WY ၁သန်းနီးပါး ဘူးသီးတောင်မှာ ဖမ်းမိ

• 
  2017-11-21

ရခိုင်ပြည်နယ် ဘူးသီးတောင်မြို့မှာ ကာလတန်ဖိုးငွေကျပ် သိန်းပေါင်း နှစ်သောင်းနီးပါးတန်ဖိုးရှိတဲ့ WY စိတ်ကြွဆေးပြား ကိုးသိန်းခြောက်သောင်းကျော်ကို ရဲတပ်ဖွဲ့က မနေ့က သိမ်းဆည်းရမိခဲ့ပါတယ်။

ဘူးသီးတောင်မြို့နယ် အိုးသည်ရွာအနီး တောင်ကြောတစ်နေရာကနေ သိမ်းဆည်းရမိခဲ့တာလို့ ဘူးသီးတောင် မြို့မရဲစခန်းမှူး ဒုရဲမှူးသောင်းကြွယ်က ပြောပါတယ်။

"မူးယစ်ဆေးဝါး ဆာလာအိတ်နဲ့ထုပ်ပြီး အထုပ်က ငါးထုပ်၊ အဲထဲမှာ ဆေးပြားက ၉၆၅၂၅၀။ ကျနော်တို့ အဲဒီမှာ အိုးသည်ရွာရဲ့ မြောက်ဘက်တောင်ကြော၊ အိုးသည်ရွာနဲ့ဆိုရင် တစ်ဖာလုံလောက်တော့ ဝေး လိမ့်မယ်။ အဲနားမှာ ဘင်္ဂါလီတွေနေခဲ့တဲ့ တဲလေး တစ်လုံး နှစ်လုံးရှိတယ်။ အခုတော့ လူမရှိတော့ဘူး။ အဲဒီတဲတွေ ဘာတွေရော အကုန်လိုက်ရှာတာပေါ့။ နောက်ဆုံး အဲဒီနားမှာ သွားတွေ့တယ်။"

ဘူးသီးတောင်မြို့အမှတ်(၄)ရပ်ကွက်မှာ ပြီးခဲ့တဲ့ နိုဝင်ဘာလ ၁၃ ရက်နေ့က နေအိမ်ခြံဝင်းတစ်ခုကနေ WY ဆေးပြား ကိုးသိန်းခုနစ်သောင်းကျော် ဖမ်းဆီးရမိခဲ့ပါတယ်။

အဲဒီအမှုနဲ့ပတ်သက်ပြီး အမျိုးသားတစ်ဦးကို စစ်ဆေးရာမှာ သူ့ရဲ့ထွက်ဆိုချက်အရ မနေ့က သွားရောက်ရှာဖွေရာမှာ ထပ်မံသိမ်းဆည်းရမိခဲ့တာလို့သိရပါတယ်။

အဓိကတရားခံကတော့ ပထမအကြိမ် ဖမ်းဆီးစဉ်ကတည်းက ထွက်ပြေးတိမ်းရှောင်နေတယ်လို့ ဘူးသီးတောင် မြို့မစခန်းမှူး ဒုရဲမှူးသောင်းကြွယ် ကပြောပါတယ်။