စီမံခန့်ခွဲမှုအားနည်းလို့ နိုင်ငံ့ငွေကြေးဆုံးရှုံးခဲ့ကြောင်း MATA ထောက်ပြ

စီမံခန့်ခွဲမှု အားနည်းချက်ကြောင့် ၂ဝ၁၄-၁၅ ဘဏ္ဍာရေးနှစ်မှာ သယံဇာတထုတ်လုပ်မှုကဏ္ဍ တခုတည်းကနေ ဧရာဝတီ မြစ်ကူးတံတားကြီး အစင်းတစ်ရာ ဆောက်နိုင်လောက်တဲ့ ငွေပမာဏ ဆုံးရှုံးခဲ့ကြောင်း MATA အဖွဲ့က ထောက်ပြလိုက်ပါတယ်။ လက်ရှိအစိုးရလက်ထက်မှာ ဒီလို စီမံခန့်ခွဲမှု အမှားအယွင်းတွေ ဆက်လက် ဖြစ်ပေါ်နေတယ်လို့ ဆိုပါတယ်။

နိုင်ငံပိုင်စီးပွားရေးလုပ်ငန်းများ ပြုပြင်ပြောင်းလဲရေးဆိုတာ လွန်စွာခက်ခဲတဲ့ကိစ္စ မဟုတ်ကြောင်း၊ ၂၀၀၈ အခြေခံ ဥပဒေကို မပြင်ဆင်နိုင်သေးတဲ့ အခြေအနေမှာလည်း စီးပွားရေးပြုပြင်ပြောင်းလဲမှုကို စွမ်းဆောင်နိုင်မှာဖြစ်ကြောင်း အရပ်ဘက်အဖွဲ့များကွန်ရက်တခုက ဒီကနေ့ ထုတ်ဝေတဲ့ အစီရင်ခံစာတစောင်မှာ ဝေဖန် ထောက်ပြထားပါတယ်။

“ဖွဲ့စည်းပုံအခြေခံ ဥပဒေအရဆိုရင် ပြည်ထဲရေးတို့၊ ကာကွယ်ရေးတို့ နယ်စပ်ရေးရာကိစ္စတွေမှာ လုပ်လို့မရဘူးပေါ့၊ အဲဒါက လက်ရှိအရပ်သား အစိုးရအောက်မှာရှိမနေဘူး၊ ဒါတွေကို ပြောင်းဖို့ဆိုရင် ငြိမ်းချမ်းရေးကိစ္စလိုဟာမျိုးဆိုရင် သိပ်ခက်တာပေ့ါ၊ အရပ်သားအစိုးရအနေနဲ့ လုပ်ချင်တာကို လုပ်လို့မရတဲ့အပိုင်းတွေ အများကြီးရှိတာပေ့ါ၊ သို့သော် နိုင်ငံတော် စီးပွားရေးကဏ္ဍတွေမှာဆိုရင်တော့ အရပ်သားအစိုးရရဲ့ လုပ်ပိုင်ခွင့်ထဲမှာရှိတယ်၊ အဲဒါကြောင့်မို့ ဖွဲ့စည်းပုံ အခြေခံဥပဒေ မပြောင်းနိုင်သေးရင်တောင်မှ အရပ်သားအစိုးရရဲ့ လုပ်ပိုင်ခွင့်အောက်မှာရှိတော့ လုပ်မယ်ဆိုရင် လုပ်လို့ရတယ်လို့ ကျွန်တော်တို့က မြင်တာပေါ့”

မြန်မာနိုင်ငံ ပွင့်လင်းမြင်သာမှုနဲ့ တာဝန်ယူမှု တာဝန်ခံမှုဆိုင်ရာ အရပ်ဖက် မဟာမိတ်အဖွဲ့ MATA က ဦးရဲလင်းမြင့် ပြောသွားတာပါ။

သက်ဆိုင်ရာဝန်ကြီးဌာနများက ဥပဒေ၊ အမိန့်စာ၊ ညွှန်ကြားစာများ ထုတ်ပြန်ပြီး အကောင်အထည်ဖော်ရုံနဲ့ ကြီးမားတဲ့ ပြောင်းလဲမှုကြီးကိုတွေ့ရမှာဖြစ်တယ်လို့ မြန်မာနိုင်ငံ ပွင့်လင်းမြင်သာမှုနဲ့ တာဝန်ယူမှု တာဝန်ခံမှုဆိုင်ရာ အရပ်ဖက် မဟာမိတ်အဖွဲ့ MATA က ဆိုပါတယ်။

ဒီအဖွဲ့က မြန်မာဘာသာနဲ့ ထုတ်ပြန်တဲ့ ၇၄ မျက်နှာပါ အစီရင်ခံစာကို "မှားယွင်းသော သယံဇာတစီမံခန့်ခွဲမှုက အကျင့်ပျက်ခြစားမှုနှင့် သယံဇာတကျိန်စာကို ဖြစ်ပေါ်စေခဲ့သလား" လို့ အမည်ပေးထားပါတယ်။

သတ္ထုတွင်း၊ သစ်တော၊ ကျောက်စိမ်း၊ ရေနံနဲ့ သဘာဝဓာတ်ငွေ့ အစရှိတဲ့ ဝင်ငွေကောင်းတဲ့ လုပ်ငန်းတွေရဲ့ ဝင်ငွေအသီးသီးကို ကုမ္ပဏီတွေရဲ့ ထုတ်ပြန်တဲ့စာရင်း၊ အစိုးရက ထုတ်ပြန်တဲ့စာရင်း ကွဲပြားခြားနားနေတာကိုလည်း အစီရင်ခံစာက မေးခွန်းထုတ်ထားပါတယ်။

“စာရင်းဖော်ပြချက်က နေရာတိုင်းမှာကွာတယ်၊ အနှစ်ချုပ်ပြောမယ်ဆိုရင် ၃ နေရာပြောလို့ရမယ်၊ ပထမနေရာက ကိစ္စတစ်ခုထဲမှာ ကုမ္ပဏီရဲ့ ဖော်ပြတဲ့စာရင်းနဲ့ အစိုးရကဖော်ပြတဲ့စာရင်းကွာတယ်၊ နိုင်ငံပိုင်စီးပွားရေးလုပ်ငန်းတွေမှာ စာရင်းဖော်ပြမှုနှစ်ခုကွာတာတွေ့ရတယ်၊ နောက်တစ်ခုကွာခြားချက်က အစိုးရအချင်းချင်းကြားမှာ ကွာတာဖြစ် ပါတယ်၊ ဌာနတစ်ခုက တခြားဌာနတစ်ခုကို ပေးသွင်းတဲ့နေရာမှာသော်လည်းကောင်း စာရင်းပေးသွင်းတဲ့ဟာမှာ ကွာခြားတာတွေ့ရတယ်၊ အဲဒါက သေသေချာချာဖြေရှင်းဖို့လိုတယ်၊ မဖြေရှင်းနိုင်ရင် လက်ခံနိုင်စရာမရှိတဲ့ကိစ္စဖြစ် ပါတယ်၊ နောက်တစ်ခု ကွာခြားချက်က EITI ထုတ်ဖို့ပေးတဲ့ စာရင်းတွေနဲ့ ဗဟိုစာရင်းအင်းအဖွဲ့က ထုတ်ပြန်တဲ့ စာရင်းတွေကွာတာသွားတွေ့တယ်”