သံတမန် လေးစားသမှု အဖြစ် မြန်မာလို့ ခေါ်ဝေါ်

• 
  2014-01-06

အမေရိကန်အစိုးရက မြန်မာနိုင်ငံရဲ့ ၆၆ နှစ်မြောက်လွတ်လပ်ရေးနေ့အတွက် ပေးပို့တဲ့သဝဏ်လွှာမှာ နိုင်ငံရဲ့အမည်ကို Burma အစား Myanmar လို့ သုံးနှုန်းလိုက်တာဟာ သံတမန်ယဉ်ကျေးမှုအရ လေးစားသမှုပြုတဲ့အနေနဲ့ သုံးစွဲခဲ့ခြင်းမျှဖြစ်ပြီး မိမိတို့ အစိုးရရဲ့မူဝါဒ တစုံတရာပြောင်းလဲသွားတဲ့ အဓိပ္ပါယ် မဟုတ်ပါဘူးလို့ အမေရိကန်နိုင်ငံခြားရေးဌါနက မနေ့က ပြောကြားလိုက်ပါတယ်။

အမေရိကန် နိုင်ငံခြားရေးဌာန ပုံမှန်သတင်းစာရှင်းလင်းပွဲမှာ ပြောခွင့်ရအမျိုးသမီး Marie Harf က တချို့အကြောင်းကိစ္စတွေမှာ သံတမန်ရေးအရ လေးစားသမှုအဖြစ် မြန်မာလို့ မိမိတို့သုံးနှုန်းပါတယ်လို့ သတင်းထောက်တစ်ဦးရဲ့မေးခွန်းကို တနင်္လာနေ့က ဖြေကြားခဲ့တာဖြစ်ပါတယ်။

အရင်နှစ်က ပေးပို့တဲ့ မြန်မာနိုင်ငံ လွတ်လပ်ရေးနေ့ သဝဏ်လွှာမှာ အမေရိကန် နိုင်ငံရေးခြားရေးဝန်ကြီး မစ္စ ဟီလာရီ ကလင်တန်က Burma လို့သုံးစွဲခဲ့ပြီး၊ အခုနှစ် နိုင်ငံရေးခြားရေးဝန်ကြီး မစ္စတာ ဂျွန် ကယ်ရီ ပေးပို့တဲ့သဝဏ်လွှာမှာတော့ Myanmar လို့ သုံးစွဲခဲ့ပါတယ်။