တရုတ်သရုပ်ဆောင် လူကုန်ကူးခံရမှု အဓိကသံသယရှိသူကို ဖမ်းမိကြောင်း တရုတ်ပြော

• RFA Burmese
  2025-01-27

ထိုင်းနိုင်ငံမှာ ဇာတ်ကားရိုက်ကူးမယ်လို့ လိမ်လည်ခေါ်ဆောင်ပြီး မြန်မာနိုင်ငံထဲ လူကုန်ကူးခံခဲ့ရတဲ့ တရုတ်သရုပ်ဆောင်အမှုအတွက် အဓိကသံသယရှိသူကို ဖမ်းမိထားကြောင်း တရုတ်နိုင်ငံ ပြည်သူ့လုံခြုံရေးဌာနက ပြောလိုက်ပါတယ်။

ထိုင်းနိုင်ငံက တရားရေးဌာနအပါအဝင် သက်ဆိုင်ရာအဖွဲ့အစည်းတွေရဲ့ ပူးပေါင်းကူညီမှုနဲ့ ဖမ်းဆီးနိုင်ခဲ့တာဖြစ်ကြောင်း တနင်္ဂနွေနေ့က ပြောကြားလိုက်တာပါ။

ဖမ်းမိထားသူရဲ့ မျိုးရိုးနာမည်က ယမ် ဖြစ်ပြီး စနေနေ့က တရုတ်နိုင်ငံကို ပြန်ရောက်သွားတယ်လို့ ဆိုပါတယ်။ သူနဲ့ပတ်သက်တဲ့ အသေးစိတ်အချက်အလက်ကိုတော့ ပြောဆိုထားတာမရှိပါဘူး။

တရုတ်နိုင်ငံအနေနဲ့ ငွေလိမ်ဂိုဏ်းတွေကို နှိမ်နင်းဖို့နဲ့ ပြစ်မှုကျူးလွန်သူတွေကို ဖမ်းဆီးနိုင်ဖို့ သက်ဆိုင်ရာနိုင်ငံတွေနဲ့ ပူးပေါင်းဆောင်ရွက်တာတွေ တိုးမြှင့်သွားမှာဖြစ်ကြောင်းလည်း ကြေညာချက်မှာ ပါရှိပါတယ်။

မြန်မာနိုင်ငံက အွန်လိုင်းငွေလိမ်ဂိုဏ်းတွေကို အမြစ်ပြတ်ချေမှုန်းဖို့ တရုတ်၊ ထိုင်းနဲ့ မြန်မာနိုင်ငံက တာဝန်ရှိသူတွေ ပြီးခဲ့တဲ့ သီတင်းပတ်က သဘောတူခဲ့ကြတာပါ။

ဒါ့အပြင် ထိုင်း၊ မြန်မာနဲ့ ကမ္ဘောဒီးယားနယ်စပ်တစ်လျှောက်က အွန်လိုင်းငွေလိမ်ဂိုဏ်းတွေကို စုံစမ်းဖော်ထုတ်‌နှိမ်နင်းရေးအတွက် ဘန်ကောက်မှာ ပူးပေါင်းစင်တာတစ်ခု တည်ထောင်ဖို့ တရုတ်နဲ့ ထိုင်းနိုင်ငံတို့ သဘောတူခဲ့ကြကြောင်း ရိုက်တာသတင်းမှာ ဖော်ပြထားပါတယ်။