ကျားဖြန့်လုပ်ငန်းက တရုတ်နိုင်ငံသား အယောက်တစ်ရာကျော်ကို ထပ်လွှဲ
လေဆိပ်ရောက်တဲ့အခါ အသင့်စောင့်ဆိုင်းနေတဲ့ တရုတ်တာဝန်ရှိသူတွေက စာရင်းမှန်-မမှန်စစ်ဆေးပြီးမှ လေယာဉ်ပေါ်ပို့ဆောင်ပါတယ်။
-
RFA Burmese
2025-02-22 -
-
-
မြန်မာနိုင်ငံက ကျားဖြန့်အွန်လိုင်းလိမ်လည်ဂိုဏ်းမှာ လုပ်ကိုင်တဲ့ တရုတ်လူမျိုး အယောက် တစ်ရာကျော်ကို ထိုင်းနိုင်ငံကတစ်ဆင့် မြန်မာကနေ တတိယအသုတ်အဖြစ် ဖေဖော်ဝါရီ ၂၂ ရက်နေ့က ပြန်လည်လွှဲပြောင်းပေးလိုက်ပါတယ်။
ဒီတရုတ်နိုင်ငံသားတွေကို မြဝတီအားကစားရုံကနေ ကရင်နယ်ခြားစောင့်တပ်နဲ့ စစ်ကောင်စီလူဝင်မှုကြီးကြပ်ရေးအဖွဲ့က မြဝတီ ထိုင်း-မြန်မာ ချစ်ကြည်ရေးတံတားအမှတ် (၂ ) ကို ခေါ်ဆောင်ခဲ့တာဖြစ်ပါတယ်။
အဲဒီမှာ အသင့်စောင့်နေတဲ့ ထိုင်းတာဝန်ရှိသူတွေက ပြန်လည်လွှဲပြောင်းပေးတဲ့ တရုတ်လူမျိုးတွေရဲ့ မှတ်တမ်းရယူပြီးမှ အမြန်ကား နှစ်စီးနဲ့ မဲဆောက်လေဆိပ်ကို ပို့ဆောင်ပါတယ်။
လေဆိပ်ရောက်တဲ့အခါ အသင့်စောင့်ဆိုင်းနေတဲ့ တရုတ်တာဝန်ရှိသူတွေက စာရင်းမှန်-မမှန်စစ်ဆေးပြီး လေယာဉ်ပေါ်ပို့ဆောင်ပါတယ်။
လေယာဉ်တစ်ခေါက်မှာ ပြန်လွတ်မြောက်လာတဲ့ တရုတ်နိုင်ငံသား အယောက် ၅၀ စီတင်ဆောင်ပြီး တစ်ယောက်ကို အစောင့်နှစ်ယောက်က စောင့်ကြပ်ခေါ်ဆောင်တဲ့အတွက် လေယာဉ်တစ်ခေါက်မှာ လုံခြုံရေးအစောင့် ၁၀၀ လိုက်ပါတယ်လို့ RFA သတင်းအရင်းအမြစ်က ပြောပါတယ်။
ဒီလ ၂၀ ရက်က လေယာဉ်လေးခေါက်၊ ၂၁ ရက်က ခြောက်ခေါက်နဲ့ ၂၂ ရက်မှာ သုံးခေါက်ပို့ဆောင်ပါတယ်။ မြန်မာက တရုတ်လူမျိုး စုစုပေါင်း ၆၂၁ ယောက်လွှဲပြောင်းပေးထားပြီး တရုတ်နိုင်ငံကို ဆက်လက်လွှဲပြောင်းပေးရမယ့်သူတွေ မြဝတီအားကစားရုံမှာ ကျန်ရှိနေပါသေးတယ်။
ကျားဖြန့်လုပ်ငန်းတွေမှာ ပါဝင်ပတ်သက်သူတွေလည်း ထပ်မံဖမ်းဆီးရရှိထားတယ်လို့ RFA သတင်းအရင်းအမြစ်က ပြောပါတယ်။