တပ်မတော်က တရားစွဲဆိုထားသူ ၈ ဦးကို အမှုရုပ်သိမ်း

• 
  2017-09-01

သတင်းမီဒီယာသမား ၆ ယောက်အပါအဝင် ၈ ဦးကို တရားစွဲထားတဲ့ အမှုတွေကို တပ်မတော်က ဒီကနေ့ ပြန်ပြီးရုပ်သိမ်းလိုက်တယ်လို့ တပ်မတော် ကာကွယ်ရေး ဦးစီးချုပ်ရုံးက ထုတ်ပြန်ပါတယ်။

The Voice Daily သတင်းစာ အယ်ဒီတာချုပ် ဦးကျော်မင်းဆွေ၊ The Daily Eleven သတင်းစာ အယ်ဒီတာချုပ် ဦးဝေဖြိုး၊ ဆောင်းပါးရှင် ဗြိတိသျှကိုကိုမောင်၊ DVB သတင်းဌာနက အကြီးတန်း သတင်းထောက်တွေဖြစ်တဲ့ ဦးအေးနိုင်၊ ဦးပြည့်ဘုန်းအောင်၊ ဧရာဝတီ သတင်းဌာနက အကြီးတန်း သတင်းထောက်  ဦးသိန်းဇော် (ခေါ်) ကိုလဝီဝမ် စတဲ့ သတင်းမီဒီယာသမား ၆ ယောက်ကို တရားစွဲထားတဲ့ အမှုတွေကို တပ်မတော်က ပြန်ရုပ်သိမ်းလိုက်တာဖြစ်ပါတယ်။

ဒါ့အပြင် နိုင်ငံရေး တက်ကြွလှုပ်ရှားသူ ဦးထင်ကျော်နဲ့ တောင်ငူ ဗမာနိုင်ငံလုံးဆိုင်ရာ ကျောင်းသားများ သမဂ္ဂ ဒုတိယဥက္ကဌ ကိုဝေယံသိန်း (ခေါ်) ဗစ်တာ တို့ကိုလည်း အမှုပြန်ရုပ်သိမ်းပေးလိုက်တာပါ။

နိုင်ငံနဲ့ပြည်သူ့အကျိုးကို အတူတကွ သယ်ပိုးထမ်းဆောင်မှုကို အသိအမှတ်ပြုပြီး နိုင်ငံတော်နှင့် ပြည်သူတွေရဲ့ အမျိုးသားအကျိုးစီးပွားကို ဆက်ပြီးအတူလက်တွဲ လုပ်ဆောင်နိုင်ဖို့ တရားစွဲဆိုထားတဲ့ အမှုတွေကို ကျေအေးရုပ်သိမ်းပေးလိုက်တာဖြစ်တယ်လို့ တပ်မတော်ကာကွယ်ရေး ဦးစီးချုပ်ရုံးက ထုတ်ပြန်ထားပါတယ်။

အခုလို အမှုရုပ်သိမ်းပေးတဲ့အတွက် အထူးကျေးဇူးတင်ရှိကြောင်း မြန်မာနိုင်ငံ သတင်းမီဒီယာကောင်စီကလည်း ထုတ်ပြန်ထားပါတယ်။