ပါမောက္ခရှောင်တာနဲလ်ရဲ့ ထောင်တွင်းအတွေ့အကြုံစာအုပ်အကြောင်း မေးမြန်းချက်

နိုင်ငံတော်အတိုင်ပင်ခံ ဒေါ်အောင်ဆန်းစုကြည်ရဲ့ စီးပွားရေး အကြံပေး မစ္စတာ ရှောင်တာနဲလ်ဟာ စစ်တပ်က အာဏာသိမ်းပြီးတဲ့နောက် နေပြည်တော်နဲ့ အင်းစိန်အကျဉ်းထောင်တွေမှာ ရက်ပေါင်း ၆၅၀ ချုပ်နှောင်ခံထားရစဉ်က အတွေ့အကြုံတွေကို " An unlikely prisoner "ဆိုတဲ့ စာအုပ်တစ်အုပ် ရေးသား ထုတ်ဝေလိုက်ပါတယ်။ စာအုပ်ရေးသားသူ မစ္စတာ ရှောင်တာနဲလ်က ဒီစာအုပ်ကြောင့် နိုင်ငံတကာမှာ မြန်မာနိုင်ငံအရေးအတွက် အာရုံစိုက်မှုတိုးလာပြီး အလေးထားဆောင်ရွက်လာကြဖို့ ရည်ရွယ်တယ်လို့ RFA ကို ပြောပါတယ်။ RFA ဝိုင်းတော်သား ကိုရဲခေါင်မြင့်မောင်က ဆက်သွယ်မေးမြန်းထားပါတယ်။
___________
RFA - မစ္စတာ ရှောင်တာနဲလ် ဒီ ‘An unlikely prisoner’ ဆိုတဲ့ စာအုပ်ကို ရေးဖြစ်ခဲ့ပုံအကြောင်း ပြောပြပါဦး။

ရှောင်တာနဲလ် - ကျွန်တော် ဒီစာအုပ်ကိုအမြဲရေးချင်ခဲ့တာပါ။ ကျွန်တော် ချုပ်နှောင်ခံထားရတဲ့အချိန်အတွင်းမှာ စာအုပ်ရဲ့ အကြောင်းအရာအများစုကို စိတ်ကူးထဲမှာပဲ ရေးခဲ့တာပါ။ ကျွန်တော့်ကိုထားတဲ့ အကျဉ်းခန်းထဲမှာ အခြား ဘာမှလဲလုပ်စရာမရှိတော့ ခေါက်တုံ့ခေါက်ပြန် လျှောက်နေရင်းနဲ့ ဒီစာအုပ်ရဲ့သုံးပုံ နှစ်ပုံလောက်ကို စိတ်ကူးနဲ့ပဲ ရေးဖြစ်ခဲ့ပါတယ်။ ပြန်လွတ်မြောက်လာတော့ စိတ်ကူးထဲက အကြောင်းအရာတွေကို စာအဖြစ် ပြန်ပြောင်းရတာ လွယ်လွယ်ကူကူနဲ့ ပြီးစီးခဲ့ပါတယ်။

RFA - ဒီစာအုပ်ထဲမှာ ဘယ်လို အကြောင်းအရာတွေ ပါသလဲဆိုတာ ပြောပြပါဦး။

ရှောင်တာနဲလ် - စာအုပ်ရဲ့ သုံးပုံနှစ်ပုံလောက်က စစ်တပ်အာဏာသိမ်းပြီးနောက်ပိုင်း အကြောင်းတွေပါ။ စစ်တပ်က အာဏာသိမ်းတဲ့နေ့ အတွေ့အကြုံနဲ့ နောက်ငါးရက်အကြာမှာ အဖမ်းခံလိုက်ရတဲ့အကြောင်း အသေးစိတ် ပြောပြထားပါတယ်။ အဲဒီနောက် ရက်ပေါင်း ၆၅၀ ကတော့ ရန်ကုန် အင်းစိန်ထောင်ထဲမှာ အချုပ်ခံထားရတဲ့အကြောင်း၊ အစပိုင်း နှစ်လမှာ စစ်ကြောရေးမှာ စစ်ဆေးခံရတဲ့ အတွေ့အကြုံအကြောင်း ၊ အဲဒီနောက် တရားရင်ဆိုင်နေရတုန်းမှာ နေပြည်တော်ကို ပြောင်းရွှေ့ချုပ်ထားပြီး အင်းစိန်ထောင်ကို ပြန်ပြောင်းထားတဲ့ ကာလအကြောင်းနဲ့ ဒေါ်အောင်ဆန်းစုကြည်နဲ့ တရားရုံးမှာ တွေ့ခဲ့တဲ့အကြောင်းတွေ ဖြစ်ပါတယ်။ ဒေါ်စုနဲ့ ပတ်သက်ပြီး အာဏာမသိမ်းခင်က အတူအလုပ်လုပ်ခဲ့တဲ့ အကြောင်းရယ်၊ ထိန်းသိမ်းခံရပြီးနောက်ပိုင်း ရုံးတင်စစ်ဆေးနေတဲ့ အချိန်မှာလည်း စိတ်ဓာတ်ပြိုလဲမသွားဘဲ ရပ်တည်နေနိုင်တဲ့ အကြောင်းတွေ ပါပါတယ်။ စီရင်ချက်ချပြီးတဲ့နောက် ကျွန်တော်ကို အင်းစိန်ထောင်ကို ပြန်ခေါ်လာတဲ့အခါမှာ သေဒဏ်ကျ အကျဉ်းသားတွေနဲ့အတူ ထားခဲ့ပါတယ်။ သူတို့ဟာ သေဒဏ်ချခံထားရပေမဲ့ အံ့သြစရာကောင်းလောက်အောင် စိတ်ဓာတ်ကြံ့ခိုင်ပြီး ကျွန်တော်နဲ့မိတ်ဆွေကောင်းတွေ ဖြစ်ခဲ့ပါတယ်။ နောက်ဆုံး အိမ်ပြန်ရတော့မယ်လို့ လာပြောတဲ့အကြောင်းနဲ့ အိမ်ပြန်ရောက်တော့ ဝမ်းမြောက်ဝမ်းသာဖြစ်ခဲ့တဲ့ အကြောင်းတွေ ဖြစ်ပါတယ်။

အာဏာမသိမ်းခင်က ကျွန်တော် NLD အစိုးရရဲ့ အကြံပေးဖြစ်လာခဲ့ပုံနဲ့ ပြုပြင်ပြောင်းလဲရေး လုပ်ငန်းတွေမှာ ပါဝင်ခဲ့ပုံ အကြောင်းတွေကိုလည်း နောက်ခံ အကြောင်းအရာအဖြစ် အခန်းတစ်ခန်း ထည့်သွင်းထားပါတယ်။ အထူးသဖြင့် ဒီ ပြုပြင်ပြောင်းလဲရေး လုပ်ငန်းတွေကြောင့် စစ်တပ် ခေါင်းဆောင်တွေ တစ်ဆထက်တစ်ဆ စိုးရိမ်ပူပန်လာတဲ့အကြောင်းတွေလည်း ပါပါတယ်။ အများစုကတော့ စစ်တပ်က အာဏာသိမ်းပြီး ဖြစ်ခဲ့တဲ့ အကြောင်းအရာတွေကို မှတ်တမ်းတစ်ခုအနေနဲ့ ရေးထားတာ ဖြစ်ပါတယ်။

RFA - နောက်ပိုင်းမှာ မစ္စတာ ရှောင်တာနဲလ် ပြန်လည် လွတ်မြောက်ဖို့အတွက် ပေါ့။ စစ်ကောင်စီကို ဘယ်လိုမျိုး ကတိကဝတ်တွေ ပေးခဲ့ရသလဲ ဆိုတာမျိုးရော စာအုပ်ထဲမှာ ပြောပြထားပါသလား။

ရှောင်တာနဲလ် - အဲဒီလို ကတိကဝတ်မျိုး လုံးဝ မရှိခဲ့ပါဘူး။ သူတို့ဘက်ကတော့ ကျွန်တော့်ကို အဲဒီလိုမျိုး တောင်းဆိုလာမယ်လို့ မျှော်မှန်းထားခဲ့ပါတယ်။ ဒါပေမဲ့ တစ်ခါမှ မတောင်းဆိုခဲ့ပါဘူး။ ကျွန်တော်ကိုယ်တိုင်လည်း ဘယ်လို ခံဝန်ကတိမျိုးကိုမှ လက်မှတ်မထိုးဖို့ အရမ်းသတိထားပါတယ်။ ကျွန်တော်ကို ပြန်လွှတ်ပေးမဲ့ နောက်ဆုံးနေ့ထိ အဲဒီလိုလုပ်ဖို့ ပြောလာတာ မရှိခဲ့ပါဘူး။ တောင်းဆိုလာရင်လည်း ကျွန်တော်ဘက်က လက်ခံမှာမဟုတ်ပါဘူး။ ဒါပေမဲ့လည်း ပြန်လွတ်လာပြီး သြစတြေးလျကို ပြန်ရောက်ကတည်းက သြစတြေးလျနိုင်ငံသား တစ်ယောက်အနေနဲ့ မြန်မာနိုင်ငံမှာကြုံခဲ့သမျှကို လွတ်လပ်စွာပြောဆိုခွင့်ရှိတဲ့အတွက် လွတ်လွတ်လပ်လပ် ပြောဆိုရေးသားခဲ့ပါတယ်။ ဒီစာအုပ်က ကျွန်တော်တစ်ယောက်တည်းရဲ့ အမြင်နဲ့ ရေးထားတာ ဖြစ်ပေမဲ့ စစ်ကောင်စီအပေါ် ကျွန်တော်မြင်တဲ့အမြင်နဲ့ ကျွန်တော့်ကို ဖမ်းဆီးထိန်းသိမ်းခဲ့တဲ့ အကြောင်းရယ်၊ တရားစွဲဆိုပြီး ရုံးတင် စစ်ဆေးခဲ့တဲ့အကြောင်း အားလုံးကို တတ်နိုင်သလောက် ဘက်မလိုက်ဘဲ မျှတတဲ့ အမြင်ဖြစ်အောင် ရေးသားထားပါတယ်။ စစ်ခေါင်းဆောင်တွေကတော့ ကျွန်တော့် စာအုပ်ထဲက အကြောင်းအရာတွေကို သဘောကျမှာ မဟုတ်ပါဘူး။ ဒါပေမဲ့ ဘယ်လို အကြောင်းအရာကိုမှ မရေးဖို့၊ မပြောဖို့ ကတိပေးခဲ့ရတာ မရှိခဲ့ပါဘူး။

RFA - ချုပ်နှောင်ခံထားရစဉ်အတွင်းမှာ အမြဲအမှတ်ရနေမယ့် အကြောင်းအရာအချို့နဲ့ အခြားကျေးဇူးတင်ထိုက်သူတွေ အကြောင်းကိုလည်း မစ္စတာ ရှောင်တာနဲလ်ရဲ့ စာအုပ်ထဲမှာ ရေးထားတယ်လို့ သိရပါတယ်။ အဲဒီအကြောင်း ပြောပြလို့ ရမလား။

ရှောင်တာနဲလ် - ကျွန်တော့်မိတ်ဆွေ ဦးခင်မောင်ရွှေ ခေါ် ဦးရာကွတ်ဘိုင် သေဆုံးတဲ့အကြောင်း ကြားရတာ တော်တော် စိတ်ထိခိုက်စရာကောင်းတဲ့ အဖြစ်အပျက်အဖြစ် အမှတ်ရနေပါတယ်။ ကျွန်တော် အင်းစိန်ထောင်မှာ နေခဲ့ရတဲ့ ပထမခြောက်လအတွင်းမှာ သူက ကျွန်တော့်ကို ကူညီစောင့်ရှောက်ခဲ့တဲ့အတွက် ကျေးဇူးတင်ကြောင်း ရေးထားပါတယ်။ နောက် ကျွန်တော့်ကို ရုံးတင်စစ်ဆေးဖို့ နေပြည်တော်ထောင်ကို တစ်နှစ်လုံးပြောင်းထားတော့ သူ့အကြောင်း မကြားရတော့တာ၊ အင်းစိန်ထောင်ကို ပြန်ရောက်မှပဲ သူအသတ်ခံလိုက်ရတယ်ဆိုတာ သိရပါတယ်။ ဒီအကြောင်းက အမြဲ မှတ်မှတ်ရရရှိနေမှာပါ။ ဒါတွေအပြင် ထောင်ထဲမှာ ဆင်းဆင်းရဲရဲနေခဲ့ရတာ၊ ထောင်အစားအသောက်အတွေ ဆိုးတာနဲ့ အကျဉ်းသားတွေကို ထောင်ပြောင်းရွေ့တဲ့အခါ ကြုံရတဲ့ ဆိုးဆိုးဝါးဝါး အခြေအနေတွေအကြောင်းကို ရေးထားပါတယ်။ အကျဉ်းသားတွေကို ပြောင်းရွှေ့တဲ့ အခြေအနေနဲ့ ပတ်သက်လို့ ခင်ဗျားတို့လို မြန်မာသတင်းဌာနတွေက ရေးထားတာတွေလည်း ဖတ်ရပါတယ်။ အဲဒါနဲ့ ပတ်သက်လို့ ကျွန်တော့်အသံကိုလည်း ထည့်ပေးပါလို့ ပြောချင်ပါတယ်။ ကျွန်တော် ကြုံခဲ့ရသမျှထဲမှာ ထောင်တစ်ခုကနေ တစ်ခုကိုပြောင်းတာနဲ့ ထောင်ကနေ တရားရုံးကို ရွှေ့ပြောင်းတဲ့အချိန်တွေမှာ ကြုံခဲ့ရတဲ့ အခြေအနေတွေက အဆိုးဆုံးပါပဲ။ ထောင်ထဲမှာ လုပ်ဖော်ကိုင်ဖက် အချို့နဲ့ ပြန်ဆုံရတဲ့ အခါ သူတို့ရဲ့ အားပေးကူညီမှုနဲ့ ရဲစွမ်းသတ္တိအကြောင်း သိရတာလည်း အမှတ်ရစရာပါပဲ။ ကျွန်တော် လွတ်မြောက်ဖို့ နည်းလမ်းအမျိုးမျိုးနဲ့ ကြိုပမ်းခဲ့တဲ့ ကျွန်တော်ဇနီးနဲ့ မိသားစုကိုလည်း ကျေးဇူးတင်ကြောင်း ပြောလိုပါတယ်။ ကျွန်တော် လွတ်မြောက်ဖို့ ကျွန်တော့်ဇနီးက စာရေးပြီးတောင်းဆိုခဲ့တဲ့ အထဲမှာ ကမ္ဘောဒီးယား ဝန်ကြီးချုပ် ဟွန်ဆန်၊ အမေရိကန် သမ္ပတကြီးနဲ့ ဗိုလ်ချုပ်မှူးကြီး မင်းအောင်လှိုင်ရဲ့ဇနီး အပြင် အင်္ဂလန်ဘုရင် ချားစ်တောင် ပါပါတယ်။ ကျွန်တော့်အတွက် အမှတ်တရ အဖြစ်ဆုံးကတော့ မြန်မာနိုင်ငံက မိတ်ဆွေတွေ၊ မြန်မာပြည်သူတွေပဲ ဖြစ်ပါတယ်။ စစ်ကောင်စီရဲ့ ဖိအားကြောင့် အချို့လူက စရိုက်ပြောင်းသွားပြီး ဆိုးဆိုးဝါးဝါး ပြုမူခဲ့ကြပေမဲ့ အများစုကတော့ စိတ်သဘောထား ရင့်ကျက်မှုရှိရှိနဲ့ ကောင်းကောင်းမွန်မွန် ပြုမူဆက်ဆံကြပါတယ်။ ဒီလို ကောင်းမွန်တဲ့ အပြုအမူစိတ်ဓာတ်တွေရဲ့ အကျိုးကျေးဇူးကို ကျွန်တော်ခံစားခဲ့ရတာ ဖြစ်ပါတယ်။

RFA - ဒီ စာအုပ်ကနေ ဘယ်လို အပြောင်းအလဲ သက်ရောက်မှုတွေ ဖြစ်လာဖို့ မျှော်လင့်ပါသလဲ။

ရှောင်တာနဲလ် - ကျွန်တော့် စာအုပ်ကြောင့် နိုင်ငံတကာမှာ မြန်မာ့အရေးကို ပိုပြီး အာရုံစိုက်လာကြဖို့ ရည်ရွယ်ပါတယ်။ အခုဆို မြန်မာနိုင်ငံမှာ အခြေအနေ ဆိုးသထက်ဆိုးလာနေပေမဲ့ ကမ္ဘာကြီးက ယူကရိန်းကိုပဲ အာရုံရောက်နေကြတယ်။ မြန်မာပြည်သူတွေဟာ အကူအညီလိုအပ်နေတယ်၊ ရလည်း ရထိုက်ပါတယ်။ ကျွန်တော့်စာအုပ်ကြောင့် မြန်မာနိုင်ငံအရေးကို အာရုံစိုက်လာကြပြီး အကူအညီတွေ ရလာခဲ့ရင် အောင်မြင်တယ် ဆိုရမှာပါ။ နောက်ပြီး ကျွန်တော့် စာအုပ်ထဲမှာ ကျေးဇူးတင်ထိုက်သူအချို့ကို သူတို့ လုံခြုံရေးအတွက် နာမည်တပ်မထားဘဲ ခြုံငုံပြီး ပြောထားတာလည်း ရှိပါတယ်။ ကျွန်တော် မြန်မာနိုင်ငံက ထွက်ခွာဖို့ လေယာဉ်ပေါ် တက်ကာနီးမှာတင် အရာရှိကြီးတစ်ဦးက “ ရှောင်ရေ မြန်မာပြည်ကို မမုန်းလိုက်ပါနဲ့“ လို့ လာပြောပါတယ်။ ကျွန်တော်ကို မတရားသဖြင့် ပြုမူခဲ့တာ စစ်ကောင်စီက လုပ်ခဲ့တာပါ။ မြန်မာပြည်သူတွေ ကြုံနေရတာ ကျွန်တော်ထက် အများကြီးဆိုးပါသေးတယ်။ ကျွန်တော်ကတော့ မြန်မာပြည်ကို ဘယ်တော့မှ မုန်းမှာလဲ မဟုတ်ပါဘူး၊ အခွင့်အရေးရရင်လည်း ပြန်လာချင်ပါသေးတယ်လို့ ပြောချင်ပါတယ်။