တော်လှန်ရေးအင်အားစုတွေနဲ့ ပူးပေါင်းဖို့ မွန်လူထုကို MSFC တိုက်တွန်း

• RFA Burmese
  2024-02-24

နိုင်ငံရေးအာဏာကို ရယူဖို့ လက်နက်ကိုင်လမ်းစဉ်ကနေ တခြားနည်းလမ်းမရှိတဲ့အတွက် မွန်ပြည်ဖက်ဒရယ်ကောင်စီ အပါအဝင် တခြားတော်လှန်ရေးအင်အားစုတွေနဲ့ ပူးပေါင်းဖို့ မွန်လူထုကို ဖေဖော်ဝါရီလ ၂၅ ရက်နေ့မှာကျရောက်တဲ့ မွန်အမျိုးသားနေ့မှာ မွန်ပြည်ဖက်ဒရယ်ကောင်စီက တိုက်တွန်းလိုက်ပါတယ်။

မွန်ပြည်ဖက်ဒရယ်ကောင်စီ MSFC ဟာ မွန်ပြည်နယ်အတွင်းက နိုင်ငံရေး၊ လူမှုရေး အဖွဲ့တွေ စုပေါင်းဖွဲ့စည်းထားတဲ့ တော်လှန်ရေးအဖွဲ့ဖြစ်ပြီး စစ်အာဏာရှင်တိုက်ဖျက်ရေးအတွက် မွန်ပြည်တော်လှန်ရေးတပ် MSRF ကိုလည်း ဖွဲ့စည်းတည်ထောင်ထားပြီး ဖြစ်တယ်လို့ ဆိုပါတယ်။

လက်ရှိမှာ စစ်ကောင်စီက မွန်လူငယ်တွေကို စစ်မှုမထမ်းမနေရ ဥပဒေနဲ့ စစ်ကောင်စီတပ်ထဲကို သွတ်သွင်းဖို့ ကြိုးပမ်းနေတာကြောင့် ရပ်တည်ဖို့ ပိုခက်ခဲလာတယ်လို့ ပြောပါတယ်။

တိုင်းရင်းသားတွေအနေနဲ့ စာပေ၊ စကား၊ ယဉ်ကျေးမှုတွေကို ဘယ်လိုပဲ ထိန်းသိမ်းစောင့်ရှောက်ပါစေ နိုင်ငံရေးအာဏာ လက်ဆုပ်လက်ကိုင်မရှိသရွေ့ လူမျိုးတိမ်ကောပပျောက်တာတွေ ကြုံတွေ့နေရမှာပဲလို့ MSFC ရဲ့ ထုတ်ပြန်ချက်မှာ ဖော်ပြထားပါတယ်။