အင်းနားရွာမီးရှို့ခံရလို့ ဒေသခံ ၆၀၀ ဝန်းကျင်ထွက်ပြေး

• 2022-09-24

စစ်ကိုင်းတိုင်း၊ တန့်ဆည်မြို့နယ် အင်းနားရွာကို စက်တင်ဘာလ ၂၄ ရက် ဒီနေ့ နေ့လယ် နှစ်နာရီဝန်းကျင်မှာ စစ်ကောင်စီတပ်က ဝင်ရောက်စီးနင်းပြီး မီးရှို့ခဲ့လို့ အရပ်သား ၆၀၀ ဝန်းကျင် အိုးအိမ်စွန့်ခွာ ထွက်ပြေးနေရတယ်လို့ ဒေသခံတွေက RFA ကို ပြောပါတယ်။

တန့်ဆည်မြို့အနောက်တောင်ဘက် ငါးမိုင်အကွာမှာရှိတဲ့ အင်းနားရွာကို စစ်ကောင်စီ တပ်က အင်အား ၁၀၀ ဝန်းကျင်နဲ့ ဝင်စီးခဲ့တာလို့ ဒေသခံတစ်ဦးက ပြောပါတယ်။

"မနေ့က ဝင်လာတုန်းမှာ ရွာဘေးက တဲနဲ့ ငပျောတောကို မီးစရှို့တယ်။ အဲဒီတုန်းက ရွာထဲမဝင်လာသေးဘူး။ ဒီနေ့ ၂ နာရီထိုးလောက် ရောက်လာပြီး ရောက်ရောက်ချင်း တန်းမီးရှို့တော့တာပဲ"

ဒီနေ့ညနေ ၄ နာရီဝန်းကျင်အထိ ရွာမီးလောင်ကျွမ်းနေတာကို သစ်ပင်အမြင့်တွေပေါ်က ကြည့်ရင်မြင်နေရတယ်လို့ သူက ဆိုပါတယ်။ အင်းနားရွာမှာ အိမ်ခြေ ၁၄၀ ကျော်ရှိပါတယ်။ မီးရှို့ခံရတဲ့ လူနေအိမ်အရေအတွက်ကိုတော့ မသိရသေးလို့ ဒေသခံတွေက ပြောပါတယ်။

အင်းနားရွာကို စစ်ကောင်စီတပ်တွေ ပထမဆုံးအကြိမ် ဝင်ရောက်မီးရှို့တာလို့ ဒေသခံတွေ က ပြောပါတယ်။

ဒီဖြစ်စဉ်နဲ့ပတ်သက်လို့ စစ်ကောင်စီဘက်က တစ်စုံတစ်ရာ သတင်းထုတ်ပြန်တာ မတွေ့ရ သလို စစ်ကောင်စီ စစ်ကိုင်းတိုင်းအစိုးရ ပြောရေးဆိုခွင့်ရှိသူ ဦးအေးလှိုင်ကို RFA က ဖုန်းနဲ့ ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။