ཆབ་སྲིད་ཀྱི་གནད་དོན་གླེང་སློང་གནང་རྒྱུར་གཡོལ་ཐབས།

ཨ་རིའི་སྲིད་འཛིན་གྱི་ལྕམ་རྒྱ་ནག་ནང་འཚམས་གཟིཊ་གནང་རིང་ཆབ་སྲིད་ཀྱི་གནད་དོན་གླེང་སློང་གནང་རྒྱུར་གཡོལ་ཐབས་གནང་གི་ཡོད་འདུག
དེ་ཡང་གནས་ཚུལ་ལྟར་ན། ཨ་རིའི་སྲིད་འཛིན་ཨོ་བྷ་མའི་ལྕམ་Michelle Obamaགཟའ་ཕུར་བུའི་ཉིན་རྒྱ་ནག་དུ་ཆེད་ཕེབས་ཀྱིས་དུས་ཡུན་གཟའ་འཁོར་གཅིག་རིང་རྒྱ་ནག་ནང་འཚམས་གཟིགས་གནང་རྒྱུ་ཡིན་ཞིང་། དེའི་རིང་པེ་ཅིན་སློབ་གྲ་ཆེན་མོའི་སློབ་ཕྲུག་ཚོར་གསུང་བཤད་གནང་རྒྱུ་དང་། དེ་བཞིན་རྒྱ་ནག་གི་གྲོང་ཁྱེར་ཤིའི་ཨན་དང་། ཁྲིན་ཏུར་ཡང་ཕེབས་འཆར་ཡོད་པ་དང་། ད་རེས་ལྕམ་Michelle དང་ལྷན་དུ་ཁོང་གི་སྐྱེས་མ་དང་། བོུ་གཉིས་ཕེབས་རོགས་སུ་ཡོད་པ་རེད། གཟའ་པ་སངས་ཉིན་ཨ་རིའི་སྲིད་འཛིན་གྱི་ལྕམ་Michelle Obama དང་རྒྱ་ནག་གི་སྲིད་འཛིན་ཞིའི་ཅིན་ཕུན་གྱི་ལྕམ་བང་ལིས་ཡོན་དང་ཐུག་འཕྲད་གནང་རྒྱུ་ཡིན་པ་དང་། པེ་ཅིན་སློབ་གྲ་ཆེན་མོའི་ཆབ་སྲིད་དང་ཚན་རིག་སྡེ་ཚན་གྱི་དགེ་རྒན་ཝང་ཏུང་གིས། ད་རེས་རྒྱལ་ཁབ་གཉིས་པོའི་སྲིད་འཛིན་གྱི་ལྕམ་གཉིས་ཐུག་འཕྲད་བརྒྱུད་ཡུལ་གྲུ་གཉིས་དབར་གྱི་འབྲེལ་ལམ་ཡར་རྒྱས་འགྲོ་རྒྱུར་བཟང་ཕྱོགས་ཀྱི་རྣམ་པ་ཞིག་བསྐྲུན་ཐུབ་རྒྱུར་ཕན་ཐོགས་ཡོང་རྒྱུ་ཡིན་པའི་དགོངས་ཚུལ་གསུང་འདུག དེའི་གོང་གི་ཨ་རིའི་སྲིད་འཛིན་ཁ་ལིན་ཀྲོན་དང་། བྷུའུ་ཤིའི་རྣམ་གཉིས་ཀྱི་ལྕམ་རྒྱ་ནག་ནང་ཕེབས་པའི་སྐབས་རྒྱ་ནག་ནང་གི་ཆབ་སྲིད་གནས་སྟངས་དང་། འགྲོ་བ་མིའི་ཐོབ་ཐང་གནད་དོན་སྐོར་གླེང་སློང་གནང་མྱོང་ཡོད་པ་རེད། འོན་ཀྱང་ད་རེས་སྲིད་འཛིན་Obama ཡི་ལྕམ་Michelle Obama ཡིས་རྒྱ་ནག་ནང་འཚམས་གཟིགས་གནང་རིང་། གཙོ་བོ་སློབ་གསོ་དང་། རིག་གཞུང་སྤེལ་རེས་ཀྱི་གནད་དོན་ཐོག་ཐུགས་ཁུར་གནང་རྒྱུ་ཡིན་ལུགས་དང་། ལྕམ་Michelleཡིས་ཁོ་རང་སྒེར་གྱི་ལོ་རྒྱུས་དང་ཉམས་མྱོང་ཐོག་ནས་ཨ་རིའི་རིན་ཐང་དང་ཁྱད་ཆོས་སྐོར་གཟའ་འཁོར་རྗེས་མའི་གཟའ་མིག་དམར་ཉིན་རྒྱ་ནག་གི་ཁྲེན་ཏུ་གྲོང་ཁྱེར་གྱི་སློབ་གྲ་ཞིག་ཏུ་གཏམ་བཤད་གནང་རྒྱུ་ཡིན་པའི་སྐོར་འབྲེལ་ཡོད་ཨ་རིའི་དཔོན་རིགས་ནས་གསུང་འདུག
གསར་འགོད་པ་འཆི་མེད།