မဲဆောက်ရောက် ရွှေ့ပြောင်းကလေးတွေကို ကိုရီးယားလူမှုရေးအဖွဲ့ စိတ်ပိုင်းဆိုင်ရာ အကူအညီပေးနေ

မဲဆောက်မြို့မှာ KMCC (Korea Mae Sot Cooperation Center) ကို လွန်ခဲ့တဲ့ ၂၀၀၆ ခုနှစ်ကတည်းက ကိုရီးယားအစိုးရ KOICA ရဲ့ အစီအစဉ်နဲ့ဖွင့်လှစ်ထားပြီး လက်ရှိ ရွှေ့ပြောင်းမြန်မာကလေးငယ်တွေအတွက် စိတ်ဒဏ်ရာတွေကို ကုစားပေးနေပါတယ်။

KOICA ရဲ့ အစီအစဉ်တွေတွေထဲကမှ ဒီအစီအစဉ်ဟာ ဒုတိယအကြိမ်မြောက်ဖြစ်ပြီး မြန်မာရွှေ့ပြောင်း ကျောင်းတချို့မှာ သုံးလတာကာလအတွင်း သူတို့လုပ်ဆောင်ပေးခဲ့တာတွေကို ဇန်နဝါရီလ ၂၀ ရက်နေ့ ညနေပိုင်းက မဲဆောက်မြို့ The Teak ဟိုတယ်မှာ အခမ်းအနားနဲ့ ကျင်းပခဲ့တာပါ။

မဲဆောက်ဒေသအခြေစိုက် အဖွဲ့တချို့နဲ့ ပူးပေါင်းဆောင်ရွက်နေတဲ့အကြောင်း KMCC ရဲ့ အထွေထွေမန်နေဂျာ Mijo Ko က ရှင်းပြပါတယ်။

"ကိုရီးယားအဖွဲ့က ၁၅ ယောက်နဲ့ တာ့ခရိုင်ထဲက မဲဆောက်ဒေသခံအဖွဲတွေဖြစ်တဲ့ Joy House၊ ECD၊ BLSO စတဲ့အဖွဲ့တွေအောက်က Migrant ကျောင်းတွေမှာ အဖွဲ့လေးဖွဲ့နဲ့ လုပ်တာပါ၊ သူတို့အဖွဲ့တွေက သူတို့ဘာသာ Project ဆွဲပြီးတော့ Migrant ကျောင်းသားလေးတွေအတွက် ပညာရေး၊ ကျန်းမာရေး၊ ယဉ်ကျေးမှု၊ စိတ်ဒဏ်ရာတွေကုစားပေးကြတာဖြစ်ပါတယ်၊ Joy House မှာဆိုရင် Art ပိုင်းဆိုင်ရာကို အဓိက သင်ကြားပေးတယ်၊ နောက်တခြား Migrant ကျောင်းတွေမှာဆိုရင် ကလေးတွေကို စာသင်တယ်၊ ကလေးတွေအတွက် နေ့လယ်စာကျွေးတယ်၊ သုံးလအတွင်းပေါ့၊ ဘတ်ဂျက်ထဲမှာ ရေသန့်စက်တွေ တပ်ပေးတာလည်း ပါတယ်၊ ကျန်းမာရေးနဲ့ပတ်သက်တဲ့ ခေါင်းစဉ်တွေ သင်ပေးတယ်၊ အင်္ဂလိပ်စာတွေ သင်ပေးတယ်၊ ပြီးတော့ ဆရာ၊ ဆရာမတွေအတွက်လည်း သင်တန်းတွေပေးတယ်။"

သုံးလတာကာလအတွင်း ကျန်းမာရေး၊ ပညာရေး၊ အနုပညာ စတဲ့ခေါင်းစဉ်အလိုက် သင်ကြားရေးပိုင်း ဆိုင်ရာကျွမ်းကျင်တဲ့ ကိုရီးယားနိုင်ငံသား ၁၅ ယောက်က မဲဆောက်မြို့ဒေသခံလူငယ်တွေ၊ အဖွဲ့တွေနဲ့ ပူးပေါင်းပြီး ရွှေ့ပြောင်းကျောင်းသားလေးတွေကို စိတ်ဒဏ်ရာကုစားပေးတဲ့အနေနဲ့ သင်ကြားပေးနေကြတာပါ။

ကလေးတွေကို စာသင်ခန်းတွေထဲအထိ လက်တွေ့ကျကျသင်ကြားပေးတာဖြစ်တယ်လို့ Joy House အဖွဲ့မှာ အင်္ဂလိပ်စာသင်ကြားပေးနေတဲ့ ဆရာမ No က ပြောပါတယ်။

"သူတို့ကိုရီးယားအဖွဲ့တွေက စိတ်အားတက်ကြွစွာနဲ့ပဲ ပါဝင်ပြီးတော့ Volunteer အနေနဲ့ လုပ်ကြပါတယ်၊ Volunteer လုပ်တဲ့အပြင်ကို ကလေးငယ်တွေနဲ့အတူတူ Classroom တွေထဲမှာဝင်ပြီးတော့ Activities တွေကို ကိုယ်တိုင်လည်းလုပ်ကြပါတယ်၊ ဥပမာအနေနဲ့ပြောရမယ်ဆိုရင် ညီမတို့ဆီမှာ Art Class တွေ ရှိတယ်ပေါ့ Children Art အတန်းတွေရှိမယ်၊ ပန်းချီအတန်းတွေဖြစ်တဲ့ Water Colour တွေကို သူတို့ ကိုယ်တိုင် စိတ်ဝင်တစားနဲ့ ဝင်ရောက်ပြီးတော့ Migrant ကျောင်းသားတွေနဲ့ Activities တွေလုပ်ကြတဲ့ အတွက် အရမ်းပဲကောင်းပါတယ်ရှင့်၊ နောက်တစ်ခုက သူတို့က ကိုရီးယားလူငယ်တွေဖြစ်တဲ့အပြင် ကိုရီးယား ကေပေါ့ Dance တွေ ဒီမှာရတဲ့အချိန်လေးအတွင်းမှာ သင်ကြားပေးသွားတဲ့အတွက် တခြား ကျောင်းတွေမှာ အချိန်ယူပြီး မတတ်နိုင်တဲ့ကျောင်းသားတွေအတွက် သူတို့သင်ယူချင်တဲ့ ကိုရီးယား Language တွေ ကိုရီးယားအကတွေ သင်ယူရတဲ့အတွက် ကလေးတွေစိတ်ပိုင်းဆိုင်ရာမှာ အရမ်းကိုတိုး တက်ပြီးပျော်ရွှင်ရပါတယ်ရှင့်။’’

ကျန်းမာရေးနဲ့ပတ်သက်လို့ စားသောက်နေထိုင်တဲ့ပုံစံတွေ၊ တစ်ကိုယ်ရေသန့်ရှင်းရေးပိုင်းတွေ၊ အင်္ဂလိပ်စာနဲ့ ကိုရီးယားဘာသာစကား သင်ကြားပေးတာတွေ၊ ကေပေါ့ အကအပါအဝင် ကိုရီးယားယဉ်ကျေးမှုပိုင်းဆိုင်ရာ စတာတွေကို ရွှေ့ပြောင်းကျောင်းသားလေးတွေကို သင်ကြားပေးရုံသာမက အဲဒီရွှေ့ပြောင်းကျောင်းတွေက ဆရာ၊ ဆရာမ တွေကိုပါ သင်ကြားပေးခဲ့တယ်လို့ ပြောပါတယ်။

သင်ကြားရေးပိုင်းမတူတာတွေကို BLSO ရဲ့ ကျောင်းအုပ်ဆရာမကြီး ဒေါ်ရွှေစင်ဝင်း က အခုလို ပြောပါတယ်။

"ကျွန်မလည်း ကလေးတွေစာသင်တဲ့အချိန်မှာပြောတယ် သူများနိုင်ငံမှာနေရတာ၊ လုံခြုံရေးအားဖြင့်တော့ မပြည့်စုံဘူး၊ ဒါပေမဲ့ ရတဲ့အချိန်မှာ ရတဲ့အခွင့်အရေး ကောင်းမွန်တဲ့ဟာတွေကို စုပ်ယူပါ၊ ကိုယ့် နိုင်ငံငါတို့ပြန်ရမှာ ပြန်တဲ့အခါ ဒီက Culture တွေ ကောင်းတဲ့အရာတွေကိုယူသွားပါ၊ ကျွန်မတော့ အဲလိုမျိုး Motivate လုပ်တာပေါ့နော်၊ အခု သူတို့လာတယ် သိမ်မွေ့တယ်၊ သင်ကြားမှုပိုင်းကအစ မတူဘူးပေါ့နော်၊ ကျွန်မတို့ဆိုလည်း ကိုယ့်ရှေးရိုးရာအတိုင်း အော်ဟယ် ဟစ်ဟယ်နဲ့ သူတို့နဲ့လုံးဝမတူဘူး၊ မတူတဲ့အကြောင်းရင်း ကွာတာလည်း ကလေးတွေရှင်းပြတယ်၊ နောက် သူတို့ဆိုလည်း Supporting ပိုင်းကလည်း သူတို့အစိုးရရဲ့ဘက်ဂျက်နဲ့လာတော့ Supporting ပိုင်းလည်းရှိတယ်၊ သူတို့ကိုယ်တိုင်လည်း အရည်အသွေးကပြည့်မီတယ်ဆိုတော့ ကျွန်မတို့ကလေးတွေလည်း နောင်တစ်ချိန် Future မှာ နင်တို့လည်း ဒါမျိုးဖြစ်အောင်ကြိုးစားရမယ်၊ နင်တို့လည်း ထောက်ပံ့ရမယ် ဆိုတဲ့ပုံစံနဲ့ပေါ့နော်၊ ကျွန်မတို့ အားပေးပြီး ကြိုးစားလုပ်ပါတယ်လို့။’’

ရှေ့ဆက်ပြီး Migrant ကလေးတွေကိုယ့်ဘဝရပ်တည်နိုင်တဲ့အထိ ဖွံ့ဖြိုးရေးပိုင်းအစီအစဉ်တွေကိုတတ် နိုင်သလောက် ဆက်လက်လုပ်ဆောင်သွားမယ်လို့ KMCC မန်နေဂျာ Mijo Ko က ပြောပါတယ်။

တာ့ခ်ခရိုင်ထဲမှာ ရွှေ့ပြောင်းဒေသပညာရေးဆိုင်ရာပူးပေါင်းဆောင်ရွက်ရေးဌာန (MECC) ရဲ့ စာရင်းအရ ပြီးခဲ့တဲ့ ၂ဝ၂၂ ခုနှစ် ပညာသင်နှစ်မှာ Migrant ကျောင်းသားဦးရေ တစ်သောင်းတစ်ထောင်နီးပါး ရှိပြီး ကျောင်းပေါင်း ၆၅ ကျောင်းမှာ ဆရာ၊ ဆရာမ ၆ဝဝ နီးပါး သင်ကြားပေးနေတယ်လို့ သိရပါတယ်။