ငြိမ်းချမ်းရေးလုပ်ငန်းစဉ်တွေမှာ အရပ်ဖက် လူ့အဖွဲ့အစည်းတွေပါဝင်ကြဖို့ သမ္မတ တိုက်တွန်း

ရန်ကုန်တိုင်းဒေသကြီး အစိုးရအဖွဲ့ရုံးမှာ ဒီကနေ့ ညနေပိုင်းကကျင်းပတဲ့ သမ္မတဦးသိန်းစိန်နဲ့ အရပ်ဖက်အခြေပြု လူမှုအဖွဲ့အစည်း စုစုပေါင်း ၈၆ ဖွဲ့နဲ့ တွေ့ဆုံတဲ့ အခမ်းအနားမှာ ငြိမ်းချမ်းရေးလုပ်ငန်းစဉ်တွေမှာ လူထုနဲ့အရပ်ဖက်လူ့အစည်းတွေရဲ့ အခန်းကဏ္ဍဟာ အရေးပါတယ်လို့ သမ္မတဦးသိန်းစိန်က ပြောခဲ့ပါတယ်။

"ငြိမ်းချမ်းရေးဖြစ်စဉ် အောင်မြင်ဖို့ဆိုတာ လူထုကလည်း ပါဝင်ဖို့လိုပါတယ်၊ ခေါင်းဆောင်တွေရဲ့ သဘောတူညီမှု၊ နားလည်မှုတွေကို လူထုဆီရောက်အောင် ပေးပို့နိုင်အဖို့အတွက် အရပ်ဖက်လူ့အဖွဲ့အစည်းတွေရဲ့ အခန်းကဏ္ဍကလည်း အင်မတန်မှ အရေးကြီးပါတယ်၊ မိမိတို့ အစိုးရအဖွဲ့အနေနဲ့ အရပ်ဖက်လူ့အဖွဲ့အစည်းတွေ ငြိမ်းချမ်းရေးဖြစ်စဉ်မှာ ပါဝင်လာနိုင်ဖို့ ဆောင်ရွက်နေပါတယ်။"

ဒါ့အပြင် နိုင်ငံတည်ဆောက်ရေး၊ အမျိုးသားပြန်လည်စည်းလုံးညီညွှတ်ရေးနဲ့ ငြိမ်းချမ်းရေးလုပ်ငန်းစဉ်တွေမှာ အစိုးရနဲ့အရပ်ဖက် လူ့အဖွဲ့အစည်းတွေပူးပေါင်းဖို့ သမ္မတ ဦးသိန်းစိန်က ဖိတ်ခေါ်လိုက်ပါတယ်။

"အရပ်ဖက်လူ့အဖွဲ့အစည်းတွေရဲ့ပါဝင်မှုကို ယခုထက်ပိုပြီး ပူးပေါင်းပါဝင်ဖို့ကိုလည်း တိုက်တွန်းပြောကြားလိုပါတယ်၊ ကျွန်တော်တို့အားလုံး ငြိမ်းချမ်းရေးလုပ်ငန်းစဉ်တွေမှာ တူညီတာတွေကို ပူးပေါင်းဆောင်ရွက်ကြဖို့ ဖိတ်ခေါ်တာဖြစ်ပါတယ်"

အဲဒီ့အခမ်းအနားမှာ ငြိမ်းဖောင်ဒေးရှင်း၊ မြန်မာနိုင်ငံအမျိုးသမီး စွမ်းဆောင်ရှင်များအသင်း၊ ငြိမ်းချမ်းရေးစက်ဝန်း၊ ငြိမ်းချမ်းရေးကွန်ရက်စတဲ့ အဖွဲ့အစည်းတွေက ကချင်ပြည်နယ်မှာ ဖြစ်ပွားနေတဲ့ စစ်ပွဲအကြောင်းတွေ၊ မြန်မာနိုင်ငံအတွင်းမှာဖြစ်ပေါ်နေတဲ့ လူမှုရေးအခက်အခဲတွေ၊ အစိုးရအနေနဲ့အရပ်ဖက် လူ့အဖွဲ့အစည်းတွေကို လူမှုရေးလုပ်ငန်းစဉ်တွေမှာ ပိုပြီးနေရာပေးဖို့စတဲ့ အချက်တွေကို တင်ပြဆွေးနွေးခဲ့ပြီး လူပုဂ္ဂိုလ် ၂၀၀ခန့် တက်ရောက်ခဲ့ပါတယ်။