စစ်ပွဲတွေကြားက ရိုဟင်ဂျာတွေကို အကာအကွယ်ပေးဖို့ MSF တောင်းဆို
ရခိုင်ပြည်နယ်အတွင်းမှာ လူသားချင်းစာနာမှုဆိုင်ရာအကျပ်အတည်း ဆိုးရွားလာနေတာကို ပြသနေကြောင်း MSF က ပြောပါတယ်။
-
RFA Burmese
2024-08-09 -
-
-
ရခိုင်ပြည်နယ်မှာဖြစ်ပွားနေတဲ့ ပဋိပက္ခတွေအတွင်းက အရပ်သားပြည်သူတွေကို အကာအကွယ်ပေးရမယ်လို့ နယ်စည်းမထားဆရာဝန်များအဖွဲ့ (MSF) က ဩဂုတ်လ ၉ ရက်နေ့က ကြေညာချက် ထုတ်ပြန်ပါတယ်။
ရခိုင်ပြည်နယ်က ပဋိပက္ခတွေအတွင်း ထိခိုက်ဒဏ်ရာရပြီး ဘင်္ဂလားဒေ့ရှ်နိုင်ငံကို ထွက်ပြေးလာခဲ့တဲ့ ရိုဟင်ဂျာအရေအတွက် ပြီးခဲ့တဲ့သီတင်းပတ်မှာ တိုးလာခဲ့ကြောင်း၊ ဒါဟာ ရခိုင်ပြည်နယ်အတွင်းမှာ လူသားချင်းစာနာမှုဆိုင်ရာအကျပ်အတည်း ဆိုးရွားလာနေတာကို ပြသနေကြောင်း MSF က ပြောပါတယ်။
ဩဂုတ်လ ၇ ရက်နေ့အထိ ၄ ရက်အတွင်း MSF အဖွဲ့က ဒဏ်ရာရသူ ၃၉ ဦးကို ဆေးကုသပေးခဲ့ရပြီး အဲဒီထဲမှာ ၄၀ ရာခိုင်နှုန်းက အမျိုးသမီးနဲ့ ကလေးတွေဖြစ်ကြတယ်လို့ ဆိုပါတယ်။ အများအပြားက မော်တာကျည်ထိမှန်တာနဲ့ သေနတ်ဒဏ်ရာတွေဖြစ်တယ်လို့လည်း ဆိုပါတယ်။ ဩဂုတ်လ ၆ ရက် တစ်ရက်ထဲမှာတင် ဒဏ်ရာရသူ ၂၁ ယောက် ဆေးကုသပေးခဲ့ရပြီး ဒီအတိုင်းအတာအထိ ပြင်းထန်ဒဏ်ရာတွေနဲ့ တွေ့မြင်ရတာ ဒီနှစ်အတွင်း ပထမဦးဆုံးအကြိမ်ဖြစ်တယ်လို့ MSF က ဆိုပါတယ်။
ဒီအခြေအနေတွေကြောင့် ရခိုင်ပြည်နယ်တွင်းက ရိုဟင်ဂျာတွေအပေါ် ပဋိပက္ခတွေရဲ့ သက်ရောက်မှု ပိုပြီးစိုးရိမ်ဖွယ်ရာဖြစ်လာနေတယ်လို့ ဘင်္ဂလားဒေ့ရှ်နိုင်ငံဆိုင်ရာ MSF ကိုယ်စားလှယ်က ပြောပါတယ်။ မြန်မာနိုင်ငံမှာ အရပ်သားပြည်သူတွေအတွက် လုံခြုံစိတ်ချရတဲ့နေရာ တနေ့တခြားရှားပါးလာနေတယ်လို့လည်း သူက ဆိုပါတယ်။