိုပြောပါတယ်။

သေဆုံးသွားသူ ဒေါ်ဦးခင်သန်းရဲ့ ရုပ်အလောင်းကို မြေပုံမြို့ကို သယ်ဆောင်သွားပြီး ဆေးစစ်ချက်ရယူတာနဲ့ အမှုဖွင့်တာတွေ ဆက်လက်လုပ်ဆောင်နေတယ်လို့ မိသားစုဝင်တွေက ပြောပါတယ်။

ဒေါ်ဦးခင်သန်းတို့ ငါးသွားရောင်းတဲ့ ရွာသာရွာကျေးရွာကို တပ်မတော်က ဒီနေ့မနက်မှာ အင်အား ၁၀၀ လောက်နဲ့ ရောက်ရှိလာခဲ့ပြီး တပ်မတော်သားတွေဟာ ရွာအပြင်နဲ့ ရွာတွေထဲမှာ ဝင်ရောက်နေရာ ယူထားကြတယ်လို့ သိရပါတယ်။

တပ်မတော်က ရွာထဲကို ဘယ်သူမှ အဝင်အထွက် ပေးမလုပ်ဘဲ နေအိမ်တွေထဲ တစ်အိမ်ဝင် တစ်အိမ်ထွက် သန်းခေါင်စာရင်းနဲ့ လူဦးရေ တိုက်ဆိုင်စစ်ဆေးတာတွေ လုပ်ဆောင်နေတယ်လို့ သိရပါတယ်။

သေဆုံးသွားသူ ဒေါ်ဦးခင်သန်း နေထိုင်ရာ ဝက်ရူးရွာကနေ ရွာသာရွာဟာ စက်လှေနဲ့သွားမယ်ဆိုရင် တစ်နာရီနီးပါးသွားရပါတယ်။

မြေပုံမြို့နယ် ပြည်သူ့လွှတ်တော် ကိုယ်စားလှယ် ဦးဖေသန်းက ဒေသခံသေဆုံးမှုအတွက် အထွေထွေ အုပ်ချုပ်ရေးမှူးရုံးကို ဆက်သွယ်ဆောင်ရွက်ထားကြောင်း ပြောပါတယ်။

“မဦးခင်သန်းတို့ လင်မယား ငါးသွားရောင်းဖို့ စက်လှေနဲ့ အဲကိုရောက်တယ်။ ရွာမှာ တပ်ရှိတယ်။ အဝင်အထွက် ပိတ်ထားတယ်ကြားလို့ လှည့်ပြန်တယ်ပြောတယ်။ တပ်က လိုက်ခေါ်တာလည်း မကြားဘူး စက်လှေနဲ့ဆိုတော့ အဲဒါနဲ့ လှမ်းပစ်တဲ့အခါမှာ မဦးခင်သန်းရဲ့ ဘယ်ဘက်ရင်အုံကို ထိတယ်။ သူတို့ ကျနော့်ကို သတင်းပို့တဲ့အခါမှာ ဝက်ရူးကျေးရွာပြန်ရောက်နေပြီ။ ကျနော်လည်း မြေပုံရဲစခန်းကို သွားပါလို့ပြောထားတယ်။ မြို့နယ်အုပ်ချုပ်ရေးမှူးကို အကြောင်းကြားထားတယ်”

မနေ့က မနက် ၁၀ နာရီခန့်မှာ ရွာသာရွာကျေးရွာ မြောက်ဘက် ငါးမိုင်ကျော်အကွာက တောထဲကို တပ်မတော် က ရဟတ်ယာဉ် သုံးစီးနဲ့ ဗုံးကြဲတိုက်ခိုက်ခဲ့ပါတယ်။

ဝါးသွားခုတ်တဲ့ ဒေသခံ ၁၀ ဦးနီးပါး ဗုံးကြဲတဲ့ဒဏ်ကို ခံခဲ့ရပြီး ထိခိုက်သေဆုံးတာ မရှိခဲ့ဘူးလို့ ဒေသခံတွေက ပြောပါတယ်။

လက်ရှိမှာ ဒေသခံတွေအနေနဲ့ မတရားဖမ်းဆီးခံရမှာကို စိုးရိမ်နေကြတယ်လို့ အမည်မဖော်ရဲတဲ့ ရွာသာရွာ ကျေးရွာက ဒေသခံ တစ်ဦးက RFA ကိုပြောပါတယ်။

“တောထဲသွားပြီး အလုပ်မလုပ်ရတဲ့အတွက် ကျနော်တို့မှာ စားဝတ်နေရေး အခက်အခဲရှိတယ်။ အခုပုံစံမျိုးနဲ့ စစ်ဆေးပြီး မတရားဖမ်းဆီးခံရမှာ ကျနော်တို့အနေနဲ့ စိုးရိမ်နေတယ်”

ဒီနေ့မနက် ရွာသာရွာကျေးရွာကို ငါးလာရောင်းတဲ့ ဝက်ရူးရွာသူတစ်ဦး တပ်မတော်က ပစ်ခတ်လို့ သေဆုံးခဲ့ တယ်ဆိုတဲ့ သတင်းနဲ့ ပတ်သက်ပြီး မကြားမိသေးဘူးလို့ အနောက်ပိုင်းတိုင်း စစ်ဌာနချုပ်က တိုင်းဦးစီး ဗိုလ်မှူးကြီး ဝင်းဇော်ဦး က တုံ့ပြန်ပါတယ်။

“ကျနော်တို့ ကြားတော့ မကြားဘူး အဲသတင်း ဟုတ်မဟုတ်တော့ မေးကြည့်လိုက်ဦးမယ်။ ကျနော်တို့က အဲ့ဒီဘက်မှာ သတင်းတစ်ခုကြားထားတဲ့ အတွက် နယ်မြေရှင်းလင်းနေတာတော့ ရှိတယ်”

ယောချောင်း၊ ကင်းတလင်း တဝိုက်မှာ ရက္ခိုင့်တပ်တော် AA က လှုပ်ရှားမှုတွေရှိပြီး တပ်မတော်က ရှင်းလင်းရေး ဆောင်ရွက်နေတာတွေရှိတယ်လို့ အနောက်ပိုင်းတိုင်း စစ်ဌာနချုပ်က တိုင်းဦးစီး ဗိုလ်မှူးကြီး ဝင်းဇော်ဦးကပြောပြီး ဒေသခံတွေကတော့ တပ်မတော်ရဲ့ နယ်မြေရှင်းလင်းမှုတွေမှာ မှားယွင်းဖမ်းဆီးခံရမှာကို စိုးရိမ်နေကြပါတယ်။