ကချင်ပြည်နယ်မှာ စစ်အစိုးရရော KIO ပါ လုံခြုံရေးတိုးမြှင့်
ရွေးကောက်ပွဲအနိုင်ရထားတဲ့ စစ်အစိုးရ ဝန်ကြီးချုပ် ဦးသိန်းစိန်နဲ့ ဝန်ကြီး ဦးအောင်သောင်းတို့အဖွဲ့က ကချင်ပြည်နယ် ခရီးစဉ် ရှိတဲ့အတွက် မြစ်ကြီးနားမြို့မှာ လုံခြုံရေး တင်းတင်းကျပ်ကျပ် ချထားတယ်လို့ RFA က စုံစမ်းသိရှိရပါတယ်။
-
2010-11-29 -
-
-
ဒီအတွက် ပုဂ္ဂလိက စားသောက်ဆိုင်တွေကိုလည်း ပိတ်ခိုင်းထားတယ်လို့ သိရပါတယ်။ စစ်အစိုးရနဲ့ အပစ်ရပ် KIA ၊ KIO ကချင်အဖွဲ့တို့ နှစ်ဖက်ဆက်ဆံရေး တင်းမာနေတဲ့အချိန်မှာ အခုလို စစ်အစိုးရ နဲ့ ကြံ့ခိုင်ဖွံ့ဖြိုးရေးပါတီ ခေါင်းဆောင် တာဝန်ရှိသူတွေ ရောက်နေတာဟာ ကချင်အဖွဲ့နဲ့ စကားပြောဖို့လားလို့ စုံစမ်းကြည့်တဲ့အခါမှာ အမည်မဖော်လိုတဲ့ ကချင်အဖွဲ့အရာရှိတဦးက မဟုတ်ကြောင်း ပြန်လည် ပြောကြားပါတယ်။
ပြီးခဲ့တဲ့ သီတင်းပတ်တွေတုန်းက စစ်အစိုးရရဲ့ ဖိအားပေးမှုကြောင့် ကချင်ပြည်နယ်မှာ ရှိတဲ့ KIO ၊ KIA အဖွဲ့ရဲ့ ဆက်ဆံရေးရုံး အားလုံး ပိတ်လိုက်ရပြီး၊ နှစ်ဖက်ဆက်ဆံရေး ပြတ်တောက်သွားခဲ့ပါတယ်။
ဒါကြောင့် လက်ရှိကာလမှာ KIO ၊ KIA အဖွဲ့ရဲ့ ဗဟိုဆက်ဆံရေးရုံးတရုံးနဲ့ မြစ်ကြီးနားကို လျှပ်စစ်ဓာတ်အားပေးနေတဲ့ KIO ရဲ့ ကုမ္ပဏီရုံး၊ စုစုပေါင်း နှစ်ရုံးပဲ ဆက်လက်ဖွင့်ထားတယ်လို့ ဆိုပါတယ်။
ဒါ့အပြင် စစ်အစိုးရဖက်က လုံခြုံရေး တင်းကျပ်ထားသလို၊ KIO ဘက်ကလည်း လုံခြုံရေး တိုးချထားတယ်လို့ သိရပါတယ်။
ဒါကြောင့် လာမဲ့ ၂၀၁၁ ခု-နှစ်ဆန်းတွေလောက်မှာ စစ်အစိုးရနဲ့ KIO အဖွဲ့ကြား တိုက်ပွဲတွေ ဖြစ်လာနိုင်တယ်လို့ ခန့်မှန်းထားကြောင်း အမည်မဖော်လိုတဲ့ ကချင်အရာရှိက ပြောပါတယ်။
မကြာခင်တုန်းက စစ်အစိုးရက KIO ကို သောင်းကျန်းသူလို့ သတင်းစာတွေမှာ ပြန်လည်သုံးနှုန်း ဖော်ပြခဲ့တာလည်း တွေ့ရပါတယ်။